Mitiro 20:1-38
20 Laha a woyonga yi nga mbhela, Pawule i no vitanisa vapizani a ta va tiyisa a gumesa a va salisa. Andzhako ka lezvo, i no sangula lipfhumba lakwe la kuya Makedhoniya.
2 Loku a fambafambile matikweni lawo a tiyisa nguvhu a vapizani va nga hi seyo, i no chikela Grekiya,
3 a tshama laho tihweti tinharu. Kanilezvi kota lezvi a vaJudha va nga mu xuxela cikungo ca ku mu daya a cikhati leci a nga lava kuya Siriya hi ngalava, i no zvi wona na zvi hi chukwana ku tlhela hi Makedhoniya.
4 I wa hi na Sopateri, a n’wana wa Pirusi wa le Bhereya, na Aristarkusi na Sekundo va le Tesalonika, na Gayusi wa le Dherbhe, na Timote, na Tikikusi na Trofimusi va le provhinsya ya Azia.
5 A vavanuna lava va no ranga va ya hi nyimela le Trowasi;
6 kanilezvi loku ku hundzile masiku ya Tipawa to kala Livrina hi no suka le Filipi hi ngalava. Andzhako ka ntlhanu wa masiku hi no chikela kabye le Trowasi, hi tshama laho a 7 wa masiku.
7 Ka siku go sangula ga vhiki,* a cikhati leci hi nga tlhanganile kasi kuga zvakuga, Pawule i no sangula ku kanela kabye. Kota lezvi a nga lava ku suka hi mandziko wa kona, i no lehisa kanelo yakwe kala cikari ka wusiku.
8 Ku wa hi ni tikandiya to tala lomu saleni ya le hehla lomu hi nga tlhanganile kona.
9 A jaha go kari gi nga vitaniwa ku hi Etikusi gi nga tshamile laha janeleni gi no khomiwa hi wurongo ga hombe Pawule na a kari a kanela. Gi no hluliwa hi wurongo giwa hi le ka andari ya wunharu va ta gi tlakula na gi file.
10 Kanilezvi Pawule i no chika, a ya korama hehla ka gona, a gi angarela, aku: “Mu nga rili, hakuva wa hanya.”*
11 Andzhako ka lezvo i no tlhela hehla, a yaga zvakuga.* I no simama ku bhula navo hi cikhati co leha kala gica a gumesa a suka a famba.
12 Hikwalaho va no teka jaha lego va famba nago na gi hanya, na va nga ti koti hi kutsaka.
13 Hi no nghena citimela* hi ranga hiya Asosi, laha hi nga xuva ku ya khileta Pawule, hakuva i wa hi leletele a ku maha lezvo, yena wutsumbu na a xuva kuya seyo hi minenge.
14 A cikhati leci a nga ta hi kuma le Asosi, hi no mu khileta hiya Mitilene.
15 Loku hi sukile hi laho ka siku gi nga landzela, hi no hundza hi kusuhani ni Kiyosi, kanilezvi hi mandziko wa kona hi no nyimanyana le Samosi, hi chikela Miletu hi siku gi nga landzela.
16 Pawule i wa nga lavi ku nyima Efesusi kasi a nga hlweli lomu provhinsya ya Azia, hakuva i wa tsutsumela ku chikela Jerusalema hi siku ga Festa ya Pentekosta, loku zvi koteka.
17 Kanilezvi, na a hi Miletu, i no vitanisa madhota ya bandla ga Efesusi.
18 Laha va nga chikela, i te ngalo kabye: “N’wina ma zvi tiva khwatsi lezvi ndzi nga hanyisa zvona cikari ka n’wina kusukela siku legi ndzi nga chikela lomu provhinsya ya Azia,
19 lezvaku ndzi tirele Hosi hi kutikoramisa kontlhe ni mihloti, na ndzi hi zvikaratweni hi kota ya makungo ya vaJudha.
20 A ndzi mu fihlelangi timhaka ti mu vhunako, ne a ndzi tsikangi ku mu gondzisa kubaseni ni hi muti ni muti.
21 Kanilezvi ndzi no nyika wukustumunyu go mbhelela ka vaJudha ni vaGreki kasi va ti sola va tlhelela ka Nungungulu, ni lezvaku va kholwa ka Hosi ya hina Jesu.
