Matewu 6:1-34
-
KANELO YA LE CITSUNGENI (1-34)
6 “Ti woneleni ku maha zvilo zva zvi nene hi ku fela ku woniwa hi vanhu; hakuva loku mu maha lezvo mu nga tava ni nchachazelo ka Papayi wa n’wina a nga le tilweni.
2 Hikwalaho loku u humesa zvilo kasi ku nyika cisiwana, u ngabi mpundzu a ku khwatsi hi lezvi a vakanganyisi va mahako lomu masinagogeni ni lomu maruweni kasi va dzundziwa hi vanhu. Ndza tiyisa ka n’wina, ndziku: Va sina va amukele a nchachazelo wabye wontlhe.
3 Kanilezvi loku wena u humesa zvilo kasi ku nyika cisiwana, u nga tsiki woko ga wena ga cibhabha gi tiva lezvi legi ga cinene gi mahako,
4 kasi a zvinyikiwo zva wena zviva cihundleni. Makunu a Papayi wa wena loyi a wonako cihundleni i ta ku tlhelisela.
5 “Loku mu khongela, mu nga fani ni vakanganyisi, hakuva va randza ku khongela na va yimile masinagogeni ni lomu mahandzakanyeni ya maruwa* ya hombe kasi va woniwa hi vanhu. Ndza tiyisa ka n’wina, ndziku: Va sina va amukele a nchachazelo wabye wontlhe.
6 Kanilezvi loku u khongela, nghena lomu ndlwini ya wena u vhala livati u khongela ka Papayi wa wena loyi a nga cihundleni. A Papayi wa wena loyi a wonako cihundleni i ta ku katekisa.
7 Loku u khongela, u nga phindaphindi magezu yalawa ya man’we a ku khwatsi hi lezvi va mahako vamatiko, hakuva va alakanya ku va ta zwiwa hi ku wulawula nguvhu.
8 Makunu n’wina mu nga fani navo, hakuva a Papayi wa n’wina wa zvi tiva lezvi mu zvi lavako hambu loku mu nga se mu kombela.
9 “Hikwalaho, khongelisani lezvi:
“‘Papayi wa hina wa le tilweni, a vito ga wena a gi basisiwe.*
10 A wute Mufumo wa wena. A kurandza ka wena a ku mahiwe misaveni kota lezvi ku mahiwako le tilweni.*
11 Hi nyike zvakuga zvi ringanako kuga nyamutlha;
12 u hi tsetselela minandzu ya hina khwatsi hi lezvi hinawu hi tsetselelako lava va nga ni minandzu ka hina.
13 U nga hi tsiki hi hluliwa hi zviringo, kanilezvi hi tlhatlhise* ka loyi wa kubiha.’
14 “Hakuva loku mu tsetselela van’wani a minandzu yabye, a Papayi wa n’wina wa le tilweni i ta mu tsetselelawu;
15 kanilezvi loku mu nga va tsetseleli a minandzu yabye, ni Papayi wa n’wina a nga ta mu tsetselela a minandzu ya n’wina.
16 “Loku mu hlambanyile ku tshama mu ngagi nchumu,* mu nga* tsuvi a ku fana ni vakanganyisi, hakuva ka masiku lawo va tshama va nga hlambi kasi va woniwa hi vanhu lezvaku va hlambanyile ku tshama va ngagi nchumu. Ndza tiyisa ka n’wina, ndziku: Va sina va amukele a nchachazelo wabye wontlhe.
17 Kanilezvi wena, loku u hlambanyile ku tshama u ngagi nchumu,* tola mafura hlokweni ya wena u tlhela u hlamba nghohe,
18 kasi u nga woniwi hi vanhu lezvaku u hlambanyile ku tshama u ngagi nchumu,* kanilezvi u woniwa ntsena hi Papayi wa wena loyi a nga cihundleni. Makunu a Papayi wa wena loyi a wonako cihundleni i ta ku katekisa.
19 “Tsikani ku ti hlengeletelela titshomba laha misaveni, laha a muhlwa ni kuchacharela* zvi gako ni laha a makhamba ma pandzako ma yiva.
