Matewu 27:1-66
27 A cikhati leci gi ngaca, vontlhe a vapristi lava va tihosana ni madhota va no tlhangana va xuxa cikungo ca ku va ta mu dayisa kuyini Jesu.
2 Andzhako ka ku mu boha, va no famba naye va ya mu nyikela ka Pilatu, a govhernadhori.
3 Makunu laha Judhasi, ku nga loyi a nga mu nyikela, a nga wona lezvaku Jesu i konilwe, i no ti laya a tlhelisa a 30 wa macheleni ka vapristi lava va tihosana ni madhota,
4 aku: “Ndzi wonhile hi ku nyikela munhu wo kala nandzu.” Vona vaku: “Hi nghena kwihi ka lezvo? Leto ta wena!”*
5 Hikwalaho i no hoxa mali lomu tempeleni a suka a famba, a ya ti boha.
6 Kanilezvi a vapristi lava va tihosana va no teka mali leyo, vaku: “A zvi faneli ku chela mali leyi kaxeni ga minyikelo ya lomu tempeleni, hakuva i mali ya nkhata.”
7 Andzhako ka ku bhula hi zvona, va no teka mali leyo va ya xava petso* kasi wuva cilahla ca vamatiko.
8 Hikwalaho, a petso lowo wu vitaniwa ku i Petso wa Nkhata kala nyamutlha.
9 Makunu ku no tatiseka lezvi zvi nga wulilwe hi muphrofeti Jeremiya, aku: “Va no teka a 30 wa macheleni, ku nga mali leyi va xavisileko hi yona munhu loyi a vana vo kari va ka Izrayeli va gemileko ntsengo wa ku mu xavisa hi wona,
10 va xava hi yona petso kota lezvi Jehovha a nga ndzi layile.”
11 Makunu Jesu na a yimile mahlweni ka govhernadhori, a govhernadhori i no mu wutisa, aku: “Hi wena Hosi ya vaJudha ke?” Jesu a mu hlamula, aku: “U wula zvona.”
12 Kanilezvi, a cikhati leci a nga kari a lumbetiwa hi vapristi lava va tihosana ni madhota, a nga hlamulangi nchumu.
13 Hikwalaho, Pilatu i no mu wutisa, aku: “A wu zvizwi lezvi va wulako hi wena ke?”
14 Kanilezvi a nga mu hlamulangi ne ku wula nchumu. Hikwalaho, a govhernadhori i no hlamala nguvhu.
15 Ka festa ni festa, a govhernadhori i wa tala ku tlhatlha cibochwa cin’we ci nga langiwa hi citshungu.
16 Ka cikhati caleco va wa khomile a cigevenga ca hombe ci vitaniwako ku hi Bharabhasi.
17 Hikwalaho, laha a citshungu ci nga tlhangene, Pilatu i te ngalo kabye: “Mu lava ku ndzi mu tlhatlhela mani? Ndzi tlhatlha Bharabhasi kutani Jesu loyi va nge hi Kristu?”
18 Hakuva Pilatu i wa zvi wonile lezvaku va mu nyikele hi kota ya matshoho.
19 A cin’wani kambe, na a ha hi citulweni ca kulamula, a sati wakwe i no rumela gezu kakwe, aku: “U nga mu mahi nchumu a wanuna loye wo lulama, hakuva ndzi xanisekile nguvhu nyamutlha hi ku lora hi kota ya yena.”
20 Kanilezvi a vapristi lava va tihosana ni madhota va no kucetela citshungu lezvaku ci kombela Bharabhasi, kanilezvi Jesu a dawa.
21 A govhernadhori i te ngalo kabye: “Mu lava ku ndzi mu tlhatlhela mani ka lava va vambiri?” Vaku: “Hi tlhatlhele Bharabhasi.”
22 Pilatu i no va wutisa, aku: “Makunu ndzi kuyini hi Jesu loyi va nge hi Kristu?” Vontlhe vaku: “I waye mhandzeni!”*
23 Yena aku: “Hikuyini? Cini a nga goha?” Hambulezvo, va no engetela ku banguleka, vaku: “I waye mhandzeni!”
24 Laha Pilatu a nga wona lezvaku a zvi phahangi, kanilezvi zvi wo vhuxa guwa, i no teka mati a hlamba mandla mahlweni ka citshungu, aku: “A ndzi na nandzu nkhateni wa wanuna loyi. Ndzi mu tsika mandleni ya n’wina.”
