Mitiro 28:1-31
28 Laha hi nga ponile, hi kona hi nga zvi tiva lezvaku a vito ga cihlale* leco ku wa hi Melita.
2 A vanhu va wutshamu lego va hi mahele wuxinji ga hombe nguvhu. Va no dzivela ndzilo, va hi amukela hontlheni, hakuva ku wa hi ni vhula ni cirami.
3 Laha Pawule a nga wungeletela mahlahla a ma chela ndzilweni, ku no huma nyoka hi kuzwa kuhisa yi mu luma lomu canjeni yi namarela.
4 Laha a vanhu va wutshamu lego va nga wona a nyoka leyo ya wuxungu na yi ku ciki-ciki canjeni gakwe, va no byelana vaku: “Hakunene a wanuna loyi mudayi. Hambu lezvi a nga pona lomu bimbini, Muphoti* a nga zvi lavi ku mu tsika a hanya.”
5 Hambulezvo i no n’watseka nyoka laha ndzilweni na yi nga mu bayisangi.
6 Va wa alakanya ku i ta vhimba kutani ku tekela kuwa afa. Kanilezvi loku va mu cuwukele hi cikhati co leha va wona lezvaku a nga humelelwi hi nchumu wo biha, va no cica maalakanyo va sangula ku wula lezvaku Pawule i nungungulu.
7 Kusuhani ni laha hi nga hi kona, ku wa hi ni mipetso ya hosana ya cihlale* leco; a vito gakwe i wa hi Publiu. I no hi amukela hi tshama naye masiku manharu.
8 Kanilezvi a papayi wa Publiu i wa etlele hi kuzwa feveri ni cikuna. Hikwalaho, Pawule i noya a ya mu khongelela, a mu tlhateka mandla, a mu hanyisa.
9 Loku ku mahekile lezvo, vontlhe lava va nga babya ka cihlale* leco va nota, va ta hanyiswa.
10 Va no hi bonga hi zvinyikiwo zvo tala; laha hi nga lava ku suka va no hi nyika zvontlhe hi nga zvi lava.
11 Andzhako ka tihweti tinharu hi no suka hi famba hi citimela* ca le Alekzandriya leci ci nga tshamile laha cihlaleni* hi nguva ya cirami. A citimela leco ci wa hi ni cifananiso ca “Vana va Zewusi”* hi le nhovhini.
12 Loku hi chikele Sirakuse, hi no tshama laho masiku manharu;
13 hi suka hi laho hi famba kala Regiyume. Andzhako ka siku gin’we ku noba moya wa le dzongeni,* hi chikela le Puteyoli hi siku gi nga landzela.
14 Hi no kuma vamakabye laho, va hi khongotela ku tshama navo a 7 wa masiku; andzhako ka lezvo, hi no suka hi kongoma Roma.
15 A cikhati leci a vamakabye le Roma va ngazwa lezvaku hiya seyo, va no hi khinga va ta kumana na hina Merkadho ya Apiyu ni le Mahotela Manharu. Laha Pawule a nga va wona, i no bonga Nungungulu, a tiya hlana.
16 Makunu loku hi chikele Roma, Pawule i no vhumelelwa ku tshama yece na a gadhiwa hi musochwa.
17 Andzhako ka masiku manharu, i no vitanisa madhota ya vaJudha; loku va tlhangene i no va byela aku: “Hambu lezvi ndzi nga kala ku maha nchumu wo vhukela vanhu kutani mikhuwo ya vakokwani va hina, ndzi no khon’wa le Jerusalema ndzi nyikelwa mandleni ya vaRoma.
18 Loku va ndzi hlolile a va kumangi nandzu wu ringanako ku ndzi dawa, hikwalaho va no lava ku ndzi tlhatlha.
19 Kanilezvi laha a vaJudha va nga ala, ndzi no kurumeteka ku yisa mhaka ya mina ka Khezari, na ku nga hi lezvaku ndzova ni mhaka ya ku vhukela tiko ga hina.
20 Hikwalaho ndzi mu vitanile lezvaku ndzi ta mu wona ni ku wulawula na n’wina; hakuva ndzi bohilwe hi machini* lawa hi kota ya kutsumba ka Izrayeli.”
21 Vaku kakwe: “A hi amukelangi mapapilo hi le Judhiya ma wulawulako hi wena; hambu a vamakabye lava va tileko hi seyo, i hava a nga bika kutani ku wulawula zvahava hi wena.
22 Hambulezvo, hi zvi wona na zvi hi zvi nene a kuzwa hi wena lezvi u zvi alakanyako, hakuva va wulawula kubiha hi wukhongeli legi matlhelweni wontlhe.”
23 Va no boha siku ga ku ta tlhangana naye, vata na va tele nguvhu laha a nga tshama kona. I no sukela ni mixo kala gi phuma, a va tlhamusela mhaka hi ku va nyika wukustumunyu go mbhelela hi Mufumo wa Nungungulu, a va kholwisa xungetano hi Jesu hi lezvi zvi tsalilweko Nayweni wa Mosi ni ka Vaphrofeti.
24 A vokari va no kholwa lezvi a nga kari a wula, a van’wani a va kholwangi.
25 Lezvi va nga kala ku zwanana, va no sangula ku suka; makunu Pawule i no wula magezu lawa:
“A moya wo basa wu wa wula vakokwani va n’wina a cikhati leci Isaya a nga phrofeta
26 aku: ‘Famba ka vanhu lava u yaku: “A kuzwa mu ta zvizwa kanilezvi mu nga ta zvi zwisisa. A ku cuwuka mu ta cuwuka kanilezvi mu nga ta zvi wona.
27 Hakuva a timbilu ta vanhu lava ti tlanyele; hi tindleve tabye vazwa kanilezvi a va mahi nchumu, va tsimbile kasi va nga tshuki va wona ne ku ingisa hi tindleve tabye ne hambu ku zvi zwisisa hi timbilu tabye kasi va hundzuluka ndzi va hanyisa.”’
28 Hikwalaho, zvi tiveni lezvaku a kuhanyisa loku ka Nungungulu ku rumelwe ka vamatiko; vona va ta ingisa.”
29 *——
30 I no tshama laho malembe mambiri ka yindlu leyi a nga ti lugarele, na a va amukela khwatsi vontlhe lava va ngata kakwe,
31 a va chumayela xungetano hi Mufumo wa Nungungulu ni ku va gondzisa hi Hosi Jesu Kristu hi kutiya ka hombe nguvhu, na a nga vhalelwi hi nchumu.
Mitlhamuselo ya lahasi
^ Kutani: “cilundzo ca mati; ilha”.
^ Kutani: “Kululama”. Hi ciGreki: Díke. Ku ngava na ku wuliwa a nungungulu wa kululama loyi a photelako vanhu kutani kuva na ku wuliwa kululama ha koce.
^ Kutani: “cilundzo ca mati; ilha”.
^ Kutani: “cilundzo ca mati; ilha”.
^ Kutani: “navhiyo; paketi”.
^ Kutani: “cilundzweni ca mati; ilha”.
^ Kutani: “Jupiteri”.
^ Kutani: “sul”.
^ Kutani: “makorente”.
^ A vhesi legi a gi kona ka mitsalo yo kari ya kale. Hi cigelo leco a gi lumbi Mitsalo yi pimisilweko.
