Titusi 3:1-15
3 Simama ku va alakanyisa lezvaku va ti koramisa ni ku ingisa a wuhosi ni vafumeli, ni ku tshama na va longile ku maha mitiro yontlhe yo saseka,
2 va nga wulawuli kubiha hi munhu, va ngavi vanhu va maguwa, kanilezvi va hi va nene, va kombisa kuolova ka vanhu vontlhe.
3 Hakuva a kale hinawu hi wa hi zvipumbu, hi wa nga ingisi, hi wa hambukisilwe, hi wa hi tikhumbi ta kunavela ni kutitsakisa ko tala; hi wa hi vanhu va kubiha ni va timbilu, va ku nyenyiwa, na hi vengana.
4 Kanilezvi a cikhati leci a tipswalo ta Nungungulu, a Muhanyisi wa hina, ni lirandzo lakwe hi vanhu zvi nga wonekeliswa,
5 i no hi hanyisa hi ku hi hlambisa hi mati lawa ma hi nyikileko wutomi ni ku hi maha vanhu va vaswa hi moya wo basa (na ku nga hi hi kota ya mitiro yo lulama hi yi mahileko, kanilezvi hi kota ya wuxinji gakwe).
6 I no hi chululela a moya wakwe na a nga feleli hi ku tirisa Jesu Kristu, a Muhanyisi wa hina,
7 kasi loku makunu hi wulilwe ku hi vanhu vo lulama hi kota ya tipswalo takwe, hiva vagi va tshomba ya wutomi ga pindzukelwa legi hi gi rindzelako.
8 A timhaka leti ti tsumbekile. Ndzi lava lezvaku u wulawula hi tona hi kuphindaphinda, kasi lava va kholwako ka Nungungulu va simama ku ti tsitsirita va maha mitiro yo saseka. A timhaka leti ti nene, ta vhuna ka vanhu.
9 Kanilezvi wena fularela timhaka ta wupumbu ni matimu ya tixaka ta vakokwani, ni kukanetisana, ni kulwa hi kota ya Nayo, hakuva lezvo a zvi na bhindzu ne a zvi vhuni nchumu.
10 Xungetano hi loyi a hambukileko lisineni a gondzisa yin’wani gondzo, loku u mu kawukile* a khati go sangula ni ga wumbiri kanilezvi a nga ingisi, tsawukana naye,
11 na u tiva lezvaku a munhu loye i hambukile ndleleni, wa wonha, niku i ti konile ha yece.
12 A cikhati leci ndzi to ruma Artemasi kutani Tikikusi ata ka wena, hatlisa uta ka mina le Nikopolisi, hakuva ndzi xuva ku ya tshama laho hi nguva ya cirami.
13 Nyika Zenasi, a nga tlhari ya Nayo, na Apolosi zvontlhe lezvi va to zvi lava kasi va nga vhumali nchumu lipfhumbeni labye.
14 Kanilezvi tsika a va ka hina vonawu va gondza ku maha mitiro yo saseka, va fela ku zvi kota ku vhunetela loku ku tshuka ku humelela zva cihatla, kasi va simama ku pswala mihandzu.
15 Vontlhe lava va nga na mina va ku rungula. Rungula lava va hi randzako kukholweni.
A tipswalo ta Nungungulu a tive na n’wina n’wentlhe.
Mitlhamuselo ya lahasi
^ Kutani: “tlharihisile”.
