Mitiro 5:1-42
-
Ananiyasi na Safira (1-11)
-
A vapostoli va maha zvihlamaliso zvo tala (12-16)
-
Va vhalelwa paxweni va tlhela va humesiwa (17-21a)
-
Va tisiwa kambe Tribhunali ya Hombe (21b-32)
-
“Ingisa Nungungulu a ku hundza ku ingisa vanhu” (29)
-
-
Gamaliyeli a va nyika wusungukati (33-40)
-
Va chumayela hi muti ni muti (41, 42)
5 Kanilezvi, a wanuna wo kari a vitaniwako ku hi Ananiyasi, ni sati wakwe Safira, i no xavisa petso.
2 Hambulezvo i no pambula mali yo kari a fihla na zvi tiviwa hi sati wakwe, a tisa ntsena a cipandze ca mali leyo a ta yi veka mikondzweni ya vapostoli.
3 Pedro i te ngalo kakwe: “Ananiyasi, hikuyini u tsikileko Sathani a ku kucetela, u tiya u hembela moya wo basa, u pambula a mali ya petso u fihla ke?
4 Kasi a petso lowo wu wa nga hi wa wena na u nga se wu xavisa ke? Andzhako ka loku wu xavisilwe, a mali ya kona yi wa nga hi ya wena ke? Hikuyini u lukileko mano mbilwini ya wena ya ku maha lezvi? U hembele Nungungulu, a wu hembelangi vanhu.”
5 Loku a zwile magezu lawo, Ananiyasi i nowa, afa. Vontlhe lava va nga zvizwa va no chava nguvhu.
6 Ku no suka majaha ma mu phutsela ka tinguwo, ma huma naye ma ya mu lahla.
7 Loku ku hundzile cipimo ca tihora tinharu, a sati wakwe i no nghena na a nga zvi tivi lezvi zvi nga mahekile.
8 Pedro aku kakwe: “Hi nga ndzi byela, hi yona yontlhe a mali leyi n’wina va vambiri mu nga xavisa hi yona a petso ke?” Safira aku: “Ina, hi yona yontlhe.”
9 Pedro aku kakwe: “Hikuyini n’wina va vambiri mu vhumeleneko a ku ringa moya wa Jehovha ke? Lava va nga lahla nuna wa wena va laha nyangweni. Wenawu va ta ku rwala va huma na wena.”
10 Zvalezvo Safira i nowa mikondzweni ya Pedro, afa. A cikhati leci a majaha ma nga nghena, ma no ta mu kuma na a file, ma se mu rwala ma ya mu lahla tlhelweni ga nuna wakwe.
11 Hikwalaho, a bandla gontlhe ni vontlhe lava va nga zvizwa va no chava nguvhu.
12 A vapostoli va no simama ku maha zviwoniso ni zvihlamaliso zvo tala cikari ka vanhu; niku vontlhe va wa tlhangana Vharandeni ga Solomoni.
13 Kunene, ku wa nga hi na mun’wani munhu a nga tiya ku ti patsa navo; hambulezvo a vanhu va wa va dzundza.
14 Ahandle ka lezvo, a ntsengo wa vavanuna ni wa vavasati lava va nga kholwa ka Hosi va ti patsa navo wu wa hi wa hombe.
15 Va waza va tisa a vababyi maruweni ya hombe va ta va lata masangweni kasi loku Pedro a hundza hi laho a ndzhuti wakwe wu fela kuva hehla ka vokari.
16 Ku wa simama kuta citshungu kambe hi ka madhoropa ya laha kusuhani ni Jerusalema na ci rwele lava va nga babya ni lava va nga hi ni madhimoni, va ta hanyiswa vontlhe.
17 Kanilezvi a mupristi wa hombe ni vontlhe lava a nga hi navo, va nga hi valandzeli va tigondzo ta vaSadhusi, va no suka va yima na va zangarile nguvhu,*
18 va khoma vapostoli va va vhalela paxweni.
19 Kanilezvi cikari ka wusiku, a ngilozi ya Jehovha yi no vhulula a tivati ta paxo yi va humesa lahandle, yiku:
20 “Fambani mu ya yima tempeleni, mu simama ku byela vanhu a timhaka tontlhe ta wutomi legi.”
21 Loku va zwile lezvo, va no nghena tempeleni ni mixo va sangula ku gondzisa.
Makunu laha a mupristi wa hombe ni lava a nga hi navo va nga chikela, va no tlhanganisa a Tribhunali ya Hombe ni hubye yontlhe ya madhota ya vana va ka Izrayeli, va rumela gezu paxweni ga lezvaku a vapostoli va tiswa mahlweni kabye.
