Va Le Efesusi 2:1-22
2 A ku tsika lezvo, Nungungulu i no mu vhuxa, hambu lezvi mu nga file zvihoxweni ni zviwonhweni zva n’wina,
2 ku nga lezvi mu nga famba ka zvona kale mu pimanyisa a mahanyela ya tiko legi, mu landzela a hosi ya moya wa tiko legi, wu nga moya lowu wu fumelako lava va nga ingisiko.
3 Kunene, hina hontlhe hi wa hanyisa ku khwatsi hi vona, hi landzela kunavela ka nyama ya hina, hi maha kurandza ka nyama ni ka maalakanyo. Hi mabeleko, hi wa hi vanana va ringanelwako hi zanga ya Nungungulu a ku fana ni van’wani.
4 Kanilezvi kota lezvi Nungungulu a teleko hi wuxinji, ni lezvi a hi randzileko hi lirandzo lakwe la hombe,
5 i no hi vhuxa zvin’we na Kristu, hambu lezvi hi nga file zvigohweni zva hina — phela mu hanyisilwe hi tipswalo.
6 Kota lezvi hi nga ka Kristu Jesu, Nungungulu i no hi vhuxa zvin’we naye, a tlhela a hi tshamisa zvin’we naye zvitshan’wini zva le tilweni,
7 kasi ka cikhati ci tako* a fela ku kombisa a kukula ka tipswalo takwe hi wuxinji legi a hi mahelako hina lava hi nga ka Kristu Jesu.
8 Hi kota ya tipswalo leti, mu ponisilwe hi kukholwa; lezvo a zvi kotekangi hi ntamu wa n’wina, kanilezvi cinyikiwo ca Nungungulu.
9 A zviti hi kota ya mitiro, kasi ku ngavi na munhu a ti dzundzako.
10 Hina hi handzu wa ntiro wa Nungungulu, niku kota lezvi hi nga vapizani va Kristu Jesu, hi vangelwe ku maha mitiro yo saseka leyi Nungungulu a hi yimiseleko yona na ka ha hi mahlweni kasi hi yi maha.
11 Hikwalaho, alakanyani lezvaku a kale, “lava va nga mahilwe wukwera”* ga nyama hi mandla ya vanhu, va wa vitana n’wina vamatiko hi ka nyama, lezvaku “mu vanhu vo kala ku mahiwa wukwera”.
12 Ka cikhati leco mu wa hambene na Kristu, mu wa tsawukene ni tiko ga Izrayeli, ne mu wa nga hlayiwi ka zvivhumelwano zva citsumbiso; na ma ha hi tikweni, mu wa nga hi na kutsumba ne mu wa nga hi na Nungungulu.
13 Hambu lezvi a kale mu nga hi kule na Nungungulu, lezvi makunu mu nga ka Kristu Jesu, mu kusuhani na Nungungulu hi kota ya nkhata wa Kristu.
14 Kristu i hi nehele kurula, hakuva hi yena a nga patsa mitlawa leyi ya yimbiri yi maha wun’we, a tlhela a khungumula a libhiyo leli li nga kari li hambanisa mitlawa leyo.
15 Hi nyama yakwe i no fuvisa livengo, wu nga Nayo wa Mosi lowu wu nga tele hi zvileletelo, kasi hi mitlawa leyi ya yimbiri yi nga ka yena a wumba munhu mun’we wa muswa, ni ku neha kurula.
16 I no tlhanganisa mitlawa leyi ya yimbiri hi kumbhelela yiva miri wun’we ka Nungungulu hi ku tirisa mhandze ya hlomulo,* hakuva i lovisile livengo hi miri wakwe.
17 I nota a ta kanela mahungu ya ma nene ya kurula ka n’wina lava mu nga hi kule ni ka lava va nga hi laha kusuhani,
18 hakuva hi kota ya yena, hina na vona hi tlhatlhekile ku wulawula na Papayi hi moya walowu wa wun’we.
19 Hikwalaho, n’wina a ma ha hi vapfhumba niku a ma ha hi vamatiko, kanilezvi mu zvisumbulwa-kuloni ni vobasa tlhelo zviro zva ngango wa Nungungulu.
20 Mu akilwe hehla ka ciseketelo ca vapostoli ni vaphrofeti, leci Kristu Jesu wutsumbu a nga ribye ga laha khoneni ga ciseketelo leco.
21 Ka yena, a yindlu yontlhe yi maha tempeli yo basa ya Jehovha, a zvipandze zvontlhe na zvi tlhanganiselwe khwatsi.
22 Ka yena, n’winawu mu kari mu akiwa lezvaku muva yindlu leyi Nungungulu a to tshama ka yona hi moya.
Mitlhamuselo ya lahasi
^ Kutani: “ka tinguva ti tako”. Wona laha ka ku: “Nguva” ka Tlhamuselo wa magezu ya Bhibhiliya.
^ Kutani: “kinisilwe ngoma; sirkusizawu; tlulisilwe ngoma”.
^ Wona Tlhamuselo wa magezu ya Bhibhiliya.
