Matewu 4:1-25
4 Andzhako ka lezvo, Jesu i no yiswa ciwuleni hi moya wa Nungungulu. Na a hi kwaseyo, Sathani* i no mu ringa.
2 Andzhako ka ku tshama 40 wa masiku* na a ngagi nchumu i nozwa ndlala.
3 Makunu a Muringi i no mu tela, a taku: “Loku u hi n’wana wa Nungungulu, byela maribye lawa ma cica ma maha tipawa.”
4 Kanilezvi Jesu i no mu hlamula, aku: “Ku tsalilwe ku ngalo: ‘A munhu a nga hanyi hi zvakuga* basi, kanilezvi i hanya hi timhaka tontlhe ti humako hi ka nomu wa Jehovha.’”
5 Makunu Sathani* i no mu yisa dhoropeni go basa, a ya mu yimisa le cixungweni ca* tempeli,
6 aku kakwe: “Loku u hi n’wana wa Nungungulu, ti tsikelete uwa lahasi hakuva ku tsalilwe ku ngalo: ‘I ta ruma tingilozi takwe lezvaku ti ta ku khamukela mandleni ya tona kasi a nkondzo wa wena wu nga gumuli ribye’.”
7 Jesu i no mu hlamula, aku: “Ku tsalilwe kambe ku ngalo: ‘U nga ringi Jehovha Nungungulu wa wena.’”
8 Andzhako ka lezvo, Sathani* i no mu yisa le hehla ka citsunga co leha nguvhu a ya mu komba a mifumo yontlhe ya misava ni zviphatiphati zva yona.
9 Aku kakwe: “Ndzi ta ku nyika zvontlhe lezvi, loku u khizama u ndzi khozela.”*
10 Jesu i no mu hlamula, aku: “Suka Sathani! Hakuva ku tsalilwe ku ngalo: ‘Khozela Jehovha Nungungulu wa wena, hi yena yece u faneleko ku mu tirela.’”
11 Makunu Sathani* i no mu tsika. Andzhako ka lezvo, ku nota tingilozi ti ta mu tirela.
12 A cikhati leci a ngazwa lezvaku Johani i khomilwe i no suka aya Galileya.
13 Loku a sukile Nazareta i no ya tshama Kapernawume, kusuhani ni bimbi, tikweni ga Zebhuloni ni ga Naftali,
14 kasi ku tatiseka lezvi zvi nga wuliwa hi muphrofeti Isaya, aku:
15 “Wena tiko ga Zebhuloni ni ga Naftali, mu nga ndleleni ya bimbi, le tlhatuko wa Jordhani, a Galileya ga vamatiko!
16 A vanhu lava va tshamileko munyameni va wonile kuwonekela ka hombe, ni lava va tshamileko ndzhutini wa kufa va no woningelwa hi kuwonekela.”
17 Kusukela ka cikhati leco, Jesu i no sangula ku chumayela, aku: “Ti soleni hakuva a Mufumo wa matilo wu tshinele.”
18 Na a famba hi mbhiri ya Bimbi ga Galileya i no wona va ka makabye vambiri, ku nga Simoni a vitaniwako ku hi Pedro, ni makabye wakwe Andrewu, na va peta likoka* bimbini hakuva va wa hi vakukuti.*
19 Aku kabye: “Ndzi landzeleni, ndzi ta mu maha vakukuti va vanhu.”
20 Va no tekela ku tsika tikoka* tabye va mu landzela.
21 Loku a sukile hi laho, i no wona van’wani va vambiri va nga hi va ka makabye, ku nga Jakobe n’wana wa Zabhedhi, na Johani a makabye wakwe. Va wa hi lomu ngalaveni ni papayi wabye Zabhedhi, na va runga tikoka* tabye, a se va vitana.
22 Zvalezvo va no siya ngalava ni papayi wabye va mu landzela.
23 I no fambafamba tikweni gontlhe ga Galileya, a gondzisa masinagogeni* yabye ni ku chumayela a mahungu ya ma nene* ya Mufumo wa Nungungulu, a tlhela a hanyisa vanhu ka mababyi ya tixaka tontlhe ni zvitshetshela zva tixaka tontlhe.
24 A mahungu lawo ma no hangalaka tikweni gontlhe ga Siriya. Hikwalaho va no neha kakwe vontlhe lava va nga kari va xaniseka hi mababyi ya tixakaxaka, ni lava va nga hi ni madhimoni ni nyokani, ni lava va nga kala va nga zvi koti ku famba, a ta va hanyisa.
25 Hi kota ya lezvo, a citshungu ca hombe ci ngata hi Galileya, ni Dhekapoli,* ni Jerusalema, ni Judhiya ni le tlhatuko wa Jordhani ci no mu landzela.
Mitlhamuselo ya lahasi
^ Hi ciGreki: di·á·bo·los, zvi wulako ku “mulumbeti”.
^ Hi kukongoma: “40 wa masiku, wusiku ni mumu”.
^ Hi kukongoma: “pawa”.
^ Hi ciGreki: di·á·bo·los, zvi wulako ku “mulumbeti”.
^ Kutani: “le madembeleni ya”.
^ Hi ciGreki: di·á·bo·los, zvi wulako ku “mulumbeti”.
^ Kutani: “u ndzi khozela khati gin’we”.
^ Hi ciGreki: di·á·bo·los, zvi wulako ku “mulumbeti”.
^ Kutani: “juya”.
^ Kutani: “vaphasi va tinjhanjhi; vatandi”.
^ Kutani: “majuya”.
^ Kutani: “majuya”.
^ Wona laha ka ku: “Sinagoga” ka Tlhamuselo wa magezu ya Bhibhiliya.
^ Kutani: “ivhangeli”.
^ Kutani: “Tiko ga Khume ga Madhoropa”.
