Matewu 28:1-20
28 Loku a sabhadho gi hundzile, Mariya wa le Magdhala na Mariya loyi mun’wani va noya va ya wona cilahla na giya kuceni hi siku go sangula ga vhiki.*
2 Kuve ni kutsekatseka ka hombe ka misava, hakuva a ngilozi ya Jehovha yi wa relele hi le tilweni yi ta wumbuluta ribye, yi tshama hehla ka gona.
3 Yi wa ku khwatsi kuhatima, ni tinguwo ta yona ti wa basile ti ku pa.
4 A cikhati leci a vagadhi va nga yi wona, va no rurumela va titivala hi kuchava.
5 Kanilezvi a ngilozi yi no byela vavasati lavo yiku: “Mu nga chavi, hakuva ndza zvi tiva lezvaku mu lava Jesu loyi a delweko mhandzeni.
6 A nga kona laha, hakuva i vhuxilwe hi ka vafileko kota lezvi a nga wula. Tanani mu ta wona laha a nga latilwe kona.
7 Makunu tsutsumani mu ya byela vapizani vakwe lezvaku i vhuxilwe hi ka vafileko, niku i ndleleni ya kuya Galileya. Mu ta ya mu wona seyo. Hi zvalezvo ndzi nga lava ku mu byela.”
8 Hikwalaho va no tekela ku suka laha cilahleni, na va chava, hambulezvo na va tsakile nguvhu kambe, va tsutsuma va ya byela a vapizani vakwe a timhaka leti.
9 Makunu Jesu i no kumana navo aku kabye: “Gi cile!” Va no tshinela va khoma mikondzo yakwe va mu khizamela.
10 Jesu aku kabye: “Mu nga chavi! Fambani mu ya byela a vamakabye va mina a timhaka leti kasi vaya Galileya. Va ta ya ndzi wona seyo.”
11 A vavasati lavo na va ha hi ndleleni, a vagadhi vo kari va noya dhoropeni va ya byela a vapristi lava va tihosana zvontlhe lezvi zvi nga maheka.
12 Andzhako ka loku a vapristi va hombe va tlhangene ni madhota va bhula hi zvona, va no teka mali yo tala va nyika a masochwa,
13 vaku: “Wulani lezvi: ‘Ku tile vapizani vakwe ni wusiku va ta mu yiva hina na hi etlele.’
14 Loku govhernadhori a zvizwa, hi ta mu tlhamusela* a mhaka leyi. N’wina mu nga karateki.”
15 Hikwalaho, va no teka mali va maha lezvi va nga leletelwe. A mahungu lawo ma no hangalaka cikari ka vaJudha kala nyamutlha.
16 Kanilezvi a vapizani lava va 11 va noya Galileya le citsungeni leci Jesu a nga va byelile ku va ta kumana kona.
17 Laha va nga mu wona, va no mu khizamela, kanilezvi a vokari va no kanakana.
18 Jesu i no va tshinelela, aku: “Ndzi nyikilwe ntamu wontlhe le tilweni ni laha misaveni.
19 Hikwalaho, fambani mu va maha vapizani a vanhu va matiko wontlhe, mu va bhabhatisa hi vito ga Papayi ni ga N’wana ni ga moya wo basa,
20 mu va gondzisa a ku ingisa zvontlhe lezvi ndzi mu layileko. Ndzi na n’wina masiku wontlhe kala kugumeseni ka tiko.”*
Mitlhamuselo ya lahasi
^ A siku legi hi legi hina hi nge i Sonto. Ka vaJudha gi wa hi siku go sangula ga vhiki.
^ Hi kukongoma: “hi ta mu kholwisa”.
^ Kutani: “nguva”. Wona laha ka ku: “Nguva” ka Tlhamuselo wa magezu ya Bhibhiliya.
