Mitiro 1:1-26
1 Teyofilu, ka bhuku go ranga, ndzi tsalile zvontlhe lezvi Jesu a nga maha ni ku gondzisa
2 kala ka siku legi a nga tekiwa aya tilweni, andzhako ka ku nyika zvileletelo na a rangelwa hi moya wo basa ka vapostoli lava a nga va hlawulile.
3 Andzhako ka ku xaniseka, i no woneka kabye makhati yo tala kasi va kholwa lezvaku hakunene wa hanya. Va no mu wona hi 40 wa masiku, a wulawula hi Mufumo wa Nungungulu.
4 Na a ha tlhangene navo, i no va laya aku: “Mu nga suki Jerusalema, kanilezvi tshamani mu rindzela lezvi Papayi a zvi tsumbisileko, lezvi mu zvi zwileko ka mina;
5 hakuva Johani i bhabhatisile hi mati, kanilezvi n’wina mu ta bhabhatiswa hi moya wo basa andzhako ka masiku ma tsongwani.”
6 Makunu laha va nga tlhangene kambe, va no mu wutisa, vaku: “Hosi, u ta tlhelisela a mufumo ka Izrayeli zvalezvi ke?”
7 Aku kabye: “A zvi lumbi n’wina a ku tiva zvikhati kutani tinguva leti Papayi a ti yimisileko.*
8 Kanilezvi, mu ta nyikiwa ntamu a cikhati leci a moya wo basa wu tota hehla ka n’wina; niku mu tava vakustumunyu va mina laha Jerusalema, ni Judhiya gontlhe, ni Samariya, kala magemeta-musi ya misava.”
9 Loku a wulile timhaka leti, i no tlakuselwa tilweni na va kari va mu cuwukela, ni refu gi no mu fihla va nga ha mu woni.
10 Na va ha cuwukile hehla, yena na a kari a famba, hi citshuketi ku no ta yima vavanuna vambiri kusuhani navo na va bohile tinguwo to basa,
11 vaku: “Vavanuna va le Galileya, hikuyini mu yimileko laha mu cuwuka tilweni? Jesu loyi a nga tekiwa ka n’wina a tlakukela tilweni i ta wuyisa zvalezvi mu nga mu wonisa zvona na aya tilweni.”
12 Andzhako ka lezvo, va no suka Citsungeni ca maOlivha, leci ci nga kusuhani ni Jerusalema, ka pfhuka wa cipimo ca kilometro yin’we,* va tlhela Jerusalema.
13 Loku va chikele, va no noma vaya saleni ya le hehla, laha va nga kari va tshama kona. Ku wa hi na Pedro zvin’we na Johani, na Jakobe, na Andrewu, na Filipu, na Tomasi, na Bhartolomewu, na Matewu, na Jakobe n’wana Alfewu, na Simoni a mupinyami, na Judhasi n’wana Jakobe.
14 Vontlhe va no simama ku khongela hi mbilu yin’we zvin’we ni vavasati vo kari, na Mariya a mamani wa Jesu, ni vamakabye va Jesu.
15 Ka masiku lawo, Pedro i no suka a yima cikari ka vamakabye, (lava va nga hi laho va wa hi cipimo ca 120 wa vanhu) aku:
16 “Vamakabye, zvi wa laveka lezvaku a mitsalo yi tatiseka, ku nga lezvi a moya wo basa wu zvi phrofetileko hi nomu wa Dhavhidha xungetano hi Judhasi, loyi a ngava murangeli wa lava va nga khoma Jesu.
17 Hakuva i wa hlayilwe zvin’we na hina, ava ni ciavelo ntirweni lowu.
18 (Hikwalaho, a wanuna loyi, i no xava a simu hi hakhelo ya kubiha, awa hi hloko, a miri wakwe wu pswhandleka,* ni marumbu yakwe wontlhe ma kubuka.
19 A mhaka leyi yi no tiviwa hi vahanyi vontlhe va Jerusalema. Hikwalaho, a petso lowo wu no vitaniwa ku i Akeldhama hi lirimi labye, zvi wulako ku: “Petso wa Nkhata.”)
20 Hakuva bhukwini ga Tisimu ku tsalilwe lezvi: ‘A muti wakwe a wu mahe rumbi, ku nga ha tshami munhu ka wona, niku a ntiro wakwe wa kuwonelela a wu tekiwe hi mun’wani.’
21 Hikwalaho, ka vavanuna lava va nga kari va fambafamba na hina contlhe cikhati leci Hosi Jesu a nga maha mitiro yakwe* cikari ka hina,
22 kusukela loku a bhabhatisilwe hi Johani kala ka siku legi a nga tekiwa cikari ka hina aya tilweni, ku laveka lezvaku a mun’we wabye ava kustumunyu zvin’we na hina wa kuvhuka kakwe.”
23 Hikwalaho va no hlawula vambiri, ku nga Josefa loyi a vitaniwako ku hi Bharsabha, a nga vitaniwa kambe ku hi Justusi, na Matiyasi.
24 Hi kulandzela va no khongela vaku: “O, Jehovha, wena loyi u tivako a timbilu ta vontlhe, komba ku himani u mu hlawulileko cikari ka vavanuna lava va vambiri
25 lezvaku a amukela ntiro ni cikhundla ca wupostoli, lezvi Judhasi a zvi tsikileko aya ka wutshamu go tivana na yena n’winyi.”
26 Hikwalaho, va noba tihlolo, a hlolo yi se khoma Matiyasi. Makunu i no hlayiwa* zvin’we ni vapostoli lava va 11.
Mitlhamuselo ya lahasi
^ Hi kukongoma: “a ti vekileko mandleni yakwe”.
^ Kutani: “pfhuka wa ku famba hi sabhadho”. I pfhuka lowu a muJudha a nga vhumelelwa ku famba hi siku ga sabhadho.
^ Kutani: “pandzeka hi laha cikari”.
^ Hi kukongoma: “a nga nghena ni ku huma”.
^ Zvi wulako ku i wa woniwa ku khwatsi hi lava va 11.
