Mitiro 18:1-28
18 Andzhako ka lezvo, Pawule i no suka Atensi aya Korinte.
2 Na a hi seyo, i no kumana ni muJudha a vitaniwako ku hi Akwila a pswalelweko Pontu a nga ha hi ku chikela hi Italya zvin’we ni sati wakwe Prisila, hakuva Klaudhyu i wa layile a vaJudha vontlhe lezvaku va huma Roma. Hikwalaho, Pawule i noya mutini wabye.
3 Kota lezvi va nga hi ni ntiro wun’we, i no tshama navo mutini wabye va tira zvin’we, hakuva vontlhe va wa hi vamahi va matenda.
4 Wontlhe masabhadho i waya sinagogeni a ya kanela,* a kholwisa vaJudha ni vaGreki.
5 A cikhati leci Silasi na Timote va nga chikela kakwe na va relela hi Makedhoniya, Pawule i no ti tsitsirita nguvhu kugondziseni ka mhaka, a kustumunya ka vaJudha a va komba lezvaku Jesu hi Kristu.
6 Kanilezvi, kota lezvi va nga simama ku mu kaneta ni ku mu rukatela, i no zuza tinguwo takwe, aku kabye: “A nkhata wa n’wina a wuve hehla ka tihloko ta n’wina. Mina a ndzi na nandzu. Kusukela lezvi ndziya ka vamatiko.”
7 Hikwalaho, i no suka laho* aya mutini wa wanuna a vitaniwako ku hi Titusi Justusi, a nga khozela Nungungulu, loyi a muti wakwe wu nga gamekene ni sinagoga.
8 Kanilezvi Krispusi, a murangeli wa sinagoga, i no kholwa ka Hosi, zvin’we ni vontlhe va ngango wakwe. A vaKorinte vo tala lava va nga muzwa, vonawu va no kholwa va bhabhatiswa.
9 Ahandle ka lezvo, a Hosi yi no byela Pawule ka muwoniso ni wusiku yiku: “U nga chavi, kanilezvi simama ku wulawula u nga miyeli,
10 hakuva ndzi na wena. Ndza hi ni vanhu vo tala dhoropeni legi va ha lavako ku kholwa. I hava a to ku vhukela laha ka kuza a ku bayisa.”
11 Hikwalaho, i no tshama laho a lembe ni khihlanya na a va gondzisa a mhaka ya Nungungulu.
12 A cikhati leci Galyo a nga hi govhernadhori wa Akaya, a vaJudha va no bohana va vhukela Pawule va mu yisa tribhunali,
13 vaku: “A wanuna loyi i kucetela vanhu lezvaku va khozela Nungungulu hi makhozelela ma hambunyetako nayo.”
14 Kanilezvi Pawule na a ha lava ku vhulula nomu, Galyo i no byela vaJudha aku: “N’wina vaJudha, loku hakunene ci wa hi cihoxo kutani nandzu wa hombe ndzi wa ta mu ingisela.
15 Kanilezvi loku ku hi kukanetisana hi timhaka ni mavito ni nayo wa n’wina, xuxani ha n’wece. A ndzi lavi ku lamula zvilo zva tshamela lego.”
16 Loku a wulile lezvo i no va hlongola laha tribhunali.
17 Hikwalaho, vontlhe va no khoma Sostene, a murangeli wa sinagoga, va sangula ku muba kwalaha tribhunali. Kanilezvi Galyo a nga zvi nghenelangi.
18 Loku a tshamile masiku yo tala, Pawule i no salisana ni vamakabye a khilela ngalava aya Siriya na a heleketiwa hi Prisila na Akwila. I no tsema misisi le Kenkreya, hakuva i wa mahile citsumbiso ka Nungungulu.
19 Loku va chikele Efesusi i no va siya laho, a nghena sinagogeni a bhula ni vaJudha.
20 Hambu lezvi va nga mu khongotela lezvaku a tshama navo cikhati co leha, a nga vhumelangi
21 kanilezvi i no va salisa a gumesa aku: “Ndzi ta tlhela ndzi wuya ka n’wina, loku Jehovha a zvi randza.” I no suka Efesusi hi ngalava
22 a relela aya Khezariya. I no kwela* a ya losa bandla a gumesa a relela aya Antiyokiya.
23 Loku a tshamile laho a cikhati co kari, i no suka a fambafamba tikweni gontlhe ga Galatiya ni Frijiya, a tiyisa vapizani vontlhe.
24 Ku no chikela a muJudha le Efesusi a vitaniwako ku hi Apolosi, loyi a pswalelweko Alekzandriya; i wa hi ni cinyikiwo ca kuwulawula niku i wa yi tiva khwatsi Mitsalo.
25 A wanuna loye i wa gondzisilwe ndleleni ya Jehovha, niku a moya wo basa wu wa mu vhuna ku chivirika. I wa kanela ni ku gondzisa lisine xungetano hi Jesu, kanilezvi i wo tiva kubhabhatisa ka Johani basi.
26 I no sangula ku kanela hi kutiya lomu sinagogeni. Makunu laha Prisila na Akwila va nga muzwa, va no mu koka hi tlhelo va ya mu tlhamusela khwatsi a ndlela ya Nungungulu.
27 Kota lezvi a nga lava ku tsemakanya aya Akaya, a vamakabye va no tsalela vapizani va nga hi seyo, va va kuca lezvaku va mu amukela khwatsi. Loku a chikele, i no va vhuna nguvhu lava va nga kholwile hi kota ya tipswalo ta Nungungulu;
28 hakuva i no wulawulisana ni vaJudha hi ntamu, a va kona mahlweni ka vanhu, a kombisa hi Mitsalo lezvaku Jesu hi Kristu.
