Mitiro 8:1-40
8 Sawule i wa sekela a kudawa ka Stefani.
Ka siku lego, a bandla legi gi nga hi Jerusalema gi no sangula ku xanisiwa nguvhu, vontlhe va hangalaka matlhelweni wontlhe ya Judhiya ni Samariya, ku sala vapostoli voce.
2 Kanilezvi a vavanuna vo kari va chavako Nungungulu va no rwala Stefani va ya mu lahla, va mu mahela cirilo ca hombe.
3 Hambulezvo Sawule i no sangula ku hlasela bandla, a dhumela mimiti a kokovisela vavanuna ni vavasati, a va vhalela paxweni.
4 Kanilezvi, lava va nga hangalakile matikweni lawo va no famba na va chumayela mahungu ya ma nene ya mhaka ya Nungungulu.
5 Filipu i no relela aya dhoropeni* ga Samariya a ya va chumayela ha Kristu.
6 A citshungu contlhe ci no demba ndleve ka lezvi Filipu a nga kari a wula na ci ingisela ni ku wona a zviwoniso lezvi a nga kari a maha.
7 Hakuva a votala va wa hi ni madhimoni; a madhimoni lawo ma waba huwa, ma huma. Ni votala va nga kala va nga zvi koti ku famba, ni zvilima va no hanyiswa.
8 Hikwalaho, ku nova ni litsako la hombe dhoropeni lego.
9 Ka dhoropa lego ku wa hi ni wanuna a nga vitaniwa ku hi Simoni, loyi a kale a nga tira zva wuloyi, a hlamalisa a tiko ga Samariya, na a ti wula lezvaku munhu wa hombe.
10 Vontlhe, kusukela ka loyi wa mutsongwani kala ka loyi wahombe, va wa demba ndleve kakwe, vaku: “A wanuna loyi i na ni ntamu wa hombe wa Nungungulu.”
11 Va wa demba ndleve kakwe hi lezvi ku nga hi ni cikhati co leha na a va hlamalisa hi mitiro yakwe ya wuloyi.
12 Kanilezvi, laha va ngazwa Filipu na a chumayela mahungu ya ma nene ya Mufumo wa Nungungulu, ni vito ga Jesu Kristu, a vavanuna ni vavasati va no kholwa va bhabhatiswa.
13 Simoni yenawu i no kholwa. Loku a bhabhatisilwe, i no simama na Filipu; i wa hlamaliswa hi ku wona zviwoniso ni zvihlamaliso zva hombe lezvi zvi nga mahiwa hi Filipu.
14 Laha a vapostoli le Jerusalema va ngazwa lezvaku a vaSamariya va amukele a mhaka ya Nungungulu, va no va rumelela Pedro na Johani.
15 Pedro na Johani va no relela vaya va khongelela lezvaku va amukela moya wo basa.
16 Hakuva i hava ni mun’we wabye a nga amukele a moya wo basa; va wa no bhabhatiswa basi hi vito ga Hosi Jesu.
17 Laha va nga va tlhateka mandla, va no sangula ku amukela moya wo basa.
18 A cikhati leci Simoni a nga wona lezvaku a moya wo basa wu amukelwa loku a vapostoli va tlhateka mandla, i nota kabye ni mali,
19 a taku: “Minawu ndzi nyikeni a ntamu lowu, kasi ni wihi loyi ndzi to mu tlhateka mandla a amukela moya wo basa.”
20 Kanilezvi Pedro i te ngalo kakwe: “A mali ya wena yi wa love zvin’we na wena, hakuva u alakanyile lezvaku u nga xava cinyikiwo ca Nungungulu hi mali.
21 Wena u nga tava ni ciavelo mhakeni leyi, hakuva a mbilu ya wena a yi lulamangi mahlweni ka Nungungulu.
22 Hikwalaho ti sole kubiheni ka wena, u kombela Jehovha lezvaku, loku zvi koteka, a ku tsetselela ka mixuvo yo biha ya mbilu ya wena;
23 hakuva ndza zvi wona lezvaku u vhenene yo bava* ni khumbi ya lezvi zvi nga lulamangiko.”
