Mitiro 13:1-52
13 Le bandleni ga Antiyokiya ku wa hi ni vaphrofeti ni vagondzisi, va nga lava: Bharnabhasi, na Simeyoni a nga vitaniwa ku hi Nijeri, na Lukiyusi wa le Kirene, na Manayeni a nga gondzile na Herodhi, a adhimistradhori wa dhistrito, na Sawule.
2 Laha va nga kari va tirela Jehovha na va hlambanyile ku tshama va ngagi nchumu,* a moya wo basa wu no va byela, wuku: “Ndzi hlawuleleni Bharnabhasi na Sawule kasi va maha a ntiro lowu ndzi va vitaneleko wona.”
3 Andzhako ka ku hlambanya ku tshama va ngagi nchumu* na va kari va khongela, va no va tlhateka mandla va va tsika va famba.
4 Hikwalaho a vavanuna lava va nga rumilwe hi moya wo basa, va no relela vaya Selukiya, va suka hi seyo vaya Kupero hi ngalava.
5 Loku va chikele Salami, va no sangula ku kanela a mhaka ya Nungungulu masinagogeni ya vaJudha. Johani i wa hi zvin’we navo a va vhunetela.
6 Laha va nga tsemakanyile cihlale* contlhe kala Pafosi, va no kumana ni muJudha a vitaniwako ku hi Bhar-Jesu, a nga hi muloyi ni muphrofeti wa mawunwa.
7 I wa hi na govhernadhori Serjiu Pawulusi, a munhu wo tlhariha. Serjiu Pawulusi i no vitana Bharnabhasi na Sawule hakuva i wa zvi lava nguvhu kuzwa mhaka ya Nungungulu.
8 Kanilezvi Elima* (zvi wulako ku muloyi) i no va vhukela, a zama ku betela govhernadhori lezvaku a nga kholwi.
9 Makunu Sawule, loyi kambe a vitaniwako ku hi Pawule, i no tala hi moya wo basa a mu cuwukisisa khwatsi,
10 aku kakwe: “Wena u teleko hi tixaka tontlhe ta kukanganyisa ni kubiha kontlhe, n’wana wa Sathani,* wena nala wa zvontlhe zvo lulama, u nga ta tsika ku gombonyokisa a tindlela to lulama ta Jehovha ke?
11 A canja ga Jehovha gi hehla ka wena, u tafa matihlo, u nga woni gambo hi cikhati co kari.” Zvalezvo i no welwa hi hunguva ya hombe ni munyama, a sangula ku phiphitela* na a lava wa ku mu khoma hi woko.
12 A cikhati leci govhernadhori a nga zvi wona, i no kholwa hakuva i wa hlamaliswa nguvhu hi lezvi a nga gondza hi Jehovha.
13 Pawule ni vanghana vakwe va no suka Pafosi hi ngalava vaya Perga wa Panfiliya. Kanilezvi Johani i no va siya a tlhela Jerusalema.
14 Hambulezvo va no suka Perga vaya Antiyokiya wa Pizidhiya. Va no nghena sinagogeni hi siku ga sabhadho va tshama.
15 Loku ku lerilwe a Nayo ni Vaphrofeti, a varangeli va sinagoga va no va nyiketa gezu vaku: “Vamakabye, loku mu hi ni gezu ga ku tiyisa vanhu, wulani.”
16 Hikwalaho Pawule i no suka a yima, a va miyeta hi woko, aku:
“Vanana va ka Izrayeli na n’wina lava mu chavako Nungungulu, ndzi ingiseleni.
17 A Nungungulu wa va ka Izrayeli i hlawulile vakokwani va hina, a va tlakusa na va ha hanya kota valuveli tikweni ga Gibhite, a tlhela a va humesa ka gona hi woko gakwe ga ntamu.
