Titusi 2:1-15
2 Kanilezvi wena simama ku gondzisa lezvi zvi zwananako ni gondzo yi hanyisako.*
2 A vavanuna va kulileko va fanele ku tiva ku ti khoma ka zvontlhe va mahako, na va hi vanhu vo dzundzeka, va nga ni kupima ku nene, va tiyileko kukholweni, ni lirandzweni, ni kutimiseleni.
3 A vavasati va kulileko vonawu va fanele kuva ni mahanyela ma dzundzekako, va nga hi na mahlevo, va nga ti mahi tikhumbi ta byala,* kanilezvi va wa gondzise lezvi zva zvi nene;
4 va gondzisa a vavasati lava va vatsongwani* a ku randza vanuna vabye ni ku randza vana vabye,
5 vava ni kupima ku nene, ni mahanyela ya kuhlazveka, va hlayisa mimiti* yabye, va hi va nene, va ti koramisa ka vanuna vabye kasi a mhaka ya Nungungulu yi nga soliwi.
6 Hikwalaho, simama ku kuca majaha lezvaku mava ni kupima ku nene;
7 uva cikombiso ka mitiro yo saseka matlhelweni wontlhe. Gondzisa lezvi zvi nga lisine* hi ku chela kota,
8 na u wulawula magezu ya ma nene ma nga hiko na kusoliwa, kasi a vakaneti va fela kuwa tingana, va vhumala ca ku* hi sola hi cona.
9 A tikhumbi ti wa ingise venyi va tona zvilweni zvontlhe, ti ti karatela ku va tsakisa, ti nga va hlamuli zvakubiha,
10 ti nga va yiveli, kanilezvi ti wa tsumbeke zvilweni zvontlhe kasi ni ka gihi tshamela ti fela ku sasekisa a gondzo ya Nungungulu, a Muhanyisi wa hina.
11 Hakuva a tipswalo ta Nungungulu ti wonekelisilwe na ti neha a kuhanyiswa ka vanhu va tixaka tontlhe.
12 Ta hi gondzisa ku fularela a mahanyela ma nga dzundziko Nungungulu, ni kunavela ka tiko, kanilezvi hi hanya tikweni legi* na hi hi ni kupima ku nene, ni kululama, ni ku chava Nungungulu,
13 na hi kari hi rindzela a kutsumba ko tsakisa ni kuwonekeliswa ko ngangamela ka Nungungulu wa hombe ni ka Muhanyisi wa hina, Jesu Kristu,
14 loyi a ti nyikeleko hi kota ya hina kasi ku hi tlhatlhisa kubiheni kontlhe, a ti basisela vanhu lava va nga tshomba yakwe yo hlawuleka, va ti tsitsiritako mitirweni yo saseka.
15 Simama ku gondzisa a zvilo lezvi, u khongotela ni ku kawuka hi ntamu wontlhe. U nga tsiki munhu a ku kanyisa.
Mitlhamuselo ya lahasi
^ Kutani: “yi nene”.
^ Hi kukongoma: “vhinyo”.
^ Kutani: “lava va vaswa”.
^ Kutani: “va tira mimitini”.
^ Kutani: “lezvi zvi basileko”.
^ Kutani: “ca kubiha ca ku”.
^ Kutani: “nguveni leyi”. Wona laha ka ku: “Nguva” ka Tlhamuselo wa magezu ya Bhibhiliya.