25 Zvalezvo a vanhu vontlhe va no hlamula, vaku: “A nkhata wakwe a wuve hehla ka hina ni ka vana va hina.”
26 I no va tlhatlhela Bharabhasi, kanilezvi a laya lezvaku Jesu a kwapiwa a tlhela a dawa mhandzeni.
27 Hi kulandzela, a masochwa ya govhernadhori ma no teka Jesu ma famba naye mutini wa govhernadhori ma ya tlhanganisa a masochwa wontlhe ma mu randzela.
28 Va no mu tlhatlha tinguwo takwe va mu kapeka nguwo yo pswhuka,
29 va luka cidlodlo* ca mimizwa va ci tlhateka hlokweni yakwe, va mu khomisa lihlanga wokweni gakwe ga cinene. Andzhako ka lezvo, va no mu khizamela va mu poyila, vaku: “Xewe, wena Hosi ya vaJudha!”
30 Va no mu phelela, va teka lihlanga va muba hi lona laha hlokweni.
31 Hi kugumesa, na va karele hi ku mu poyila, va no mu tlhatlha nguwo leyi yo pswhuka, va mu bohisa tinguwo takwe va famba naye kasi a ya belelwa mhandzeni.
32 Laha va nga kari va famba, va no kumana ni wanuna wa le Kirene a vitaniwako ku hi Simoni. Va no mu kurumeta ku rwala mhandze yakwe ya hlomulo.*
33 A cikhati va nga chikela ka wutshamu gi vitaniwako ku Golgota, zvi wulako ku: Wutshamu ga Cirwarwa,*
34 va no mu nyika vhinyo yi nga jutilwe ni mahla yo bava kasi anwa. Kanilezvi, andzhako ka ku yi ringa i no ala kunwa.
35 A cikhati leci va nga mbheta ku mu belela laha mhandzeni, va noba tihlolo kasi va avelana tinguwo takwe,
36 va gumesa va tshama laho va mu lavelela.
37 Va no vekela hehla ka hloko yakwe a mutsalo wa nandzu lowu va nga mu lumbeta, waku: “Loyi hi Jesu, a Hosi ya vaJudha.”
38 Ku wa hi ni vayivi vambiri va nga belelwe timhandzeni zvin’we naye, a mun’we reveni gakwe ga cinene, ni mun’wani reveni gakwe ga cibhabha.
39 Lava va nga kari va hundza va wa wulawula kubiha hi Jesu na va ninginisa tihloko,
40 vaku: “Wena u ngaku u ta hahlula tempeli u tlhela u yi aka hi masiku manharu, ti ponise ka! Loku u hi n’wana wa Nungungulu chika laha mhandzeni ya hlomulo!”*
41 A vapristi lava va tihosana vonawu zvin’we ni vatsali ni madhota va no mu poyila, vaku:
42 “I hanyisile van’wani, kanilezvi a nga zvi koti ku ti hanyisa! Loku a hi Hosi ya Izrayeli, i wa chike zvezvi laha mhandzeni ya hlomulo,* hina hi ta kholwa kakwe.
43 I wa tsumba Nungungulu, makunu Nungungulu i wa mu tlhatlhise loku a mu randza, hakuva i waku: ‘Ndzi N’wana wa Nungungulu.’”
44 Ni vayivi lava va nga belelwe zvin’we naye timhandzeni va no mu rukatela.
45 Kusukela hi 12 hora,* ku nova ni munyama misaveni yontlhe kala 15 hora.*
46 Lomu ka ma 15 hora, Jesu i no vitana hi gezu ga hombe, aku: “Eli, Eli, lama sabhaktani?” zvi wulako ku: “Nungungulu wa mina, Nungungulu wa mina, u ndzi tsikele yini?”
47 A cikhati leci a vokari va nga yimile laho va nga zvizwa, va te ngalo: “A wanuna loyi i vitana Elija.”
48 Zvalezvo, a mun’we wabye i no tsutsuma a ya teka ciponja a ci peta lomu ka vhinyo yo dzunga a ci tlhomeka laha ka lihlanga a mu nyika kasi anwa.
