Mitiro 21:1-40
21 Loku hi hambene navo hi no nghena citimeleni* hi famba hi kululameta kala Kose, hi mandziko wa kona hi noya Rodhe, hi suka hi laho hiya Patara.
2 A cikhati leci hi nga kuma citimela* ci ngaya Fenikiya, hi no khilela hi famba.
3 Laha hi nga wona a cihlale* ca Kupero, hi no ci bela cibhabheni hi simama kuya Siriya hi gumesa hi ya nyima Tire, hakuva a citimela* ci wa lava ku chisa a ndzhwalo wa cona laho.
4 Hi no lavetela vapizani hi va kuma hi tshama laho a 7 wa masiku. Kanilezvi na va tivisilwe hi moya, a vapizani va no byela Pawule hi kuphindaphinda lezvaku a nga kandziheli Jerusalema.
5 Loku a masiku lawo ma mbhelile, hi no suka hi khoma ndlela. Makunu vontlhe, a ku patsa ni vavasati ni vanana, va no hi heleketa kala hi huma dhoropeni. Hi no khizama laha mbhirini ya bimbi hi khongela,
6 hi gumesa hi salisana navo, hina hi nghena citimeleni,* vona va tlhela mitini yabye.
7 Hi no suka hi Tire hi famba kala Ptolemais. Loku hi chikele seyo, hi no losa vamakabye hi tshama navo siku gin’we.
8 Ka siku gi nga landzela, hi no suka hiya Khezariya hi ya nghena mutini wa muvhangeli Filipu, a nga hi mun’we wa lava va 7,* hi tshama naye.
9 A wanuna loye i wa hi ni mune wa vanhwana* va nga kari va phrofeta.
10 Kanilezvi, na hi tshamile laho a masiku yo tala, ku no relela muphrofeti hi le Judhiya, a vitaniwako ku hi Agabhusi.
11 I nota ka hina, a ta teka libhandi la Pawule a ti boha minenge ni mawoko, aku: “A moya wo basa wu ngalo: ‘A n’winyi wa libhandi leli i ta bohisiwa lezvi hi vaJudha le Jerusalema, va mu nyikela mandleni ya vamatiko.’”
12 Makunu loku hi zwile lezvo, hina ni lava va nga hi laho, hi no mu khongotela lezvaku a ngayi Jerusalema.
13 Pawule i no hlamula aku: “Hikuyini mu rilako mu pandza a mbilu ya mina? Zvi tiveni lezvaku, mina a ndzi longangi a ku ya bohiwa basi, kanilezvi ndzi longile hambu ni ku yafa le Jerusalema hi kota ya vito ga Hosi Jesu.”
14 Laha hi nga wona ku a nga vhumeli, hi no mu tsika,* hiku: “A kurandza ka Jehovha a ku maheke.”
15 Andzhako ka lezvo, hi no longisela lipfhumba hi khoma ndlela hiya Jerusalema.
16 A vapizani vo kari va le Khezariya va no famba na hina, va hi heleketa ka Mnasoni wa le Kupero, a nga hi mun’we wa lava vo sangula ku kholwa, kasi hi ya tshama kaya kakwe.
17 A cikhati leci hi nga chikela Jerusalema, a vamakabye va no hi amukela hi kutsaka.
18 Hi mandziko wa kona Pawule i no famba na hina ka Jakobe laha ku nga tlhangene a madhota wontlhe.
19 I no va losa a sangula ku va hlawutela zvontlhe lezvi Nungungulu a mahileko cikari ka vamatiko hi ntiro wakwe wa kuchumayela.
20 Loku va zwile lezvo va no dhumisa Nungungulu, kanilezvi va te ngalo kakwe: “Makabye, wa zvi tiva lezvaku ku na ni vaJudha va makume ya mazana va kholwileko niku vontlhe va pinyamela ku landzela Nayo.
21 Kanilezvi va zwile ku wena u gondzisile vaJudha vontlhe va hanyako cikari ka vamatiko lezvaku va tsika ku landzela Nayo wa Mosi, hi ku va byela lezvaku va nga va mahi wukwera* a vana vabye ne ku landzela a mikhuwo ya hina.
22 Makunu hi ta kuyini hi mhaka leyi? Hakuva va ta zvizwa a ku u chikele.
23 Maha lezvi hi to ku byela: Laha, hi na ni mune wa vavanuna va hlambanyileko* ka Nungungulu.
24 Teka vavanuna lava u ya ti basisa zvin’we navo hi kuya hi nayo, u va hakhelela kasi va haluliwa tihloko. Makunu vontlhe va ta zvi tiva lezvaku lezvi va zvi zwako hi wena a hi lisine hakuva wenawu wa ingisa Nayo.
