Mitiro 10:1-48
10 Le Khezariya ku wa hi ni wanuna a vitaniwako ku hi Korneliyu, a nga hi hosana ya masochwa* ya ntlawa wu nga vitaniwa ku i butho ga Italya.*
2 I wa hi munhu wo pinyama, a nga chava Nungungulu, yena ni vontlhe va ngango wakwe. I wa vhuna nguvhu zvisiwana, niku i wa khongela ka Nungungulu a nga tsiki.
3 Ka siku go kari, kwalomu ka ma 15 hora,* i no wona muwoniso wa ngilozi ya Nungungulu yi ngata kakwe, yi taku: “Korneliyu!”
4 Korneliyu i no yi cuwukisisa, na a rurumela hi kuchava, a wutisa aku: “Zvini Hosi?” A ngilozi yiku kakwe: “A mikhongelo ya wena ni kuhana ka wena zvi chikele ka Nungungulu, niku i zvi hlayisile maalakanyweni yakwe.
5 Hikwalaho ruma vavanuna vaya le Jopa va ya vitana Simoni loyi a vitaniwako ku hi Pedro.
6 A wanuna loyi i endzele mutini wa Simoni, a mufuki wa mabhebhe, wu nga mbhirini ya bimbi.”
7 Zvalezvi a ngilozi leyi yi nga wulawula naye yi nga famba, Korneliyu i no vitana malandza yakwe ya mambiri ni musochwa wo chava Nungungulu cikari ka lava va nga mu tirela,
8 a ta va hlawutela zvontlhe a gumesa a va ruma vaya Jopa.
9 Hi mandziko wa kona, na va ha simama ku famba na va tshinela dhoropeni, Pedro i no kandziha hehla ka yindlu kwalomu ka ma 12 hora* a ya khongela.
10 Kanilezvi i nozwa ndlala ya hombe a lava zvakuga. Na va ha longisela zvakuga, i no mahisa ku khwatsi o lora
11 a wona tilo na gi vhululekile, ku relela nchumu* wo fana ni nguwo ya hombe ya wukene* yita misaveni, na yi chisiwa hi mune wa tichoka;*
12 ka nguwo leyo ku wa hi ni tixaka tontlhe ta zvihari zva mune wa minenge ni zvikokakoka* zva misava ni zvinyanyani zva tilo.
13 Ku no zwala gezu, giku kakwe: “Pedro, vhuka u daya uga!”
14 Kanilezvi Pedro aku: “Ahihi Hosi yanga, hakuva cima a ndzi sega cilo co nyenyeza ni ci nga hlazvekangiko.”
15 A gezu gi no engeta giku kakwe, hi khati ga wumbiri: “Tsika ku wula lezvi Nungungulu a zvi basisileko uku zvi nyenyezile.”
16 A zvilo lezvi zvi no maheka kambe hi khati ga wunharu. Zvalezvo a nguwo* leyo yi no kokelwa tilweni.
17 Laha Pedro a nga ha jujekile kupima hi lezvaku wu wula yini a muwoniso lowu a wu wonileko, a vavanuna lava va nga rumilwe hi Korneliyu va no wutisa ku wu kwihi muti wa Simoni, va nyima laha nyangweni.
18 Va no vitana wokari mutini lowo va mu wutisa lezvaku Simoni loyi a vitaniwako ku hi Pedro i endzele laho ke.
19 Pedro na a ha gayela muwoniso lowo, a moya wu te ngalo: “Ku na ni vavanuna vanharu va ku lavako.
20 Hikwalaho, suka, u chika, u famba navo na u nga kanakani, hakuva hi mina ndzi nga va ruma.”
21 Pedro i no chika aya ka vavanuna lavo a yaku ngalo: “Hi mina a wanuna loyi mu mu lavako. I mhaka muni mu yi tisako?”
22 Vaku: “Korneliyu, a hosana ya masochwa, a nga munhu wo lulama a chavako Nungungulu, loyi a dzundziwako hi vaJudha vontlhe, i nyikilwe zvileletelo zva Nungungulu hi ngilozi yo basa zva ku ku vitanisa mutini wakwe kasi a tazwa lezvi u lavako ku wula.”
23 Hikwalaho, i no va amukela ndlwini kasi va etlela laho.
Loku gi cile, i no suka a famba navo. A vamakabye vo kari va le Jopa va no mu pangalata.
24 Hi mandziko wa kona i no chikela Khezariya. Kunene, Korneliyu i wa va rindzele na a rambile maxaka yakwe ni vanghana lava a nga va randza nguvhu.
25 Laha Pedro a nga nghena, Korneliyu i no mu khinga a yawa mikondzweni yakwe, a mu khizamela.
26 Kanilezvi Pedro i no mu vhuxa aku: “Suka u yima; minawu ndzi munhu wo kota wena.”
27 Laha Pedro a nga kari a wulawula naye, i no nghena a kuma vanhu vo tala na va hlengeletene.
28 Aku kabye: “Ma zvi tiva lezvaku a muJudha a nga faneli ku gelana ni wamatiko kutani ku tshinela kakwe, hambulezvo Nungungulu i ndzi kombile lezvaku a ndzi faneli ku wula munhu lezvaku i nyenyezile kutani a nga hlazvekangi.