22 Makunu lezvi ndziya Jerusalema na ndzi kuciwa* hi moya, hambu lezvi ndzi kalako ndzi nga zvi tivi lezvi zvi to ndzi humelela seyo.
23 Leci ndzi ci tivako hi lezvaku ka dhoropa ni dhoropa a moya wo basa wa ndzi tlharihisa lezvaku a mapaxo ni tixanisa zvi ndzi lavelele.
24 Hambulezvo, a ndzi woni wutomi ga mina na gi hi ga nchumu. Leci ndzi ci lwelako ku tsutsuma kala magumo, ni ku mbheta ntiro lowu ndzi wu amukeleko hi ka Hosi Jesu, wa ku nyika wukustumunyu go mbhelela ga mahungu ya ma nene ya tipswalo ta Nungungulu.
25 “Makunu ndza zvi tiva lezvaku n’wina n’wentlhe ndzi nga mu chumayela a Mufumo wa Nungungulu, mu nga ta ha yi wona kambe a nghohe ya mina.
26 Hikwalaho ndzi mu vitanile kasi mu ta kustumunya nyamutlha lezvaku a ndzi na nandzu nkhateni wa vanhu vontlhe,
27 hakuva a ndzi mu fihlelangi a kungo gontlhe ga Nungungulu.
28 Ti woneleni n’wina wutsumbu, mu hlayisa ni ntlhambi wontlhe lowu a moya wo basa wu nga mu yimisa lezvaku mu wu rangela,* mu risa a bandla ga Nungungulu legi a gi xavileko hi nkhata wa N’wana wakwe.
29 Ndza zvi tiva lezvaku loku ndzi fambile ku ta sala ku nghena mahlolwa* ma lambileko* cikari ka n’wina, ma xanisa a ntlhambi,
30 niku cikari ka n’wina ku ta humelela vanhu va to wulawula zvilo zvi gombonyokileko kasi va ti kokela vapizani.
31 “Hikwalaho tlharihani, mu nga rivali lezvaku hi malembe manharu, wusiku ni mumu, a ndzi tsikangi ku nyika wusungukati a mun’we ni mun’wani wa n’wina hi mihloti.
32 Makunu ndza mu siya mandleni ya Nungungulu ni ka mhaka ya tipswalo takwe, ku nga mhaka leyi yi zvi kotako ku mu aka, ni ku mu nyika tshomba cikari ka va basisilweko vontlhe.
33 A ndzi navelangi prata, ne ouro, ne tinguwo ta munhu.
34 Ma zvi tiva lezvaku ndzi no tira hi mandla ya mina kasi ndzi ti hlayisa ndzi tlhela ndzi hlayisa lava va nga hi na mina.
35 Zvilweni zvontlhe ndzi no mu komba lezvaku hi ku tirisa lezvi, mu fanele ku vhunetela lava va nga ni gome, ni ku alakanya magezu ya Hosi Jesu, lawa yena wutsumbu a nga wula, aku: ‘Loyi a nyikako wa tsaka nguvhu a ku hundza loyi a amukelako.’”
36 Loku a mbhetile ku wula timhaka leti, i no khizama navo vontlhe a khongela.
37 Kunene, vontlhe va no rila nguvhu, va bharasara Pawule* va tlhela va mu pswopswa,
38 hakuva zvi wa va vangela wusiwana nguvhunguvhu lezvi a nga va byelile ku va nga ta ha yi wona kambe a nghohe yakwe. Va no mu heleketa kala citimeleni.*
Mitlhamuselo ya lahasi
^ A siku legi hi legi hina hi nge i Sonto. Ka vaJudha gi wa hi siku go sangula ga vhiki.
^ Kutani: “hakuva a muhefemulo wakwe wa ha hi ka yena”.
^ Hi kukongoma: “a ya khema pawa aga”.
^ Kutani: “navhiyo; paketi”.
^ Hi kukongoma: “bohilwe”.
^ Kutani: “yimisa a kuva vawoneleli va wona”.
^ Kutani: “lobos”.
^ Kutani: “ma pamako”.
^ Hi kukongoma: “va wela nhan’wini ya Pawule”.
^ Kutani: “ka navhiyo; ka paketi”.
