Mitiro 15:1-41
15 Ku no relela vavanuna vo kari hi le Judhiya va ta sangula ku gondzisa vamakabye, vaku: “Loku mu nga mahiwi wukwera* kota lezvi wu wulako a nayo wa Mosi, mu nga ta hanyisiwa.”
2 Kanilezvi, laha Pawule na Bharnabhasi va nga phikizene ni ku kanetisana nguvhu navo, a vamakabye va no hlawula Pawule na Bharnabhasi ni van’wani lezvaku va yisa mhaka leyi ka vapostoli ni madhota le Jerusalema.
3 Andzhako ka loku a bandla gi va heleketile kutsongwani, va no tsemakanya hi Fenikiya ni Samariya na va hlawutela zvontlhe lezvi a vamatiko va nga hundzulukisa zvona. A vamakabye vontlhe va no tsaka nguvhu laha va ngazwa lezvo.
4 Laha va nga chikela Jerusalema, a bandla ni vapostoli ni madhota va no va amukela khwatsi, va hlawutela zvontlhe lezvi Nungungulu a zvi mahileko hi ku tirisa vona.
5 Kanilezvi a makholwa lawa a kale ma nga hi vaFarisi, ma no suka ma yima, maku: “Ku laveka ku va mahiwa wukwera* va tlhela va layiwa lezvaku va ingisa a Nayo wa Mosi.”
6 Hikwalaho a vapostoli ni madhota va no tlhangana kasi ku hlola mhaka leyi.
7 Loku va phikizene hi cikhati co leha hi mhaka leyi, Pedro i no suka a yima, aku kabye: “Vamakabye, n’wina ma zvi tiva lezvaku Nungungulu i ndzi hlawulile kale cikari ka n’wina, kasi a vamatiko vazwa a mahungu ya ma nene hi nomu wa mina, va kholwa.
8 Nungungulu loyi a tivako timbilu i kombile lezvaku wa va amukela hi ku va nyika moya wo basa a ku khwatsi hi lezvi a mahileko ka hinawu.
9 I kombile ku hina na vona ha fana, a basisa timbilu tabye hi kota ya lezvi va nga kholwa.
10 Makunu hikuyini n’wina mu ringako Nungungulu hi ku tlhateka kanga tinhan’wini ta vapizani, lowu a vakokwani va hina ne hambu hina hi nga kala ku zvi kota ku wu rwala ke?
11 Kanilezvi hina ha kholwa lezvaku hi ta hanyiswa hi tipswalo ta Hosi Jesu a ku fana na vona.”
12 Laha va ngazwa lezvo, vontlhe va no miyela va ingisela Bharnabhasi na Pawule na va hlawutela a zviwoniso ni zvihlamaliso zvo tala lezvi Nungungulu a zvi mahileko ka vamatiko hi ku tirisa vona.
13 Loku va mbhetile ku wulawula, Jakobe i te ngalo: “Vamakabye, ndzi ingiseleni.
14 Kota lezvi hi zvi zwileko, Simeyoni* i hlawutele lezvi Nungungulu a nga va alakanyisa zvona vamatiko, a sangula ku hlawula vanhu cikari kabye lava va to vitaniwa hi vito gakwe.
15 A timhaka leti, ta zwanana ni magezu ya vaphrofeti, yaku:
16 ‘Andzhako ka zvilo lezvi ndzi ta wuya ndzi ta vhuxa a yindlu ya Dhavhidha leyi yi wileko; ndzi ta yi aketa, ndzi yi vhuxa,
17 kasi a vanhu lava va seleko va fela ku tirela Jehovha hi mbilu yontlhe zvin’we ni vanhu va matiko wontlhe lava va vitaniwako hi vito ga mina, ku wula Jehovha loyi a mahako zvilo lezvi
18 zvi tivekako kusukela kale.’
19 Hikwalaho, mina ndzi wona ku i chukwana hi nga bindziseli a vamatiko lava va lavako ku tirela Nungungulu,
20 kanilezvi, hi va tsalela lezvaku va tsika lezvi zvi phahlelweko zvifananiso, ni wubhayi,* ni lezvi zvi fileko hi ku tlimbiwa,* ni nkhata.
21 Kusukela kale, ku na ni vanhu va kanelako a mitsalo ya Mosi madhoropeni wontlhe hakuva a mabhuku yakwe ma gondziwa lomu masinagogeni hi masabhadho wontlhe.”