49 Kanilezvi lava van’wani va te ngalo: “Mu tsike! Hi lava ku wona ku Elija i tata a ta mu ponisa ke.”
50 Jesu i no vitana kambe hi gezu ga hombe a gumesa afa.*
51 A kortina ga wutshamu go basa gi no handzuka hi laha cikari, kusukela hehla kala hasi, a misava yi tsekatseka ni maribye ma pandzeka.
52 A zvilahla zvi no vhululeka, ni zvirumbi zvo tala zva vobasa lava va nga file zvi no huma zviku tlandlala
53 zvi woniwa hi vanhu vo tala (makunu a vanhu va nga hundza hi lomu zvilahleni andzhako ka kuvhuka ka Jesu, va no nghena dhoropeni go basa).
54 Kanilezvi a cikhati leci a hosana ya masochwa ni lava yi nga hi navo laha ka ku lavelela Jesu va nga wona a kutsekatseka ka misava ni lezvi zvi nga maheka, va no rurumela hi kuchava vaku: “Hakunene loyi i wa hi N’wana wa Nungungulu.”
55 Ku wa hi ni vavasati vo tala va nga kari va zvi cuwukela hi le kule, lava va nga tile na Jesu hi le Galileya kasi ku mu tirela;
56 ka vavasati lavo ku wa hi na Mariya wa le Magdhala, na Mariya a mamani wa Jakobe na Jose, ni mamani wa vana va Zabhedhi.
57 Na giya kupeleni, ku nota a wanuna wo kari wo ganya wa le Arimateya, a vitaniwako ku hi Josefa, a nga hi mupizani wa Jesu.
58 A wanuna loye i noya ka Pilatu a ya kombela cirumbi ca Jesu. Pilatu i no laya lezvaku va mu nyika cirumbi leco.
59 Makunu Josefa i no teka cirumbi a ci phutsela ka nguwo yo basa ya yi nene ya wukene,*
60 a gumesa a ci lata ka cilahla cakwe ca ciswa a nga ci kehlile* laha ribyeni. Andzhako ka lezvo, i no wumbuluta ribye ga hombe a vhala nomu wa cilahla, a ti fambela.
61 Kanilezvi Mariya wa le Magdhala, na Mariya loyi mun’wani va no tshama kwalaho mahlweni ka cilahla.
62 Hi mandziko wa kona, hi sabhadho,* a vapristi lava va tihosana ni vaFarisi va no ya tlhangana ka Pilatu,
63 vaku: “Hosi, hi alakanya lezvi a mukanganyisi loyi a nga wula na a ha hanya, aku: ‘Andzhako ka masiku manharu ndzi ta vhuxiwa hi ka vafileko.’
64 Hikwalaho, laya lezvaku a cilahla ci vhaliwa ci tiya kala ka siku ga wunharu, kasi a vapizani vakwe va ngati va ta mu yiva va gumesa va byela vanhu, vaku: ‘I vhuxilwe hi ka vafileko!’ Makunu a mawunwa lawa yo gumesa ma ta biha nguvhu ku hundza lawa yo sangula.”
65 Pilatu aku kabye: “A varindzeli hi lava. Fambani mu ya ci vhala ci tiya kala laha mu zvi kotako.”
66 Hikwalaho, va no famba va ya lema cilahla, va tlhela va veka vagadhi.
Mitlhamuselo ya lahasi
^ Kutani: “Leyo i mhaka ya wena”.
^ Hi kukongoma: “Petso wa muwumbi”. Zvi wonekisa ku khwatsi a petso lowu hi lomu a vawumbi va nga wumbela kona a zvibya zvabye.
^ Kutani: “Mu daye mhandzeni!”
^ Kutani: “korowa”.
^ Wona Tlhamuselo wa magezu ya Bhibhiliya.
^ Kutani: “Cikodo; Cikuwa”.
^ Wona Tlhamuselo wa magezu ya Bhibhiliya.
^ Wona Tlhamuselo wa magezu ya Bhibhiliya.
^ Hi kukongoma: “hi hora ya wu 6”.
^ Hi kukongoma: “ka hora ya wu 9”.
^ Hi kukongoma: “a nyikela moya”. Wona laha ka ku: “Moya” ka Tlhamuselo wa magezu ya Bhibhiliya.
^ Kutani: “linyo”.
^ Kutani: “bhoxile”.
^ Hi kukongoma: “andzhako ka siku ga Kulongisela”.