20 Kanilezvi ti hlengeleteleleni titshomba le tilweni, laha ku nga hava muhlwa ni kuchacharela, ni laha a makhamba ma nga pandziko ma yiva.
21 Hakuva laha a tshomba ya wena yi nga kona, ni mbilu ya wena yi tava kwalaho.
22 “A kandiya ya miri i tihlo. Hikwalaho loku a tihlo ga wena gi potiyela ka nchumu wun’we,* a miri wa wena wontlhe wu ta wonekela.*
23 Kanilezvi loku a tihlo ga wena gi hi ni wunavenave,* a miri wa wena wontlhe wu tava munyama. Loku a kuwonekela ka wena ku hi munyama, a munyama wa kona wu tava wa hombe nguvhu!
24 “I hava a zvi kotako ku tirela tihosi timbiri; hakuva i ta venga yin’we a randza leyi yin’wani, kutani ku namarela ka yin’we a kanyisa leyi yin’wani. A mu nge zvi koti ku tirela Nungungulu ni Titshomba.
25 “Hikwalaho ndza mu byela, ndziku: Tsikani ku karateka hi wutomi ga n’wina mu ku hi taga yini, kutani ku hi tanwa yini kutani hi mimiri ya n’wina mu ku hi ta boha yini. A wutomi a gi hundzi zvakuga ke? Ni miri a wu hundzi tinguwo ke?
26 Cuwukani khwatsi a zvinyanyani zva tilo, a zvi byali, a zvi tshoveli, ne a zvi veketeli zvakuga matshaleni, hambulezvo a Papayi wa n’wina wa le tilweni wa zvi wundla. N’wina a mu va lisima ku hundza zvona ke?
27 Himani cikari ka n’wina a zvi kotako ku lehisanyana wutomi gakwe hi ku karateka ke?
28 Kona hikuyini mu karatekako hi zva ku boha? Gondzani ka lezvi a zvitsangi zva khwati zvi kulisako zvona; a zvi tiri, ne a zvi swuli;
29 kanilezvi ndza mu byela ndziku: Hambu Solomoni ni titshomba tontlhe leti a nga hi nato a nga zangi a bohisa a ku khwatsi hi cin’we ca zvona.
30 Makunu loku Nungungulu a gi bohisisa lezvo a byanyi ga khwati, legi gi nga kona nyamutlha kuveni a mandziko gi ta hoxiwa ndzilweni, a nga ta mu bohisisa a ku hundza lezvo, n’wina lava va kukholwa kutsongwani ke?
31 Hikwalaho mu nga karateki muku: ‘Hi taga yini?’ kutani ku: ‘Hi tanwa yini?’ hambu ku: ‘Hi ta boha yini?’
32 Hakuva a zvilo lezvi zvontlhe hi lezvi a vamatiko va ti karatelako ku zvi kuma. A Papayi wa n’wina wa le tilweni wa zvi tiva lezvaku ma zvi lava zvontlhe lezvo.
33 “Simamani ku lava a Mufumo wakwe ni kululama kakwe kuranga, zvontlhe a zvilo lezvi zvi ta engetelwa ka n’wina.
34 Hikwalaho, mu nga karatekeli zva mandziko, hakuva a mandziko i tava ni zvikarato zvakwe. A siku gin’we ni gin’wani gi na ni zvikarato zvi ringanako gona.
Mitlhamuselo ya lahasi
^ Hi lomu a maruwa ma tsemakanyanako kona.
^ Kutani: “a gi woniwe kota gi basileko”.
^ Kutani: “A kurandza ka wena a ku mahiwe misaveni ni le tilweni”.
^ Kutani: “hi ponise”.
^ Kutani: “mu jejuwara; mu pfhunga”.
^ Kutani: “mu nga ha”.
^ Kutani: “u jejuwara; u pfhunga”.
^ Kutani: “wo jejuwara; wo pfhunga”.
^ Kutani: “kufrujara; kukuruka; kutshutshumbala”.
^ Kutani: “gi wona khwatsi”.
^ Kutani: “wu ta tala hi kuwonekela”.
^ Hi kukongoma: “gi bihile”.