24 Simoni i no va hlamula aku: “Ndzi kombeleleni ka Jehovha kasi ni cin’we ca lezvi mu nga zvi wula ci nga ndzi weli.”
25 Hikwalaho, andzhako ka ku chumayela hi kumbhelela matshan’wini wontlhe ni ku kanela a mhaka ya Jehovha, va no tlhela Jerusalema na va kari va chumayela mahungu ya ma nene zvidhoropaneni zvo tala zva vaSamariya.
26 Kanilezvi a ngilozi ya Jehovha yi no byela Filipu yiku: “Suka uya dzongeni* ka ruwa gi relelako hi Jerusalema giya Gaza.” (A ruwa legi hi legi ga ciwula.)
27 Filipu i no suka a famba. Makunu i no wona a thenwa* wa le Etiyopiya, a nga hi hosana yi nga fumelwa hi Kandake, a hosi ya cisati ya vaEtiyopiya, loyi a nga wonelela a tshomba yontlhe ya Kandake. I wa yile Jerusalema a ya khozela.
28 Makunu laha a nga kari a tlhela kaya, i no tshama kareteni yakwe a ti lerela a bhuku ga muphrofeti Isaya hi gezu ga hombe.
29 A moya wuku ngalo ka Filipu: “Famba, u tshinelela a kareta liyani.”
30 Filipu i no tsutsuma, a famba hi laha reveni ga kareta, a muzwa na a lera a bhuku ga muphrofeti Isaya, aku kakwe: “Wa zvi zwisisa hakunene lezvi u lerako?”
31 Yena aku: “Ndzi nga zvi tivisa kuyini na ndzi nga hi na wo ndzi gondzisa?” Hikwalaho i no kombela Filipu lezvaku a khilela a tshama naye.
32 A mutsalo lowu a nga kari a lera, hi lowu waku: “A ku fana ni yivhu, i gulelwe kudaweni, niku a ku fana ni yivhana leyi yi miyelako mahlweni ka mugeri wa woya ga yona, yenawu a nga vhululi nomu wakwe.
33 Cikhatini leci a nga wisiwa tingana, va no mu tsona kululama. Himani a to hlawutela matimu ya cizukulwana cakwe ke? Hakuva a wutomi gakwe gi susilwe misaveni.”
34 A thenwa wu te ngalo ka Filipu: “Hi nga ndzi byela, kasi a muphrofeti i wula mani? I wula yena wutsumbu kutani i wula mun’wani munhu?”
35 Filipu i no vhulula nomu wakwe, a sangula hi mutsalo lowu, a mu gondzisa mahungu ya ma nene xungetano hi Jesu.
36 Laha va nga kari va famba, va no chikela ka wutshamu ku nga hi ni mati, a thenwa wuku ngalo: “A mati hi lawa, cini ci ndzi vhalelako a ku bhabhatiswa?”
37 *——
38 Zvalezvo i no laya a kareta lezvaku yi nyima. Filipu ni thenwa va no chika vaya matini, Filipu a mu bhabhatisa.
39 Laha va nga huma hi lomu matini, a moya wa Jehovha wu no susa Filipu laho hi kuhatlisa; a thenwa a wa ha mu wonangi kambe, kanilezvi wu no simama ku famba na wu tsakile.
40 Hambulezvo Filipu i no ya humelela le Azota. I no fambafamba cipandzeni leco a kanela mahungu ya ma nene zvidhoropaneni zvontlhe kala Khezariya.
Mitlhamuselo ya lahasi
^ Zvi nga ha wula ku: “dhoropeni go kari”.
^ Hi kukongoma: “u kubava ka nyongwa”.
^ Kutani: “sul”.
^ Kutani: “hosana”.
^ A vhesi legi a gi kona ka mitsalo yo kari ya kale. Hi cigelo leco a gi lumbi Mitsalo yi pimisilweko.
