Va Le Efesusi 1:1-23
1 Mina Pawule, ndzi nga mupostoli wa Kristu Jesu hi kurandza ka Nungungulu, ndza tsalela vobasa va nga le Efesusi, lava va tsumbekileko ka Kristu Jesu, ndziku:
2 A tipswalo ni kurula zvi tako hi ka Nungungulu tlhelo Papayi wa hina ni ka Hosi Jesu Kristu, a zvive na n’wina.
3 I wa dzundziwe Nungungulu tlhelo Papayi wa Hosi ya hina Jesu Kristu, hakuva i hi katekisile hi makatekwa yo tala ya moya ya le tilweni, kota lezvi hi nga ka Kristu,
4 hi lezvi a nga hi hlawula, a tiko na gi nga se vangiwa, lezvaku hiva zvin’we naye,* kasi hi mu randza, hiva vobasa, na hi nga hi na noda mahlweni kakwe.
5 Hakuva i wa zvi tiva lezvaku i ta hi hlawula a hi maha vana vakwe ha Jesu Kristu, kota kuxuva kakwe ni kurandza kakwe,
6 kasi a vanhu va mu dhumisa hi kota ya tipswalo ta hombe leti a ti kombisileko ka hina hi N’wana wakwe wo randzeka.
7 Ha tlhatlhiswa ha yena hi hakhelo ya kutlhatlhisa ya nkhata wakwe, ku nga lezvaku hi tsetselelwa zviwonho zva hina hi kota ya kutala ka tipswalo ta Nungungulu.
8 Nungungulu i no hi chululela tipswalo to tala nguvhu hi ku hi nyika wutlhari gontlhe ni kuzwisisa,
9 a tlhela a hi tivisa cihundla co basa ca kurandza kakwe. Hi kuxuva kakwe, i no maha makungo
10 ya ku yimisa a xaxameto kumbheleni ka cikhati ci yimisilweko, lezvaku a tlhanganisa zvilo zvontlhe ka Kristu, a zvilo zva le tilweni ni zvilo zva laha misaveni. Ka Kristu
11 hi yimisilwe a kuva vagi va tshomba, ku nga mhaka leyi Nungungulu a nga sina a yi mahele makungo, kota kuxuva kakwe, hakuva i maha zvilo zvontlhe hi kurandza kakwe
12 kasi a dzundziwa ni ku dhumisiwa hi kota ya hina lava hi rangileko hi tsumba ka Kristu.
13 Kanilezvi n’winawu, andzhako ka loku mu zwile a mhaka ya lisine, ma nga mahungu ya ma nene ya kuponisiwa ka n’wina, mu no mu tsumba. Laha mu nga kholwa, i no mu vekela cifungo* hi moya wo basa lowu wu tsumbisilweko,
14 kota citiyisekiso ca tshomba ya hina, kasi ku tlhatlhisa a tshomba ya Nungungulu hi hakhelo ya kutlhatlhisa, lezvaku a dhumiswa nguvhu.
15 Hikwalaho, na minawu cima ndzizwa hi kukholwa loku mu nga nako ka Hosi Jesu ni lirandzo leli mu li kombisako ka vobasa vontlhe,
16 a ndzi tsiki ku bonga Nungungulu hi kota ya n’wina; ndza mu kumbuka mikhongelweni ya mina.
17 Ndzi kombela lezvaku a Nungungulu wa Hosi ya hina Jesu Kristu, a Papayi wa kungangamela, a mu nyika a moya wa wutlhari ni wa kuvhululelwa lezvaku mu fela ku mu tiva khwatsi.
18 I woningele a matihlo ya n’wina* kasi mu fela ku tiva lezvaku cini a kutsumba loku a mu vitaneleko kona, ni ku tiva a talela ga titshomba leti Nungungulu a vekeleko vobasa.
19 A ntamu wakwe wa hombe wa woneka ka lezvi a wu tirisisako zvona ka hina lava hi kholwako. A wukulu ga wona gi wonekile laha a nga wu tirisa
20 kasi ku vhuxa Kristu hi ka vafileko, a mu tshamisa reveni gakwe ga cinene le tilweni,
21 hehla ka mifumo yontlhe, ni mitamu, ni wukulu, ni wuhosi, ni ka mavito wontlhe ma nga kona, na ku nga hi ka cikhati leci* basi, kanilezvi ni ka cikhati leci ca ha tako.
22 I no veka zvilo zvontlhe kambe lahasi ka mikondzo yakwe, a mu maha hloko ya zvilo zvontlhe lomu bandleni,
23 legi gi nga miri wakwe, gi teleko hi yena loyi a tatisako zvilo zvontlhe ka vontlhe.
Mitlhamuselo ya lahasi
^ Ku nga Kristu.
^ Kutani: “marka”.
^ Hi kukongoma: “matihlo ya timbilu ta n’wina”.
^ Kutani: “nguva leyi”. Wona laha ka ku: “Nguva” ka Tlhamuselo wa magezu ya Bhibhiliya.
