Titusi 1:1-16
1 Mina Pawule, ndzi nga nandza ga Nungungulu ni mupostoli wa Jesu Kristu, mina loyi ndzi nga ni kukholwa ko fana ni loku ka vahlawulilweko va Nungungulu, na ndzi tiva lisine leli li zwananako ni kuhanya ka kukholwa
2 ku seketelwako ka kutsumba ka wutomi ga pindzukelwa, legi Nungungulu loyi a nga hembiko a gi tsumbisileko kaleloko,
3 kanilezvi hi cikhati cakwe ci yimisilweko i no tivisa a mhaka yakwe hi ntiro wa kuchumayela lowu ndzi nyikilweko hi kulaya ka Nungungulu, a Muhanyisi wa hina;
4 ndza ku tsalela wena Titusi, u nga n’wana wa mina wa lisine hi kota ya kukholwa loku hi hlengelako, ndziku:
A tipswalo, ni kurula, zvi tako hi ka Nungungulu a Papayi, ni ka Kristu Jesu a Muhanyisi wa hina, a zvive na wena.
5 Ndzi ku siyile le Kreta kasi u lulamisa a zvilo lezvi zvi nga byekele ni ku yimisa madhota ka dhoropa gin’we ni gin’wani, kota lezvi ndzi nga ku leletela ndziku:
6 A dhota gi fanele kuva munhu a nga solekiko, na a hi nuna wa sati mun’we, a nga ni vana va kholwako, lava va nga soliwiko hi kota ya ku phungela* ni kuva zvitlula-milayo.
7 Hakuva kota nandza ga Nungungulu, a dhota* a gi faneli ku soleka, ne kuva munhu wa kanu,* a gi faneli kuva ni cizangazangani, ne kuva cidhakwa, a gi faneli kuva munhu wa tiholova* ne ku navela bhindzu go biha,
8 kanilezvi i fanele ku randza ku amukela vapfhumba, a randza wunene, a hi ni kupima ku nene, a hi munhu wo lulama, wo tsumbeka, a zvi kotako ku ti khoma,
9 a landzelako khwatsi a mhaka yi tsumbekileko* kugondziseni kakwe, kasi a zvi kota ku tiyisa* hi gondzo leyi yi hanyisako* ni ku kawuka lava va kanetako.
10 Hakuva ku na ni zvitlula-milayo zvo tala, ni vanhu va wulawulako zvilo zvi nga vhuniko nchumu, ni vakanganyisi, nguvhunguvhu lava va vhuvhumisako wukwera.*
11 A vavanuna lava va fanele ku vhaliwa minomu hakuva va hohlota mimiti yiku bhi hi ku gondzisa zvilo zvi nga faneliko hi ku fela ku wuyelwa.
12 A muphrofeti wo kari wa tiko gabye, i te ngalo: “A vaKreta vahembi contlhe cikhati, zvihari zvo leva, ni makhobomu,* na va hi malolo.”
13 A wukustumunyu legi lisine. Hikwalaho, simama ku va kawuka, u nga va tsetsi, kasi va fela ku hanya khwatsi kukholweni,
14 va nga ingiseli a mitsheketo ya vaJudha ni milayo ya vanhu lava va hambukako lisineni.
15 A zvilo zvontlhe zvi basile ka lava va basileko; kanilezvi ka lava va nga hlazvekangiko ni vangakholwiko, a ku na cilo co basa, hakuva a maalakanyo yabye ni tivhalo tabye zvi nyenyezile.
16 Va wula lezvaku va mu tiva Nungungulu, kanilezvi va mu kaneta hi mitiro yabye, hakuva vanhu va manyala ni va nga ingisiko, niku a va vhuni nchumu mitirweni yontlhe yo saseka.
Mitlhamuselo ya lahasi
^ Kutani: “hi kota ya ku maha vhilinganya”.
^ Kutani: “a muwoneleli”.
^ Kutani: “kani”.
^ Kutani: “ligwaya”.
^ Kutani: “a mahungu ma tsumbekileko”.
^ Kutani: “khongotela”.
^ Kutani: “yi nene”.
^ Kutani: “a ku kina ngoma; a sirkusizawu; a ku tlula ngoma”.
^ Kutani: “vanhu va makolo”.
