Matewu 8:1-34
8 Andzhako ka loku Jesu a chikile hi citsungeni, i no landzelwa hi citshungu ca hombe.
2 Ku nota kakwe a munhu a nga hi ni hlokonho a ta mu khizamela, aku: “Hosi, loku u zvi lava ndzi hanyise.”*
3 I no nawuluta woko gakwe a mu henya, aku: “Ndza zvi lava! Hanyisiwa.”* Zvalezvo a hlokonho yakwe yi no hangalaka.
4 Jesu aku kakwe: “U nga byeli munhu, kanilezvi famba u ya ti kombekisa ka mupristi, u nyikela cinyikiwo leci ci wuliwako hi Nayo wa Mosi kota cikombiso ca lezvaku u hanyisilwe.”
5 Laha a nga chikela Kapernawume, ku nota kakwe a hosana ya masochwa yi ta mu khongotela,
6 yiku: “Hosi, a nandza ga mina gi etlele le kaya, gi womile zviro niku ga xaniseka nguvhu.”
7 Jesu aku kakwe: “Loku ndzi chikela seyo, ndzi ta mu hanyisa.”
8 A hosana ya masochwa yi no mu hlamula, yiku: “Hosi, a ndzi munhu wo kala ndzi ku amukela ndlwini ya mina, kanilezvi wula gezu basi, a nandza ga mina gi ta hanya.
9 Hakuva minawu ndzi munhu a fumiwako, na ndzi hi ni masochwa ndzi ma rangelako; ndzi wula ka gin’we, ndziku: ‘Famba!’ gi famba; ndziku ka gin’wani: ‘Tana!’ gita; ni ka citiri ca mina, ndziku: ‘Maha lezvi!’ ci maha.”
10 Laha Jesu a ngazwa lezvo i no hlamala nguvhu, a byela lava va nga mu landzela, aku: “Ndza mu byela lisine ndziku, a ndzi se kuma munhu lomu Izrayeli a nga ni kukholwa ka hombe ko kota loku.
11 Kanilezvi ndza mu byela lezvaku a votala va tako hi le mutsuwuka-gambo ni le mupela-gambo va ta ta tshama mezeni zvin’we na Abrahama na Isaka na Jakobe Mufun’weni wa matilo;
12 kuveni a vana va Mufumo va ta hoxiwa le handle munyameni. Kwaseyo va ta rila va getsela* matino.”
13 Jesu i no byela hosana ya masochwa, aku: “Famba. Kota lezvi u kholwako, a zvi maheke lezvi u zvi kombeleko.” Ka cikhati caleco a nandza gi no hanya.
14 Loku Jesu a chikele mutini wa Pedro, i no kuma a mukokati wakwe na a etlele hakuva i wa hi ni feveri.
15 Jesu i no henya a canja gakwe, a feveri yi se hangalaka, a ku kakatsuko a sangula ku mu tirela.
16 Laha gi nga ku phum, va no tisa kakwe a vanhu vo tala va nga hi ni madhimoni, a se hlongola mimoya leyo hi gezu gin’we, a hanyisa vontlhe va nga kari va xaniseka,
17 kasi ku tatiseka lezvi zvi nga wulilwe hi muphrofeti Isaya, zvaku: “I no teka mababyi ya hina, a rwala ni tinghumbe ta hina.”
18 A cikhati leci Jesu a nga wona citshungu ci nga hi matlhelweni yakwe, i no byela vapizani vakwe lezvaku va tlhatuka vaya ka mbhiri leyi yin’wani.
19 Ku nota mutsali a taku kakwe: “Mugondzisi, ndzi ta ku landzela ni kwihi u yako.”
20 Kanilezvi Jesu i te ngalo kakwe: “A tinghowo* ti na ni mikele, ni zvinyanyani zva tilo zvi na ni zvisaka, kanilezvi a N’wana wa munhu a nga na ka ku lata kona hloko.”
21 Andzhako ka lezvo, a mun’we wa vapizani i te ngalo kakwe: “Hosi, ndzi tsike ndzi ranga hi ku ya lahla papayi.”
22 Jesu aku kakwe: “Wena simama ku ndzi landzela. Tsika vafileko va lahla vafileko vabye.”
23 A cikhati leci a nga nghena ngalaveni, a vapizani vakwe va no mu landzela.
24 Makunu ku no vhuka a moya wa hombe lomu bimbini laha ka kuza a ngalava yi lava ku khubhunyetwa hi mavingo;* kanilezvi Jesu i wa etlele.
25 A vapizani va nota kakwe va ta mu vhuxa, vaku: “Hosi, hi ponise, hafa!”
26 Kanilezvi yena aku kabye: “Mu chava yini, n’wina va kukholwa kutsongwani?” Zvalezvo i no vhuka a kawuka moya ni bimbi, kuva ni kurula ka hombe.
27 Hikwalaho a vavanuna lavo va no hlamala nguvhu, vaku: “Kasi munhu wo tshamisa kuyini yaloyi wa ku hambu moya ni bimbi zva mu ingisa?”
28 A cikhati leci a nga chikela ka mbhiri leyi yin’wani tikweni ga vaGadhara, i no telwa hi vavanuna vambiri va nga hi ni madhimoni na va huma hi lomu zvilahleni. Va wa hi vanhu va tihanyi ni xapi, hikwalaho a nga kona a nga kari a tiya ku famba hi ruwa lego.
29 Va no banguleka vaku: “Cini hi nga ku gohela wena N’wana wa Nungungulu? U tele ku ta hi xanisa, na ci nga se chikela cikhati ci yimisilweko?”
30 Hi le kulenyana ku wa hi ni ntlhambi wa makhumba wu nga kari wu risiwa.
31 Hikwalaho a madhimoni ma no mu khongotela, maku: “Loku u hi hlongola, hi rumele ntlhambini wa makhumba.”
32 Yena aku ka wona: “Fambani!” Zvalezvo ma no huma ma ya nghena ka makhumba. A ntlhambi wontlhe wu no tsutsuma wu ya wela bimbini wu fela lomo.
33 Kanilezvi a varisi va makhumba va no tsutsuma vaya dhoropeni va ya hlawutela zvontlhe, a ku patsa ni mahungu ya vavanuna lava va nga hi ni madhimoni.
34 Makunu a vanhu vontlhe va lomu dhoropeni va no huma va ya tlhangana na Jesu. Laha va nga mu wona, va no mu kombela lezvaku a suka tikweni gabye.
Mitlhamuselo ya lahasi
^ Kutani: “basise”.
^ Kutani: “Basisiwa”.
^ Kutani: “lotela”.
^ Kutani: “zvidhula”.
^ Kutani: “mabyandlati; mavimbi”.
