Mitiro 17:1-34
17 Makunu loku va hundzile Anfipoli ni Apoloniya va no chikela Tesalonika, laha ku nga hi ni sinagoga ga vaJudha.
2 Kota lezvi Pawule a nga tolovela ku maha, i no nghena sinagogeni gabye, a bhula navo hi Mitsalo hi masabhadho manharu,
3 a va tlhamusela ni ku va komba lomu ka mitsalo lezvaku zvi wa laveka ku Kristu a xaniseka a tlhela a vhuxiwa hi ka vafileko, aku: “Jesu loyi ndzi mu kanelako ka n’wina, hi yena Kristu.”
4 Hi kota ya lezvo, a vokari va no kholwa va ti patsa na Pawule na Silasi, ni citshungu ca hombe ca vaGreki lava va nga khozela Nungungulu ci no maha zvalezvo, zvin’we ni vavasati vo tala va dhumileko.
5 Kanilezvi a vaJudha va nova ni ciluse. Hikwalaho va no hlengeleta vavanuna vo kari vo biha va nga tshama merkadho, kasi va vhuxa guwa lomu dhoropeni. Va no dhumela a muti wa Jasoni na va lava Pawule na Silasi kasi va va humesa vata citshungwini.
6 Loku va va vhumalile, va no kokovisa Jasoni ni vamakabye van’wani va va yisa ka tihosi ta dhoropa, va banguleka vaku: “A vavanuna lava va vangisako guwa* misaveni yontlhe va chikele ni seno kambe,
7 niku va amukelwe hi Jasoni. Vontlhe vavanuna lava valwa ni milayo ya Khezari, vaku ku na ni hosi yin’wani, ku nga Jesu.”
8 Laha a citshungu ni tihosi ta dhoropa va ngazwa lezvo, va no karateka.
9 Va no mu hakhelisa multa Jasoni ni lava van’wani va gumesa va va tsika va famba.
10 Zvalezvo gi nga phuma, a vamakabye va no rumela Pawule na Silasi le Bhereya. Loku va chikele seyo, va no nghena sinagogeni ga vaJudha.
11 A vaJudha lava va le Bhereya va wa tlharihile* a ku hundza lava va le Tesalonika hakuva va amukele mhaka hi kutsaka ka hombe; va wa hlola khwatsi Mitsalo siku ni siku kasi ku wona lezvaku lezvi va nga kari va zvizwa lisine ke.
12 Hikwalaho a kutala ka vona va no kholwa, a ku patsa ni vavasati vo tala va dhumileko va vaGreki zvin’we ni vavanuna vo kari.
13 Kanilezvi laha a vaJudha va le Tesalonika va ngazwa lezvaku Pawule i wa kari a kanela a mhaka ya Nungungulu le Bhereya, va nota va ta kucetela citshungu lezvaku ci va vhukela.
14 A vamakabye va no tekela ku rumela Pawule bimbini, kanilezvi Silasi na Timote va no sala.
15 Lava va nga heleketa Pawule va no famba naye kala Atensi, va tlhela na va leletelwe lezvaku Silasi na Timote va wa fanele kuya kakwe hi kuhatlisa.
16 Makunu laha Pawule a nga ha rindzela Silasi na Timote le Atensi, a moya wakwe wu no karateka nguvhu hi ku wona lezvaku a dhoropa gi tele hi zvifananiso.
17 Hikwalaho i no nghena lomu sinagogeni a sangula ku bhula ni vaJudha ni vanhu van’wani va nga khozela Nungungulu, niku siku ni siku i wa bhula ni lava a nga va kuma le merkadho.
18 Kanilezvi a titlhari to kari ta gondzo ya vaEpikure ni ya vaStoyike ti no kanetisana naye. A van’wani vaku ngalo: “Kasi inaloyi wa ku phuraphura i lava ku hi byela yini ke?” A van’wani vaku: “Ko khwatsi mukaneli wa vanungungulu vo kala hi nga va tivi.” Va wulile lezvo hakuva i wa kanela mahungu ya ma nene ya Jesu ni kuvhuka ka vafileko.