18 I no timisela ha vona lomu ciwuleni a 40 wa malembe.
19 Andzhako ka loku a lovisile a 7 wa tixaka tikweni ga Khanani, i no va nyika tiko lego lezvaku giva tshomba yabye.
20 Zvontlhe lezvi zvi mahekile ndzeni ka 450 wa malembe.
“Andzhako ka lezvo, i no va nyika valamuli kala ka muphrofeti Samuweli.
21 Kanilezvi hi ndzhako ka cikhati, va no londza hosi, hikwalaho Nungungulu i no va nyika Sawule, a n’wana wa Kixi wa lixaka la ka Bhenjamini, a va fumela a 40 wa malembe.
22 Kanilezvi i no gumesa a mu susa, a yimisa Dhavhidha lezvaku ava hosi yabye, loyi Nungungulu a nga mu kustumunyela, aku: ‘Ndzi kumile Dhavhidha, n’wana wa Jese, a munhu a tsakisako mbilu ya mina; yena i ta maha zvontlhe lezvi ndzi zvi lavako.’
23 Kota lezvi a nga zvi tsumbisile, hi ka pswalo* wa wanuna loyi, Nungungulu i no humesela Izrayeli a muhanyisi, a nga Jesu.
24 Na a nga se chikela a muhanyisi loye, Johani i no chumayela vanhu vontlhe va ka Izrayeli xungetano hi kubhabhatisa kota cikombiso ca kutisola kabye.
25 Kanilezvi laha Johani a nga kari a mbhetisa ntiro wakwe, i waku: ‘Mu alakanya ku hi mina mani? A hi mina loyi mu mu alakanyako. Kanilezvi ku na ni Loyi a tako andzhako ka mina, wa ku ne a ndzi ringanelwi hi ku tlhatlha tingoti ta zvilato* zvakwe.’
26 “Vamakabye, n’wina vana va Abrahama na n’wina lava mu chavako Nungungulu, a mhaka leyi ya kuhanyiswa yi rumelwe ka hina.
27 Hakuva a vahanyi va Jerusalema ni tihosi tabye a va mu amukelangi, kanilezvi a cikhati leci va nga mu lamula va no tatisa lezvi zvi nga wulilwe hi Vaphrofeti, zvi nga zvalezvi zvi gondziwako ka masabhadho wontlhe.
28 Hambu lezvi va nga vhumala nandzu wu ringanako ku a dawa, va no kurumeta Pilatu lezvaku a laya ku a dawa.
29 Laha va nga tatisile zvontlhe lezvi zvi tsalilweko xungetano hi yena, va no mu chisa laha mhandzeni* va mu lata cilahleni.
30 Kanilezvi Nungungulu i no mu vhuxa hi ka vafileko,
31 a woneka masiku yo tala ka lava va nga sukile naye hi Galileya kala Jerusalema. Lava hi vona va mu mahelako wukustumunyu cikari ka vanhu.
32 “Hikwalaho, ha kanela ka n’wina a mahungu ya ma nene ya citsumbiso leci ci mahilweko ka vakokwani.
33 Nungungulu i tatisile citsumbiso leci ka hina vana vabye hi ku vhuxa Jesu; kota lezvi zvi tsalilweko ka lisimu la wumbiri zvaku: ‘Wena u n’wana wa mina ndzi ku pswalileko nyamutlha.’
34 A mhaka leyi ya ku Nungungulu i mu vhuxile hi ka vafileko na a hi ni miri wu kalako wu nga hafi ne ku hina, i yi wulisile lezvi: ‘Ndzi ta mu nyika makatekwa lawa ndzi tsumbisileko Dhavhidha hi kota ya lirandzo la mina. A makatekwa lawo ma tata futsi.’
35 Ka lisimu lin’wani ku tsalilwe lezvi: ‘U nga ta tsika a tsumbekileko wa wena a hina.’
36 Makunu Dhavhidha i no tirela Nungungulu kuhanyeni kakwe, afa a tlhela a lahliwa zvin’we ni vakokwani vakwe, a gumesa a hina.