22 Kanilezvi a cikhati leci a varindzeli va nga chikela, a va va kumangi lomu paxweni. Hikwalaho va no wuya va ta bika,
23 vaku: “Hi kumile paxo na gi khotsilwe khwatsi, a varindzeli na va yimile tinyangweni, kanilezvi laha hi nga vhulula a hi kumangi munhu.”
24 Loku a hosana ya varindzeli va tempeli ni vapristi lava va tihosana va zwile a magezu lawo, va no kanganyiseka,* va ti wutisa ku zvi ta gumesisa kuyini.
25 Kanilezvi ku nota wokari a taku: “A vavanuna lava mu nga va vhalele paxweni va lomu tempeleni va gondzisa vanhu.”
26 A hosana ya varindzeli yi no suka ni varindzeli va yona va ya va teka, kanilezvi na va nga va nikinyeteli, hakuva va wa chava ku gandliwa hi maribye hi vanhu.
27 Hikwalaho va no wuya navo va ta va yimisa mahlweni ka Tribhunali ya Hombe. A mupristi wa hombe i no va thethisa,
28 aku: “Hi mu layile nguvhu lezvaku mu nga ha gondzisi hi vito legi, hambulezvo mu tatile Jerusalema hi gondzo ya n’wina niku mu bhejile ku neha nkhata wa wanuna loyi hehla ka hina.”
29 Pedro ni vapostoli lava van’wani va no hlamula vaku: “Hi fanele ku ingisa Nungungulu* a ku hundza ku ingisa vanhu.
30 A Nungungulu wa vakokwani va hina i vhuxile Jesu, loyi n’wina mu nga mu daya, mu mu hayeka mhandzeni.*
31 Hi yaloyi Nungungulu a nga mu tlakusa kota Hosi ni Muhanyisi reveni gakwe ga cinene, kasi Izrayeli a ti sola, a tsetselelwa zviwonho zvakwe.
32 Hina hi vakustumunyu va timhaka leti, ni moya wo basa wonawu, lowu Nungungulu a nyikako lava va mu ingisako.”*
33 A cikhati leci va ngazwa lezvo va no zangara,* va lava ku va daya.
34 Kanilezvi, a muFarisi a vitaniwako ku hi Gamaliyeli, a mugondzisi wa Nayo, a nga dzundziwa hi vanhu vontlhe, i no suka a yima lomu Tribhunali ya Hombe, a laya lezvaku a vapostoli va humesiwa lahandle zva cikhatana.
35 Andzhako ka lezvo, i te ngalo kabye: “Vavanuna va ka Izrayeli, ti woneleni ka lezvi mu lavako ku maha ka vavanuna lava.
36 Hakuva masikwini lawo, ku no humelela Tewudhasi, a nga ti wula ku hi manyani, ni cipimo ca 400 wa vavanuna va no mu landzela. Kanilezvi i no dawa; vontlhe lava va nga kari va mu landzela va no hangalaka va mbhela.
37 Andzhako kakwe, ku no humelela Judhasi wa le Galileya masikwini ya citsalela, a kucetela vanhu lezvaku va mu landzela. Yenawu i lovile; vontlhe lava va nga kari va mu landzela va hangalakile.
38 Hikwalaho, ndza mu byela ndziku: Mu nga juwungeli a vavanuna lava, va tsikeni. Hakuva loku a kungo legi kutani ntiro lowu wu hi wa vanhu, wu ta fuviswa;
39 kanilezvi loku wu hi wa Nungungulu, mu nga ta zvi kota ku va lovisa. Loku mu va vhukela, mu ta tshuka mu kumiwa na mu kari mulwa na Nungungulu.”
40 Hikwalaho va no ingisa a wusungukati gakwe, va vitana vapostoli va ta va kwapa,* va va laya lezvaku va nga ha wulawuli hi vito ga Jesu, va gumesa va va tsika va famba.
41 A vapostoli va no huma hi lomu Tribhunali ya Hombe na va tsakile hi lezvi va hlayelweko lava va faneleko a ku xaniseka hi kota ya vito ga Jesu.
42 Wontlhe masiku, lomu tempeleni ni hi muti ni muti, va no simama va nga tsiki ku gondzisa ni ku kanela mahungu ya ma nene xungetano hi Kristu Jesu.
Mitlhamuselo ya lahasi
^ Kutani: “na va tele hi ciluse”.
^ Kutani: “va no jujeka kupima”.
^ Kutani: “ku ingisa Nungungulu kota hosi”.
^ Kutani: “sinyeni”.
^ Kutani: “va mu ingisako kota hosi”.
^ Kutani: “va no tlhaviwa”.
^ Kutani: “va ta vaba”.
