Mitiro 25:1-27
25 Loku Festu a chikele provhinsya ya Judhiya a amukela wuhosi, i no tshama masiku manharu Khezariya a gumesa a suka aya Jerusalema.
2 Makunu a vapristi lava va tihosana ni tihosana ta vaJudha va no kecara Pawule mahlweni kakwe. Hikwalaho, va no khongotela Festu
3 lezvaku a va mahela wuxinji a vitanisa Pawule Jerusalema. Kanilezvi va wa mahile cikungo ca ku tshama va lavelela Pawule laha ndleleni kasi va mu daya.
4 Festu i no hlamula aku Pawule i fanele ku tshama Khezariya, ni lezvaku yenawu i wa ta tlhela seyo ndzeni ka cikhatana.
5 I no engeta aku: “Tsikani vahombe va n’wina va relela na mina kasi va ya mu kecara loku hakunene ci hi kona a nga goha.”
6 Loku a tshamile navo cipimo ca 8 kutani 10 wa masiku, i no relela a tlhela Khezariya. Hi mandziko wa kona i no tshama citshan’wini ca kulamula, a laya lezvaku Pawule a tisiwa kakwe.
7 A cikhati leci a nga nghena, a vaJudha lava va nga relele hi Jerusalema va no yima va mu randzela, va sangula ku mu kecara hi minandzu ya hombe, ya ku ne ku yi tiyisa va wa nga zvi koti.
8 Pawule i no ti hlamulela aku: “A ndzi gohelangi Nayo wa vaJudha, ne tempeli, ne hambu Khezari.”
9 Kanilezvi Festu, na a lava ku tsakelwa hi vaJudha, i no wutisa Pawule aku: “Wa zvi lava kuya Jerusalema u ya lamuliwa seyo mahlweni ka mina hi kota ya timhaka leti ke?”
10 Pawule i no hlamula aku: “Ndzi yimile mahlweni ka citshamu ca kulamula ca Khezari, hi kona ndzi faneleko ku lamuliwa kona. A ndzi gohangi nchumu ka vaJudha, kota lezvi wenawu u zvi wonako.
11 Loku hakunene ndzi hi mugohi ni loku ndzi wonhile nchumu wu ringanako ku ndzifa, a ndzi ali kufa; kanilezvi loku ci nga hi kona ci tiyisako lezvi a vavanuna lava va ndzi lumbetako, a ku na munhu a to ndzi nyikela kabye hi ku fela ku va tsakisa. Ndzi kombela ku yisa mhaka ya mina ka Khezari!”
12 Andzhako ka loku Festu a bhulisene ni madhota yakwe, i no hlamula aku: “U kombele ku yisa mhaka ya wena ka Khezari; u taya ka Khezari.”
13 Loku ku hundzile masiku yo kari, hosi Agripa na Bhernike va noya Khezariya va ya losa Festu.
14 Kota lezvi va nga tshama laho a masiku yo tala, Festu i no hlawutela hosi a mhaka ya Pawule, aku:
“Ku na ni munhu laha a nga siyiwa paxweni hi Felisi,
15 loyi a vapristi lava va tihosana ni madhota ya vaJudha va nga mu kecara ka mina a cikhati leci ndzi nga hi Jerusalema, va kombela lezvaku a tsayisiwa.
16 Ndzi no hlamula ndziku: A nayo wa vaRoma a wu vhumeli ku tsayisa munhu na a nga se wonana ni lava va mu kecarako, kasi a kuma cikhati ca ku ti hlamulela ka mhaka leyi a kecariwako.
17 Hikwalaho loku va chikele laha, ndzi no hatlisa ndzi tshama citshan’wini ca kulamula hi siku gi nga landzela, ndzi laya lezvaku ku tisiwa a wanuna loye.
18 A cikhati leci lava va nga mu kecara va nga suka va yima, a va mu lumbetangi ne cilo cin’we co biha ka lezvi ndzi nga alakanya ku hi zvona a nga goha.
19 Va wo kanetisana hi timhaka ta wukhongeli gabye basi, ni hi munhu loyi a fileko, a vitaniwako ku hi Jesu, loyi Pawule a tiyisako aku wa hanya.
20 Makunu laha ndzi nga tsandzeka ku xuxa a mhaka leyi, ndzi no mu wutisa lezvaku wa zvi lava kuya Jerusalema a ya lamuliwa seyo hi kota ya timhaka leti ke.
21 Kanilezvi a cikhati leci Pawule a nga kombela ku simama paxweni kasi a mhaka yakwe yi tsemiwa hi Awugustu* wo Sangula, ndzi no laya lezvaku a vhalelwa kala ndzi mu yisa ka Khezari.”
22 Agripa i no byela Festu aku: “Ndza zvi lava ku muzwa wanuna loye.” Festu aku: “U ta muzwa mandziko.”
23 Hi mandziko wa kona Agripa na Bhernike va nota na va ti sasekisele nguvhu ni ku gwira, va ta nghena saleni ya mitlhangano na va hi ni vakomandante va masochwa zvin’we ni vahombe va lomu dhoropeni. Festu i no laya lezvaku Pawule a tisiwa,
24 a gumesa aku: “Hosi Agripa na n’wina n’wentlhe mu nga na hina laha, ma mu wona a wanuna loyi, hi loyi a citshungu contlhe ca vaJudha ci nga mu kecara ka mina le Jerusalema ni kwalaha kambe, ci banguleka ci ku a nga ha faneli ku hanya.
25 Kanilezvi ndzi wonile lezvaku a nga mahangi nchumu wu ringanako ku a dawa. Hikwalaho, a cikhati leci a nga kombela ku yisa mhaka yakwe ka Awugustu wo Sangula, ndzi no vhumela.
26 Kanilezvi a ndzi na mhaka yo tiya yo tsalela a Hosi ya mina xungetano hi yena. Hikwalaho ndzi mu tisile mahlweni ka n’wina n’wentlhe, nguvhunguvhu ka wena hosi Agripa, kasi loku a thethisilwe ndzi ta kuma co tsala.
27 Hakuva ka mina a zvi zwali a ku rumela cibochwa na ndzi nga wuli lezvi ci lumbetiwako zvona.”
Mitlhamuselo ya lahasi
^ I vito gi nga nyikiwa a hosi ya hombe ka tontlhe mufun’weni wa Roma.