25 Kanilezvi, hi ku kumbuka vamatiko lava va kholwileko, hi va tsalele lezvaku va tsika lezvi zvi phahlelweko zvifananiso, ni nkhata, ni lezvi zvi fileko hi ku tlimbiwa,* ni wubhayi.”*
26 Ka siku gi nga landzela, Pawule i no teka vavanuna lavo a ya ti basisa zvin’we navo hi kuya hi nayo, a gumesa a nghena tempeleni a bika siku legi a kubasiswa ku to gumesa hi gona ni cikhati ca ku nyikela a munyikelo wa mun’we ni mun’wani wabye.
27 Laha a 7 wa masiku ma nga lava ku mbhela, a vaJudha va le Azia va no mu wona tempeleni, va se kucetela citshungu contlhe, va mu khoma,
28 va banguleka vaku: “Vavanuna va ka Izrayeli, hi vhuneni! A wanuna loyi hi loyi a gondzisako vanhu vontlhe matshan’wini wontlhe lezvaku va vhukela vanhu va hina, ni Nayo wa hina, ni wutshamu legi. Ahandle ka lezvo, i zile a neha vaGreki lomu tempeleni, a nyenyezisa wutshamu legi go basa.”
29 Va wulile lezvo hakuva va wa wonile Pawule le dhoropeni na a hi na Trofimusi wa le Efesusi, va se alakanya lezvaku i mu nghenisile lomu tempeleni.
30 Ku no vhuka woyonga dhoropeni gontlhe, a vanhu vontlhe vata khatigin’we va ta khoma Pawule va mu kokovisa, va huma naye lomu tempeleni; zvalezvo ku no vhaliwa a tivati ta tempeli.
31 Na va ha lava ku mu daya, a mhaka ya lezvaku a dhoropa gontlhe ga Jerusalema gi lomu ka woyonga yi no chikela tindleveni ta komandante wa masochwa.
32 I no tekela ku teka masochwa ni tihosana ta wona va tsutsuma vaya leyo. A cikhati leci va nga wona komandante ni masochwa, va no tsika ku muba.
33 A komandante wa masochwa i no ta mu khoma, a laya lezvaku a bohiwa hi machini* mambiri, a wutisa ku hi yena mani niku cini a nga goha.
34 Kanilezvi a vokari cikari ka citshungu va wa banguleka va wula lezvi, a van’wani va wula lezviyani. Makunu lezvi a nga vhumala a hloko ya lezvi va nga kari va wula hi kota ya guwa, i no laya lezvaku va famba naye kwarteli.
35 Kanilezvi a cikhati leci Pawule a nga chikela laha zvikadheni, a masochwa ma noya hi ku mu tlakula hi kota ya lezvi a citshungu ci nga mu lambele,
36 hakuva a citshungu ci wa va landza na ci banguleka ciku: “Dayani loye!”
37 Laha Pawule a nga lava ku nghenisiwa lomu kwarteli, i no byela komandante wa masochwa aku: “Ndza vhumelelwa ku wula nchumu ka wena ke?” Aku kakwe: “Wa ci tiva ciGreki?
38 Kona a hi wena muGibhite loyi a nga kucetela vanhu masikwini ma hundzileko lezvaku va vhukela mufumo, a yisa a 4000 wa zvigevenga ciwuleni ke?”
39 Pawule aku: “Mina ndzi muJudha wa le Tarsusi, gi nga dhoropa gi dhumileko ga Kilikiya. Hikwalaho ndza ku khongotela lezvaku u ndzi tsika ndzi wulawula ni vanhu.”
40 Laha a nga mu vhumelela, Pawule i no yima laha zvikadheni, a khweneta vanhu hi woko; a cikhati leci va nga miyela, i no wulawula navo hi ciHebheru, aku:
Mitlhamuselo ya lahasi
^ Kutani: “ka navhiyo; ka paketi”.
^ Kutani: “navhiyo; paketi”.
^ Kutani: “cilundzo ca mati; ilha”.
^ Kutani: “navhiyo; paketi”.
^ Kutani: “ka navhiyo; ka paketi”.
^ Filipu i wa hi mun’we wa vavanuna lava va 7 va nga hlawulilwe hi vapostoli le Jerusalema. Wona Mitiro 6:3.
^ A nhwana wasati a kalako a nga se hlengela masango ni wanuna.
^ Hi kukongoma: “hi no miyela”.
^ Kutani: “kinisi ngoma; sirkusizawu; tlulisi ngoma”.
^ Kutani: “va mahileko citsumbiso”.
^ Kutani: “zvi nga kala ku humesiwa nkhata a cikhati zvi nga dawa”.
^ Hi ciGreki: porneía. Wona Tlhamuselo wa magezu ya Bhibhiliya.
^ Kutani: “makorente”.
