Mitiro 22:1-30
22 “Vamakabye, na n’wina vapapayi, ndzi ingiseleni ndzi mu tlhamusela mhaka ya mina.”
2 A cikhati leci va ngazwa lezvaku i wulawula navo hi ciHebheru, va no miyela vaku kape, Pawule aku:
3 “Mina ndzi muJudha a pswalilweko le Tarsusi wa Kilikiya, kanilezvi ndzi gondzisilwe dhoropeni galegi hi Gamaliyeli wutsumbu, ndzi gondzisiwa a ku tiva khwatsanyana a Nayo wa vakokwani va hina, na ndzi tirela Nungungulu hi kutitsitsirita a ku fana ni lezvi n’wina n’wentlhe mu mahako nyamutlha.
4 Ndzi yi xanisile nguvhu a Ndlela* leyi, ndziza ndzi dayisa vokari va yona, ndzi boha vavanuna ni vavasati ndzi va vhalela paxweni,
5 hambu a mupristi wa hombe ni hubye yontlhe ya madhota va zvi tiva lezvo. Hi vona kambe va nga ndzi nyika mapapilo ya kuya khoma vamakabye le Dhamasku. Ndzi no suka ndzi famba kasi ndzi ya boha lava va nga hi leyo ndzi wuya navo Jerusalema, kasi va ta tsayisiwa.
6 “Kanilezvi laha ndzi nga kari ndzi famba, na ndzi tshinela Dhamasku, hi citshuketi ku no woneka a kuhatima ka hombe hi le tilweni hi cikhati ca ni mumu, ku woninga hehla ka mina.
7 Ndzi nowa lahasi, ndzizwa gezu giku ka mina: ‘Sawule, Sawule, u ndzi xanisela yini?’
8 Ndzi no hlamula ndziku: ‘Hi wena mani bava?’ Aku ka mina: ‘Hi mina Jesu wa le Nazareta loyi u mu xanisako.’
9 A vavanuna lava va nga hi na mina va ku wonile a kuhatima loko, kanilezvi a gezu ga loyi a nga wulawula na mina a va gi zwangi.
10 Makunu ndzi no wutisa ndziku: ‘Hosi, ndzi kuyini?’ A Hosi yiku ka mina: ‘Suka u nghena Dhamasku, u taya byeliwa zvontlhe lezvi u faneleko ku maha.’
11 Kanilezvi kota lezvi ndzi nga kala ndzi nga woni nchumu hi kota ya kungangamela ka kuhatima, lava ndzi nga hi navo va no ndzi khoma hi woko kala ndzi chikela Dhamasku.
12 “Makunu Ananiyasi, a wanuna wo chava Nungungulu a nga ti karatela ku landzela Nayo, loyi a dzundziwako hi vaJudha vontlhe va hanyako seyo,
13 i nota ka mina, a ta yima reveni ga mina, aku: ‘Sawule makabye, tlhela u wona!’ Zvalezvo a matihlo ya mina ma no vhululeka* ndzi mu wona.
14 Aku ka mina: ‘Nungungulu wa vakokwani va hina i ku hlawulile kasi u tiva a kurandza kakwe, u wona loyi wakululama, ni kuzwa a gezu ga nomu wakwe,
15 hakuva u ta kustumunya ha yena ka vanhu vontlhe hi zvilo lezvi u nga zvi wona ni ku zvizwa.
16 Makunu u hlwelela yini? Suka u bhabhatiswa, u hlazva zviwonho zva wena hi ku khongela vitweni gakwe.’
17 “Kanilezvi laha ndzi nga tlhelile Jerusalema, na ndzi hi lomu tempeleni ndzi khongela, ndzi no mahisa ku khwatsi ndzo lora
18 ndzi mu wona na aku ka mina: ‘Hatlisa u huma lomu Jerusalema zvezvi, hakuva va nga ta kholwa a wukustumunyu legi u to va nyika ha mina.’
19 Mina ndziku kakwe: ‘Hosi, va zvi tiva khwatsi lezvaku ndzi wa nghena masinagogeni wontlhe ndzi khoma ni kuba lava va kholwako ka wena;
20 ni lezvaku a cikhati leci ku nga halatiwa a nkhata wa Stefani, a kustumunyu wa wena, ndzi wa hi laho ndzi zvi sekela ndzi tlhela ndzi hlayisa tinguwo ta lava va nga mu daya.’
21 Hambulezvo i te ngalo ka mina: ‘Famba, hakuva ndzi ta ku rumela kule, uya ka vamatiko.’”
22 Va no miyela va mu ingisela kala laha. Andzhako ka lezvo va no banguleka vaku: “Dayani wanuna loye, a nga ringanelwi hi ku hanya!”
23 Kota lezvi va nga banguleka, va tlhatlhelela tinguwo va hoxa, va paletela ni misava,
24 a komandante wa masochwa i no laya lezvaku Pawule a nghenisiwa kwarteli a ya thethisiwa na a biwa, kasi a tiva leci hakunene ci mahako vanhu va vhukela Pawule hi ndlela leyo.
25 Kanilezvi a cikhati leci va nga mu boha kasi va muba, Pawule i no wutisa a hosana ya masochwa yi nga yimile laho, aku: “A nayo wa mu vhumelela lezvaku muba muRoma na a nga rangangi hi ku thethisiwa a koniwa ke?”
26 A cikhati leci a hosana ya masochwa yi ngazwa lezvo, yi noya ka komandante yi yaku: “Zvini u lavako ku maha? A wanuna loyi muRoma.”
27 A komandante i noya ka Pawule a yaku: “Hi nga ndzi byela, u muRoma ke?” Pawule aku: “Ina.”
28 A komandante wa masochwa i no hlamula aku: “A kuva muRoma ndzi zvi xavile hi mali yo tala.” Pawule aku: “Kanilezvi mina ndzi pswalilwe na ndzi hi muRoma.”
29 Lava va nga lava ku mu thethisa na va muba, va no suka kakwe hi cihatla. A komandante wa masochwa yenawu i no chava laha a nga tiva lezvaku Pawule muRoma, ni lezvi a nga mu bohile hi machini.*
30 Kanilezvi hi mandziko wa kona, na a lava ku tiva lisine la ku hi kuyini a vaJudha va lumbetako Pawule, i no mu tlhatlha, a laya lezvaku a vapristi lava va tihosana ni yontlhe a Tribhunali ya Hombe va tlhangana. Makunu i no relela na Pawule a ta mu yimisa cikari kabye.
Mitlhamuselo ya lahasi
^ A Ndlela leyi, ku wuliwa a mahanyela ni tigondzo ta wuKristu.
^ Kutani: “Zvalezvo ndzi no tlakusa matihlo”.
^ Kutani: “makorente”.
