Mitiro 27:1-44
27 Kota lezvi ku nga bohilwe lezvaku hi fanele ku khilela citimela* hiya Italya, va no nyikela Pawule ni zvibochwa zvin’wani ka Julyu, a hosana ya masochwa, a nga rangela a ntlawa wu vitaniwako ku i butho ga Awugustu.
2 Hi no khilela citimela* ca le Adramita, leci ci nga lava kuya matlhelweni ya provhinsya ya Azia hi suka hi famba na hi hi na Aristarkusi wa le Tesalonika le Makedhoniya.
3 Ka siku gi nga landzela hi no chikela Sidhoni; Julyu i no mu khoma khwatsi Pawule, a mu vhumelela ku ya wona vanghana vakwe ni lezvaku va mu vhunetela.
4 Hi no suka hi laho hi famba hi mbhiri ya cihlale* ca Kupero, hakuva a moya wu waba wuya ko hambana ni lomu hi ngaya kona.
5 Hi no tsemakanya bimbi hi hundza hi tlhelweni ga Kilikiya ni Panfiliya hi ya nyima Mira wa le Likiya.
6 A hosana ya masochwa yi no kuma citimela* laho ca le Alekzandriya ci ngaya Italya yi hi nghenisa ka cona.
7 Andzhako ka masiku yo tala na hi famba hi kukasa, hi no chikela Nidhusi hi kukarateka. Kota lezvi a moya wu nga hi tsandzekisa ku kongoma lomu hi ngaya kona, hi no famba hi mbhiri ya cihlale* ca Kreta kusuhani ni Salmone.
8 Hi no simama ku famba hi mbhiri ya bimbi hi kukarateka kala hi chikela ka wutshamu legi gi vitaniwako ku Masuwa ma Nene* gi nga kusuhani ni dhoropa ga Laseya.
9 Kota lezvi ku nga hundzile cikhati co leha, makunu zvi wa hi mhango a ku famba hi bimbi, hakuva ku wa sangulile nguva ya cirami. Hikwalaho Pawule i no va tlharihisa
10 aku: “Vavanuna, ndza zvi wona lezvaku a lipfhumba leli li tava ni mhango niku hi ta luza zvilo zvo tala, na ku nga hi ndzhwalo ni citimela* basi, kanilezvi ni wutomi ga hina.”
11 Hambulezvo, a hosana ya masochwa yi no ingisa a mufambisi wa citimela* ni n’winyi wa cona yi tsika lezvi Pawule a nga wula.
12 Kota lezvi a suwa* lego gi nga kala gi nga hi gi nene a ku tshama ka gona hi nguva ya cirami, a votala va no nyika mawonela ya lezvaku hi suka laho hi zama kuya Fenike, gi nga suwa ga le Kreta, legi gi cuwukeneko ni mutsuwuka-gambo hi tlhelo ga n’walungu* ni tlhelo ga le dzongeni,* hi ya tshama kona hi nguva ya cirami.
13 A cikhati leci ku ngaba moyana wa wu nene wa le dzongeni,* va no alakanya lezvaku a kungo gabye gi tatisekile. Zvalezvo va no simula fero* hi sangula ku famba hi tlhelo ga Kreta, kusuhani ni mbhiri ya bimbi.
14 Kanilezvi na hi nga seya kule, ku no sangula kuba moya wa hombe wu vitaniwako ku i Erakwilo,* wu ngata hi le cihlaleni,*
15 wu koka citimela* laha ka kuza ci nga ha zvi koti ku cuwukana nawo, hikwalaho hi no tsika moya wu hi kukuleta.
16 Hi no kukuletwa kala ka cihlalana* ci vitaniwako ku i Kaudha. Hi kukarateka ka hombe, hi noza hi zvi kota ku kokela cingalavana* leci ci nga kokiwa hi citimela.*
17 Loku va tlakusile a cingalavana va ci boha laha ka citimela,* va no boha citimela hi lahasi. Kota lezvi va nga chava ku njhibela le Sirtisi,* va no chisa matanga, va tsika citimela ci kukuletwa hi moya.
18 Kota lezvi hi nga biwa nguvhu hi moya, va no sangula ku hungula a ndzhwalo wa citimela* ka siku gi nga landzela.
19 Hi siku ga wunharu va no hoxa zvigotso zvo kari zva citimela* hi mandla yabye.
20 Loku ku hundzile masiku yo tala na hi nga woni gambo ne tinyeleti, lezvo na hi biwa hi moya wa hombe, hontlheni hi no mbhelelwa hi kutsumba ka lezvaku hi ta pona.
21 Andzhako ka ku mbheta cikhati co leha na va ngagi nchumu, Pawule i no suka a yima cikari kabye, aku: “Vavanuna, loku mu wa ndzi ingisile, mu nga suki le Kreta, na hi nga kumanangi ni mhango leyi ni kulahlekelwa loku.
22 Hambulezvo, makunu ndza mu khongotela ndziku: Tiyani hlana hakuva i hava ni mun’we wa n’wina a to lova, sine citimela* coce.
23 Hakuva a ngilozi ya Nungungulu loyi ndzi mu khozelako ni ku mu tirela yi wonekile ka mina matolo,
24 yiku: ‘Pawule, u nga chavi. Hakuva u ta ya yima mahlweni ka Khezari. Niku hi kota ya wena, Nungungulu i ta ponisa vontlhe lava u endzako navo.’
25 Hikwalaho, tiyani hlana vavanuna, hakuva ndza kholwa ka Nungungulu lezvaku zvi ta mahekisa zvalezvi a ngilozi yi nga ndzi byelisa zvona.
