Matewu 9:1-38
-
Jesu a hanyisa wanuna a nga kala a nga zvi koti ku famba (1-8)
-
Jesu a vitana Matewu (9-13)
-
Va wutisa Jesu hi mhaka ya ku hlambanya ku tshama va ngagi nchumu (14-17)
-
Nhanyana wa Jayiro; wasati a henya nguwo ya Jesu (18-26)
-
Jesu a hanyisa zvikhumu ni munhu wo kala ku wulawula (27-34)
-
A kutshovela ka hombe kanilezvi a vatiri va tsongwani (35-38)
9 Jesu i no nghena ngalaveni a tlhatuka bimbi aya dhoropeni gakwe.
2 Makunu ku nota vanhu vo kari ni wanuna a nga kala a nga zvi koti ku famba, a nga latilwe laha ka lihlaka.* Na a wona a kukholwa kabye, Jesu i no byela a wanuna loyi a nga kala a nga zvi koti ku famba, aku: “U nga chavi n’wananga! A zviwonho zva wena zvi tsetselelwe.”
3 Laha va nga wona lezvo, a vatsali vo kari va no wula timbilwini tabye, vaku: “Inaloyi wa rukatela.”
4 Jesu, na a tiva maalakanyo yabye, i te ngalo: “Hikuyini mu alakanyako zvilo zvo biha timbilwini ta n’wina?
5 Hi cihi ci olovako? Ku wula ku: ‘A zviwonho zva wena zvi tsetselelwe’, kutani ku: ‘Suka u famba’?
6 Kanilezvi kasi mu tiva lezvaku a N’wana wa munhu i na ni ntamu laha misaveni wa ku tsetselela zviwonho . . .”, i no byela loyi a nga kala a nga zvi koti ku famba, aku: “Suka u yima, u teka lihlaka* la wena u famba kaya.”
7 I no suka a yima a khoma ndlela aya kaya.
8 Laha a citshungu ci nga wona lezvo ci no chava nguvhu ci dhumisa Nungungulu, loyi a nyikileko vanhu a ntamu lowo.
9 Na a sukile laho, i no wona a wanuna a vitaniwako ku hi Matewu na a tshamile laha ku hakhelwako mikhupo, aku kakwe: “Ndzi landzele.” Zvalezvo i no suka a mu landzela.
10 Hi ndzhako ka cikhati, na a kari aga* mutini wa Matewu, ku nota vakhupisi vo tala ni vawonhi va taga* na Jesu ni vapizani vakwe.
11 Kanilezvi laha a vaFarisi va nga wona lezvo va no wutisa a vapizani vakwe, vaku: “Hikuyini a mugondzisi wa n’wina a gako ni vakhupisi ni vawonhi ke?”
12 Loku Jesu a va zwile, i te ngalo kabye: “Lava va kalako va nga babyi a va lavi dhokodhela, kanilezvi lava va babyako va mu lava.
13 Fambani, mu ya gondza ku zvi wula yini ku: ‘Ndzi randza wuxinji, na ku nga hi miphahlo.’ Hakuva a ndzi telangi ku ta vitana valulamileko, kanilezvi ndzi tele vawonhi.”
14 A vapizani va Johani va nota kakwe va ta mu wutisa, vaku: “Hikuyini hina ni vaFarisi hi tako na hi hlambanya ku tshama hi ngagi nchumu* kanilezvi a vapizani va wena va nga mahi?”
15 Jesu i te ngalo kabye: “A vanghana va noivho a va rili loku ya ha hi zvin’we navo, a hi zvona ke? Kanilezvi cata cikhati leci va to tekelwa a noivho, hi kona va to hlambanya ku tshama va ngagi nchumu.*
16 A nga kona a tsemako nguwo ya yiswa a yi rungela kota ciziva ka nguwo ya kale hakuva a ciziva leco ci ta dungurula a nguwo leyo ci engetela ku handzula.
17 A nga kona kambe a chelako vhinyo ya yiswa ka mikwama* ya kale. Hakuva loku a maha lezvo, a mikwama yi ta phuxuka, a vhinyo yi halaka ni mikwama ya kona yi wonheka. Kanilezvi va chela vhinyo ya yiswa ka mikwama ya yiswa kasi zvontlhe zvi hlayiseka.”