19 Hikwalaho, va no mu teka va famba naye Areyopagu, vaku: “Hi kombela ku u hi tlhamusela a gondzo leyi ya yiswa u kanelako.
20 Hakuva u wulawula zvilo zva ku a hi se tshuka hi zvizwa, makunu hi lava ku tiva ku zvi wula yini.”
21 Kunene, vontlhe a vaAtensi ni valuveli va nga hanya* Atensi va wa londzowota cikhati cabye ca kuhumula kasi ku byelana ya maswa.
22 Pawule i no yima cikari ka Areyopagu aku:
“Vavanuna va Atensi, ndza zvi wona lezvaku zvilweni zvontlhe, ko khwatsi n’wina ma khozela nguvhu vanungungulu a ku hundza van’wani.
23 Laha ndzi nga kari ndzi hundza, ndzi cuwuka khwatsi lezvi mu zvi khozelako, ndzi no wona a alati legi gi tsalilweko ku: ‘Ga Nungungulu hi nga mu tiviko’. Hikwalaho, loyi mu mu khozelako na mu nga mu tivi, hi yaloyi ndzi mu kanelako ka n’wina.
24 A Nungungulu loyi a mahileko misava ni zvilo zvontlhe zvi nga ka yona, a Hosi ya tilo ni misava, a nga tshami titempeleni ti mahilweko hi mandla ya vanhu;
25 ne a nga lavi ku tirelwa hi vanhu a ku khwatsi o vhumala nchumu, hakuva hi yena a nyikako wutomi a vanhu vontlhe ni kuhefemula ni zvilo zvontlhe.
26 Hi ka munhu mun’we i no maha tixaka tontlhe ta vanhu kasi ti hanya misaveni yontlhe, a veka cikhati ca ku a zvilo zvo kari zvi maheka a tlhela a tsema mimbhingano ya lomu a vanhu va to hanya kona,
27 kasi va lavetela Nungungulu, va phiphitela* kala va mu kuma hambu lezvi a nga hiko kule ka mun’we ni mun’wani wa hina.
28 Hakuva hi kota ya yena ha hanya, ha fambafamba, hi kona, a ku khwatsi hi lezvi va nga wula a vatsali vo kari va n’wina, vaku: ‘Hinawu hi vana vakwe.’
29 “Hikwalaho, kota lezvi hi nga vana va Nungungulu, a hi faneli ku alakanya lezvaku Nungungulu i fana ni ouro, kutani prata, kutani ribye, kutani nchumu wun’wani wu vatlilweko hi munhu.
30 Lisine lezvaku a kale Nungungulu i wa nga va nyiki nandzu hakuva va wa maha lezvo hi ku kala va nga mu tivi; kanilezvi zvalezvi i kari a kanela ka vanhu vontlhe misaveni lezvaku va fanele ku ti sola.
31 Hakuva i vekile siku legi a to lamula hi gona a tiko gontlhe hi kululama hi ku tirisa a wanuna a mu hlawulileko, niku i kombile ka vanhu vontlhe lezvaku a siku lego gi tata futsi hi ku mu vhuxa hi ka vafileko.”
32 Laha va ngazwa hi kuvhuxiwa ka vafileko, a vokari va no sangula ku hleka, a van’wani vaku: “Hi ta kumana siku gin’wani hizwa mhaka leyi.”
33 Hikwalaho Pawule i no suka a famba,
34 kanilezvi a vokari va no patsana naye va kholwa. Cikari ka vanhu lavo ku wa hi na Dhiyonisi, a mulamuli wa le Areyopagu, ni wasati a vitaniwako ku hi Dhamari, ni van’wani vanhu.
Mitlhamuselo ya lahasi
^ Kutani: “va vangisako gujeguje”.
^ Kutani: “va wa zvi lava nguvhu ku gondza”.
^ Kutani: “ni lava va nga endzele”.
^ Kutani: “phuphutela; hulumetela”.