29 Hikwalaho, laha ndzi nga vitaniwa, ndzi nota na ndzi nga kanakani. Makunu, ndza wutisa ku mu ndzi vitanela yini.”
30 Korneliyu aku: “Ka mune wa masiku ma hundzileko, hi cikhati caleci ca ma 15 hora* ndzi wa kari ndzi khongela lomu ndlwini ya mina. Hi citshuketi ku no yima wanuna mahlweni ka mina a nga bohile tinguwo to ngangamela,
31 aku: ‘Korneliyu, a mukhongelo wa wena wu zwilwe ni kuhana ka wena ku maalakanyweni ya Nungungulu.
32 Hikwalaho, rumela vanhu le Jopa va ya vitana Simoni loyi a vitaniwako ku hi Pedro. A wanuna loye i le mutini wa Simoni, a mufuki wa mabhebhe, wu nga mbhirini ya bimbi.’
33 Makunu ndzi no tekela ku ku vitanisa. U mahile khwatsi hi lezvi u tileko. Hontlheni hi kona laha mahlweni ka Nungungulu kasi kuzwa zvontlhe lezvi Jehovha a ku layileko a kuva u zvi wula.”
34 Pedro i no vhulula nomu wakwe, aku: “Makunu ndza zvi wona lezvaku hakunene Nungungulu a nga na cihlawulela,
35 kanilezvi ka tixaka tontlhe loyi a mu chavako ni ku maha zvo lulama wa amukeleka kakwe.
36 I no rumela mhaka ka vana va ka Izrayeli hi ku kanela kabye a mahungu ya ma nene ya kurula ha Jesu Kristu, loyi a nga Hosi ya vontlhe.
37 N’wina ma yi tiva a mhaka leyi ku wulawulilweko hi yona Judhiya gontlhe, kusukela Galileya andzhako ka kubhabhatisa loku Johani a ku chumayeleko, yaku:
38 Nungungulu i no tota Jesu wa le Nazareta hi moya wo basa ni ntamu, a fambafamba lomu tikweni a maha zvilo zva zvi nene ni ku hanyisa vontlhe lava va nga xanisiwa hi Sathani,* hakuva Nungungulu i wa hi zvin’we naye.
39 Hina hi vakustumunyu va zvontlhe lezvi a zvi mahileko tikweni ga vaJudha ni le Jerusalema; kanilezvi va no mu daya hi ku mu hayeka mhandzeni.*
40 Kanilezvi Nungungulu i no mu vhuxa hi siku ga wunharu a mu tsika a woneka,
41 na ku nga hi ka vanhu vontlhe, kanilezvi ka vakustumunyu lava Nungungulu a sinako a va yimisile, ku nga hina, lava hi gileko ni kunwa zvin’we naye andzhako ka loku a vhuxilwe hi ka vafileko.
42 Ahandle ka lezvo, i no hi laya lezvaku hi chumayela vanhu ni ku nyika wukustumunyu go mbhelela ga lezvaku hi yena a yimisilweko hi Nungungulu a kuva mulamuli wa vahanyako ni vafileko.
43 Hi yena loyi a vaphrofeti vontlhe va mu mahelako wukustumunyu ga lezvaku ni wihi loyi a kholwako kakwe i ta tsetselelwa zviwonho vitweni gakwe.”
44 Pedro na a ha wulawula timhaka leti, a moya wo basa wu no relela hehla ka vontlhe lava va nga kari vazwa mhaka.
45 A makholwa* ma mahilweko wukwera* lawa ma nga tile na Pedro ma no hlamala hi lezvi a vamatiko vonawu va nga chululelwa a cinyikiwo ca moya wo basa.
46 Hakuva va no vazwa na va wulawula hi tirimi timbe, va dhumisa Nungungulu. Pedro i no hlamula aku:
47 “A vanhu lava va amukele a moya wo basa a ku fana na hina. I kona a nga va tsonako mati, a va vhalela ku bhabhatiswa ke?”
48 Hikwalaho i no laya lezvaku va bhabhatiswa vitweni ga Jesu Kristu. Andzhako ka lezvo, va no mu kombela lezvaku a tshama navo masiku yo kari.
Mitlhamuselo ya lahasi
^ Kutani: “hosana ya zana”, yi nga rangela a 100 wa masochwa.
^ Butho ga 600 wa masochwa ya Roma.
^ Hi kukongoma: “hora ya wu 9”.
^ Hi kukongoma: “hora ya wu 6”.
^ Hi kukongoma: “cibya”.
^ Kutani: “linyo”.
^ Kutani: “mixulo”.
^ Kutani: “zviharana zvo famba hi rumbu”.
^ Hi kukongoma: “cibya”.
^ Hi kukongoma: “hora ya wu 9”.
^ Hi ciGreki: di·á·bo·los, zvi wulako ku “mulumbeti”.
^ Kutani: “sinyeni”.
^ Kutani: “vatsumbekileko”.
^ Kutani: “kinisilweko ngoma; sirkusizawu; tlulisilweko ngoma”.