22 Makunu a vapostoli ni madhota zvin’we ni bandla gontlhe va no boha ku hlawula vavanuna cikari kabye, va va rumela Antiyokiya zvin’we na Pawule na Bharnabhasi; ku nga Judhasi, loyi a gin’wani vito a nga hi Bharsabha, na Silasi, lava va nga hi varangeli cikari ka vamakabye.
23 Va no tsala papilo va va nyiketa, gi nga wula lezvi: “A vamakabye va n’wina, a vapostoli ni madhota, va mu losa n’wina vamakabye va vamatiko mu nga le Antiyokiya, ni le Siriya, ni le Kilikiya.
24 Hi zwile lezvaku ku sukile vanhu cikari ka hina va ta wulawula zvilo zvi nga mu juwungela, na va zama ku daya kukholwa ka n’wina kuveni hina hi wa nga va leletelangi nchumu.
25 Hi cigelo leco, hi zwene ka cilo cin’we ca kuva hi hlawula vavanuna, hi va rumela zvin’we ni vamakabye va hina vo randzeka Bharnabhasi na Pawule,
26 va nga vavanuna va nyikeleko wutomi gabye* hi kota ya vito ga Hosi ya hina Jesu Kristu.
27 Ha mu rumelela Judhasi na Silasi kambe, kasi vonawu va ta hlawutela a zvilo zvalezvi zva zvin’we hi nomu.
28 Hakuva a moya wo basa na hina hi zvi wonile na zvi hi chukwana a kuva hi nga mu rwexi ndzhwalo wo hundza lezvi zvi lavekako, ku nga ku:
29 Mu tsika lezvi zvi phahlelweko zvifananiso, ni nkhata, ni lezvi zvi fileko hi ku tlimbiwa,* ni wubhayi.* Loku mu ti wonela ka zvilo lezvi mu ta hanya khwatsi. Salani khwatsi!”
30 Hikwalaho, loku a vavanuna lavo va sukile, va no relela vaya Antiyokiya, va ya tlhanganisa vapizani vontlhe va va nyika papilo.
31 Loku va gi gondzile, va no tsaka hi lezvi gi nga va tiyisa.
32 Lezvi Judhasi na Silasi va nga hi vaphrofeti, va no kuca vamakabye kambe ni ku va tiyisa hi tikanelo to tala.
33 Andzhako ka ku tshama seyo cikhati co kari, va no salisana ni vamakabye, va tlhela hi kurula ka lava va nga va rumile.
34 *——
35 Kanilezvi Pawule na Bharnabhasi va no simama Antiyokiya va gondzisa ni ku kanela a mahungu ya ma nene ya Jehovha na va hi zvin’we ni vamakabye van’wani vo tala.
36 Andzhako ka masiku yo kari, Pawule i no byela Bharnabhasi aku: “A hi tlhele hi ya wona lezvaku va vhukisa kuyini vamakabye madhoropeni wontlhe lawa hi nga kanela a mhaka ya Jehovha.”
37 Bharnabhasi i wa lava lezvaku va famba na Johani, loyi a vitaniwako ku hi Marku.
38 Kanilezvi Pawule i wa nga zvi lavi ku va famba naye hakuva i wa va siyile le Panfiliya, a nga fambi navo ntirweni.
39 Hi kota ya lezvo va no holova nguvhu laha ka kuza va hambana; Bharnabhasi i no teka Marku aya Kupero hi ngalava.
40 Andzhako ka loku a vamakabye va khongele va kombela Jehovha lezvaku a kombisa tipswalo ka Pawule, Pawule i no hlawula Silasi a suka a famba.
41 I no tsemakanya Siriya ni Kilikiya, a tiyisa mabandla.
Mitlhamuselo ya lahasi
^ Kutani: “kinisiwi ngoma; sirkusizawu; tlulisiwi ngoma”.
^ Kutani: “kinisiwa ngoma; sirkusizawu; tlulisiwa ngoma”.
^ Ku nga Pedro.
^ Hi ciGreki: porneía. Wona Tlhamuselo wa magezu ya Bhibhiliya.
^ Kutani: “zvi nga kala ku humesiwa nkhata a cikhati zvi nga dawa”.
^ Kutani: “mihefemulo yabye”.
^ Kutani: “zvi nga kala ku humesiwa nkhata a cikhati zvi nga dawa”.
^ Hi ciGreki: porneía. Wona Tlhamuselo wa magezu ya Bhibhiliya.
^ A vhesi legi a gi kona ka mitsalo yo kari ya kale. Hi cigelo leco a gi lumbi Mitsalo yi pimisilweko.