26 Hambulezvo, hi ta ya hlatiwa ka cihlale* co kari.”
27 Andzhako ka 14 wa masiku na hi kukuletwa hi moya, wusiku ni mumu, bimbini ga Adriya, cikari ka wusiku a vamarinyero va no zvi wonisa ku khwatsi va wa hi kusuhani ni ku chikela ka tiko go kari.
28 Va no pima kueta ka mati va kuma 36 wa timetro, hikwalaho va no fambanyana kutsongwani va ya pima kambe va kuma 27 wa timetro.
29 Na va chava lezvaku a citimela* ci nga tshuka ci khwekela lomu ka maribye, va no rikhisa a mune wa tifero* hi lendzhako ka cona,* hi tshama hi rindzela ku gica.
30 Kanilezvi a cikhati leci a vamarinyero va nga zama ku nyemuka lomu citimeleni,* va releta cingalavana bimbini na va ku khwatsi vo rikhisa tifero* hi le nhovhini* ya citimela,
31 Pawule i no byela masochwa ni hosana ya wona aku: “Loku a vavanuna lava vo huma lomu citimeleni,* mu nga ta pona.”
32 Zvalezvo a masochwa ma no tsema a tingoti ta cingalavana, ma ci tsika ci wela bimbini.
33 Laha gi ngaya kuceni, Pawule i no khongotela vontlhe lezvaku vaga, aku: “Nyamutlha i siku ga wu 14 na ma ha rindzela, niku cima a mu sega nchumu.
34 Hikwalaho ndza mu khongotela lezvaku muga zvakuga kasi zvi mu vhuna, hakuva ku nga ta lova hambu ni sisi wun’we wa tihloko ta n’wina.”
35 Andzhako ka ku wula lezvo, i no teka pawa, a bonga Nungungulu mahlweni ka vontlhe, a khema a sangula kuga.
36 Vontlhe va no tiya hlana va sangula kuga na vonawu.
37 Hontlheni hi nga hi lomu citimeleni* hi wa hi 276.
38 Loku va gile va xura, va no hungula ndzhwalo wa citimela* hi ku hoxetela trigo lomu bimbini.
39 Laha gi ngaca, a va zvi tivangi ku va wa hi ka tiko muni kanilezvi va no wona yipswha* yi nga hi ni pswhani* va se zama kuya seyo kasi va ya nyimisa kona citimela* loku zvi koteka.
40 Hikwalaho va no tsema tingoti ta tifero va ti tsika ti wela bimbini, lezvo na va tlhatlha a tingoti ta tilemi.* Loku va gwimbile a tanga ga le mahlweni gi kangatela moya, va no kongoma pswhani.*
41 A cikhati leci va ngaba a cidhunyo* ca misava ci nga biwa hi bimbi seno ni seno, a citimela* ci no ya njhibela hi nhovhu ci nyima ci nga ha suki. Kanilezvi ci no sangula ku biwa hi mavingo* ya hombe hi lendzhako ci phatlukela.
42 Hikwalaho a masochwa ma no lava ku daya zvibochwa kasi ne cin’we ci nga hlambeli ci tsutsuma.
43 Kanilezvi a hosana ya masochwa yi no ma betela hi ku lava ku ponisa Pawule. Yi no laya lava va zvi kotako ku hlambela lezvaku va bhun’wala* matini va ranga va huma,
44 lava van’wani va landzela: A vokari va huma hi mapulangu, ni van’wani hi zvipalavati zva citimela.* Hizvalezvo, hontlheni hi no pona hi huma handle.
Mitlhamuselo ya lahasi
^ Kutani: “navhiyo; paketi”.
^ Kutani: “navhiyo; paketi”.
^ Kutani: “cilundzo ca mati; ilha”.
^ Kutani: “navhiyo; paketi”.
^ Kutani: “cilundzo ca mati; ilha”.
^ Legi i vito ga porto. A porto wutshamu legi a zvitimela zvi nyimako kona.
^ Kutani: “navhiyo; paketi”.
^ Kutani: “navhiyo; paketi”.
^ Kutani: “porto”. A porto wutshamu legi a zvitimela zvi nyimako kona.
^ Kutani: “norte”.
^ Kutani: “sul”.
^ Kutani: “sul”.
^ Kutani: “nanga”.
^ I moya wu ngata hi n’walungu hi tlhelo ga mutsuwuka-gambo.
^ Kutani: “cilundzweni ca mati; ilha”.
^ Kutani: “navhiyo; paketi”.
^ Kutani: “cilundzo ca mati; ilha”.
^ Cingalavana ci nga famba ni citimela kasi va ci tirisa loku ci hangile.
^ Kutani: “navhiyo; paketi”.
^ Kutani: “ka navhiyo; ka paketi”.
^ Wona Tlhamuselo wa magezu ya Bhibhiliya.
^ Kutani: “navhiyo; paketi”.
^ Kutani: “navhiyo; paketi”.
^ Kutani: “navhiyo; paketi”.
^ Kutani: “cilundzo ca mati; ilha”.
^ Kutani: “navhiyo; paketi”.
^ Kutani: “tinanga”.
^ Kutani: “le phopheni”.
^ Kutani: “ka navhiyo; ka paketi”.
^ Kutani: “tinanga”.
^ Kutani: “phoroweni”.
^ Kutani: “ka navhiyo; ka paketi”.
^ Kutani: “ka navhiyo; ka paketi”.
^ Kutani: “navhiyo; paketi”.
^ Kutani: “baía; cibimbana”.
^ Kutani: “praia”.
^ Kutani: “navhiyo; paketi”.
^ Kutani: “tichukila”.
^ Kutani: “praia”.
^ Kutani: “mango”.
^ Kutani: “navhiyo; paketi”.
^ Kutani: “mabyandlati; mavimbi”.
^ Kutani: “pfun’wala”.
^ Kutani: “navhiyo; paketi”.
