Mitiro 3:1-26
3 Pedro na Johani va wa kari vaya tempeleni hi cikhati ca mukhongelo, kwalomu ka ma 15 hora.*
2 Ku wa rwalilwe wanuna a nga pswalilwe na a hi cilima loyi wontlhe masiku a nga vekiwa kusuhani ni nyangwa ya tempeli, leyi yi nga vitaniwa ku i Nyangwa yo Saseka, kasi a kombela zomola ka lava va nga nghena tempeleni.
3 Laha a nga wona Pedro na Johani na va kari va nghena tempeleni, i no va kombela zomola.
4 Kanilezvi Pedro na Johani va no mu cuwukisisa, Pedro aku: “Hi cuwuke.”
5 Hikwalaho, i no va cuwuka na a alakanya ku va ta mu nyika cokari.
6 Kanilezvi Pedro i te ngalo: “A ndzi na prata ne ouro, kanilezvi ndza ku nyika lezvi ndzi nga nazvo. Hi vito ga Jesu Kristu wa le Nazareta, suka u famba!”
7 Loku a wulile lezvo, i no mu khoma hi canja gakwe ga cinene a mu yimisa. Zvalezvo a mikondzo ni minenge yakwe zvi no tiya.
8 I no tlula a yima a sangula ku famba, a nghena navo lomu tempeleni, a fambafamba ni ku tlulatlula na a dhumisa Nungungulu.
9 A vanhu vontlhe va no mu wona na a fambafamba ni ku dhumisa Nungungulu.
10 Laha va nga mu tiva lezvaku hi yena wanuna loyi a nga tshama laha Nyangweni yo Saseka ya tempeli a kombela zomola, va no hlamala nguvhu va vhumala ni co wula hi ku wona lezvi zvi nga mu mahekela.
11 A wanuna loyi na a ha khomile Pedro na Johani, a vanhu vontlhe va no tsutsumela kabye, vaya laha ku nga vitaniwa ku i Vharanda ga Solomoni, na va hlamala nguvhu.
12 Laha Pedro a nga wona lezvo, i no byela vanhu aku: “Vavanuna va ka Izrayeli, hikuyini mu hlamalako nguvhu hi lezvi? Hikuyini mu hi cuwukisisako ku khwatsi hi no mu maha a famba hi ntamu wa hina kutani hi kukhozela ka hina Nungungulu ke?
13 A Nungungulu wa Abrahama, ni wa Isaka, ni wa Jakobe, ni Nungungulu wa vakokwani va hina, i dhumisile Jesu, a Nandza gakwe, loyi n’wina mu nga mu nyikela ni ku mu ala mahlweni ka Pilatu hambu lezvi a nga lava ku mu tlhatlha.
14 Mu alile a munhu loyi wo basa ni wo lulama, mu kombela ku tlhatlhelwa wanuna loyi a nga hi mudayi,
15 mu daya a Hosi ya wutomi. Kanilezvi Nungungulu i no mu vhuxa hi ka vafileko; hina hi vakustumunyu va mhaka leyi.
16 Hi vito ga Jesu, ni lezvi hi kholwako vitweni gakwe, a wanuna loyi mu mu wonako ni ku mu tiva i no tiyiswa. Lezvi hi kholwako ka Jesu, a minenge ya wanuna loyi yi no tiyiswa mahlweni ka n’wina n’wentlhe.
17 Makunu vamakabye, ndza zvi tiva lezvaku mu zvi mahile hi kungativi, khwatsi hi lezvi a tihosi ta n’wina ti nga mahawu.
18 Kanilezvi Nungungulu i no tatisa lezvi a nga sina a zvi wulile hi nomu wa vaphrofeti vontlhe, aku: Kristu wakwe i ta xaniseka.
19 “Hikwalaho, ti soleni, mu hundzuluka kasi a zviwonho zva n’wina zvi fela ku vhinyetelwa, kasi Jehovha a mu nyika zvikhati zva kuhumula,*
20 ni ku rumela Kristu loyi a yimiselweko n’wina, a nga Jesu,
21 loyi a tilo gi faneleko ku mu hlayisa ndzeni ka gona kala zvikhatini zva kutlheliselwa ka zvilo zvontlhe, lezvi Nungungulu a wulileko hi nomu wa vaphrofeti vakwe vo basa va kaleloko.
22 Kunene, Mosi i te ngalo: ‘Jehovha Nungungulu wa n’wina i ta mu yimisela muphrofeti cikari ka vamakabye va n’wina wa ku fana na mina. Ingisani ni cihi a to mu byela.
23 Ni wihi munhu a nga ingisiko a Muphrofeti loye i ta loviswa a ku bhi cikari ka vanhu.’
24 A vaphrofeti vontlhe lava va nga wulawula kusukela ka Samuweli zviya mahlweni, vonawu va tivisile zviku dlunya hi masiku lawa.
25 N’wina mu vana va vaphrofeti ni va civhumelwano leci Nungungulu a nga maha ni vakokwani va n’wina, a byela Abrahama aku: ‘Hi ka pswalo* wa wena a mingango yontlhe ya laha misaveni yi ta katekiswa.’
26 Andzhako ka loku Nungungulu a yimisile Nandza gakwe, i no gi rumela ka n’wina kuranga kasi ku ta mu katekisa hi ku hundzulusa a mun’we ni mun’wani wa n’wina mitirweni yakwe ya kubiha.”
Mitlhamuselo ya lahasi
^ Hi kukongoma: “hi hora ya wu 9”.
^ Hi kukongoma: “kasi kuta zvikhati zva kuhumula hi ka nghohe ya Jehovha”.
^ Hi kukongoma: “mbewu”.