18 Na a ha va byela a zvilo lezvi, ku no chikela hosana yo kari yi mu khizamela, yiku: “Ka cikhati leci ndzi alakanya ku a nhanyana wa mina i file, kanilezvi tana le kaya u ta mu tlhateka mandla, i ta vhuka.”
19 Jesu ni vapizani vakwe va no suka va famba naye.
20 A wasati wo kari a nga xaniseka hi mababyi yo huma nkhata a 12 wa malembe i no xiyelela hi lendzhako ka Jesu a ta henya machakafula ya nguwo yakwe,
21 hakuva i wa wula lezvi mbilwini yakwe: “Loku ndzo kota ku henya a nguwo yakwe basi, ndzi ta hanya.”
22 Jesu i no hundzuluka, laha a nga mu wona i te ngalo kakwe: “U nga chavi n’wananga! A kukholwa ka wena ku ku hanyisile.” Zvalezvo a wasati loye i no hanya.
23 Makunu a cikhati leci Jesu a nga chikela mutini wa hosana leyo, a wona vabi va zvitoliya ni citshungu na ci rila nguvhu,
24 i te ngalo: “Humani lomu ndlwini hakuva a cinhanyetana leci a ci fangi kanilezvi ci no etlela.” Laha va ngazwa lezvo va no mu hleka.
25 Zvalezvi a citshungu ci nga humesiwa ciya handle, i no nghena lomu ndlwini a khoma a canjana ga cona, a cinhanyetana ci se vhuka.
26 Kunene, a mhaka leyi yi no hangalaka tikweni gontlhe.
27 Loku Jesu a sukile laho, a vavanuna vambiri va zvikhumu va no mu landzela na va banguleka, vaku: “N’wana Dhavhidha, hi mahele wuxinji.”
28 Makunu na a chikele mutini, a zvikhumu lezvo zvi nota kakwe, yena aku ka zvona: “Ma kholwa lezvaku ndzi nga mu hanyisa?” Vaku kakwe: “Ina Hosi.”
29 Makunu i no henya matihlo yabye aku: “Kota lezvi mu kholwako, a zvi maheke ka n’wina.”
30 A matihlo yabye ma no vhululeka. Kanilezvi Jesu i no va laya nguvhu, aku: “Mu nga byeli munhu a mhaka leyi.”
31 Kanilezvi, loku va sukile hi laho, va no wulawula hi Jesu tikweni lego gontlhe.
32 A cikhati leci va nga ha suka hi laho, ku nota vanhu ni wanuna wo kari wo kala ku wulawula a nga hi ni dhimoni.
33 Andzhako ka loku Jesu a hlongolile dhimoni lego, a wanuna loye i no sangula ku wulawula. Kwalaho a citshungu ci no hlamala, ciku: “A hi se tshuka hi wona zvilo zvo kota lezvi lomu Izrayeli.”
34 Kanilezvi a vaFarisi va waku: “I hlongola madhimoni hi ntamu wa hosi ya madhimoni.”
35 Jesu i no fambafamba madhoropeni wontlhe ni zvidhoropaneni a gondzisa masinagogeni yabye, na a chumayela a mahungu ya ma nene ya Mufumo, ni ku hanyisa a vanhu ka mababyi ya tixaka tontlhe ni tinghumbe ta tixaka tontlhe.
36 Laha a nga wona citshungu, i no ci zwela wusiwana hakuva va wa xaniseka ni ku pepetseka a ku khwatsi tiyivhu to kala murisi.
37 Aku ka vapizani vakwe: “A ntiro wa kutshovela wa hombe, kanilezvi a vatiri va tsongwani.
38 Hikwalaho, kombelani a N’winyi wa ntiro lezvaku a rumela vatiri kutshoveleni kakwe.”
Mitlhamuselo ya lahasi
^ Kutani: “maka; citatara”.
^ Kutani: “maka; citatara”.
^ Kutani: “na a tshamile mezeni”.
^ Kutani: “va ta tshama mezeni”.
^ Kutani: “jejuwara; pfhunga”.
^ Kutani: “va to jejuwara; va to pfhunga”.
^ Kutani: “tinghotso to mahiwa hi mabhebhe”.