37 Kanilezvi loyi Nungungulu a nga mu vhuxa hi ka vafileko a nga hinangi.
38 “Hikwalaho vamakabye, zvi tiveni lezvaku Nungungulu i ta tsetselela zviwonho zva n’wina hi kufa ka munhu loyi. Lezvi hi zvona hi kanelako ka n’wina.
39 Niku hi kota ya munhu loyi, ni wihi loyi a kholwako a nga tava ni nandzu ka zvontlhe lezvi a Nayo wa Mosi wu nga mu nyika nandzu ka zvona.
40 Hikwalaho, ti woneleni kasi lezvi zvi wuliwako lomu ka Vaphrofeti zvi nga maheki ka n’wina:
41 ‘N’wina vatseketseli, cuwukani mu hlamala mu tlhela mu lova, hakuva masikwini ya n’wina, ndzi maha ntiro lowu mu to kala ku wu kholwa hambu loku mu byeliwa.’”
42 Laha va nga kari va huma, a vanhu va no va khongotela lezvaku va wuya kambe hi sabhadho gi nga landzela va ta kanela timhaka leti.
43 Hikwalaho, a cikhati leci a mutlhangano wu nga mbhela lomu sinagogeni, a vaJudha vo tala ni vaprozelite* lava va nga khozela Nungungulu, va no landzela Pawule na Bharnabhasi. Makunu Pawule na Bharnabhasi va no wulawula navo, va va khongotela lezvaku va simama tipswalweni ta Nungungulu.
44 Ka sabhadho gi nga landzela, zvi woya hi ku khwatsi a dhoropa gontlhe gi no hlengeletana kasi kuzwa a mhaka ya Jehovha.
45 A cikhati leci a vaJudha va nga wona citshungu, va no tala hi ciluse va kaneta lezvi Pawule a nga kari a wula, na va rukatela.
46 Hikwalaho Pawule na Bharnabhasi va no va hlamula hi kutiya vaku: “Zvi wa laveka lezvaku a mhaka ya Nungungulu yi kanelwa ka n’wina kuranga, kanilezvi kota lezvi mu yi alako, hi taya ka vamatiko, hakuva mu komba lezvaku a mu ringanelwi hi wutomi ga pindzukelwa.
47 Hakuva Jehovha i hi layile aku: ‘Ndzi ku yimisile kota kuwonekela ka vamatiko, kasi u yisa kuhanyisa kala magemeta-musi ya misava.’”
48 A cikhati leci a vamatiko va ngazwa lezvo, va no tsaka va dhumisa a mhaka ya Jehovha; vontlhe lava a timbilu tabye ti nga longile ku amukela lisine li yisako wutomini ga pindzukelwa va no kholwa.
49 Ahandle ka lezvo, a mhaka ya Jehovha yi no hangalaka tikweni gontlhe.
50 Kanilezvi a vaJudha va no kucetela vavasati va dhumileko vo chava Nungungulu ni tihosana ta dhoropa lezvaku va vhukela Pawule na Bharnabhasi, va va hlongola tikweni gabye.
51 Hikwalaho, va no phuhuna lithuri mikondzweni yabye mahlweni kabye va suka laho vaya Ikoniyume.
52 A vapizani va no simama ku tsaka ni ku tala hi moya wo basa.
Mitlhamuselo ya lahasi
^ Kutani: “na va jejuwara; na va pfhunga”.
^ Kutani: “Andzhako ka ku jejuwara; Andzhako ka ku pfhunga”.
^ Kutani: “cilundzo ca mati; ilha”.
^ Elima loyi hi yaloyi a wuliwako ku hi Bhar-Jesu ka vhesi 6.
^ Hi ciGreki: di·á·bo·los, zvi wulako ku “mulumbeti”.
^ Kutani: “phuphutela; hulumetela”.
^ Hi kukongoma: “mbewu”.
^ Hi kukongoma: “masandalya”.
^ Kutani: “sinyeni”.
^ Kutani: “lava va nga hundzuluka va maha vaJudha”.
