Va Le Efesusi 3:1-21
3 Hikwalaho, mina Pawule, ndzi nga cibochwa ca Kristu Jesu hi kota ya n’wina vamatiko . . .*
2 Ndzi alakanya ku mu zvi zwile lezvaku ndzi nyikilwe a ntiro wa kuva nandza ga tipswalo ta Nungungulu ka n’wina,
3 ku nga lezvaku ndzi vhululelwe cihundla co basa, kota lezvi ndzi sinako ndzi mu tsalele hi magezu ma tsongwani.
4 Hikwalaho a cikhati leci mu to gondza a timhaka leti, mu ta zvi wona lezvi ndzi ci tivisako zvona a cihundla co basa ca Kristu.
5 A cihundla leci a ci tivisiwangi hi kumbhelela ka zvizukulwana zvin’wani zva vana va vanhu, a ku khwatsi hi lezvi makunu ci tivisiswako zvona hi moya ka vapostoli vo basa ni vaphrofeti,
6 ku nga lezvaku a vamatiko va fanele kuva vagi va tshomba zvin’we na hina, ni kuva zviro zva miri zvin’we na hina, ni kuva vahlengeli va citsumbiso zvin’we na hina ka Kristu Jesu hi mahungu ya ma nene.
7 Mina ndzi nova nandza ga cihundla leci hi kota ya cinyikiwo ca tipswalo ta Nungungulu leti ndzi nyikilweko tona hi kutira ka ntamu wakwe.
8 Mina loyi wa mutsongwani nguvhu cikari ka vobasa vontlhe, ndzi no nyikiwa a tipswalo leti kasi ku kanela ka vamatiko a mahungu ya ma nene ya titshomba ta Kristu ti nga hiko na kupimiwa,
9 ni ku kombisa ka vanhu vontlhe lezvi Nungungulu a rangelisako zvona a matirela ya cihundla co basa, leci cima ka kale ci nga tiviwa hi Nungungulu yece, loyi a nga vanga zvilo zvontlhe.
10 Makunu lezvo zvi mahekile kasi a mifumo ni wuhosi ga le tilweni zvi fela ku tiva a wutlhari ga Nungungulu legi a gi kombisako hi tindlela to tala hi ku tirisa bandla.
11 Lezvi zvi longoloka ni kungo ga pindzukelwa legi a nga gi maha ha Kristu Jesu a Hosi ya hina,
12 loyi hi tiyako ha yena a ku tshinela ka Nungungulu* hi kutsumba ni ku kholwa ka Kristu.*
13 Hikwalaho ndza mu khongotela lezvaku mu nga rereki hi ku wona tixanisa leti ti ndzi weleko hi kota ya n’wina, hakuva wudzundzo ka n’wina.
14 Hi kota ya lezvo, ndza khizama mahlweni ka Papayi,
15 loyi a mingango yontlhe ya le tilweni ni ya laha misaveni yi vangilweko* hi yena,
16 ndzi khongelela lezvaku hi kungangamela kakwe ka hombe, Nungungulu a tiyisa a munhu wa n’wina wa lomu ndzeni hi ntamu wa moya wakwe,
17 ni lezvaku hi kukholwa ka n’wina, Kristu a tshama timbilwini ta n’wina zvin’we ni lirandzo leli mu li kombisako. Zimani mitsu, mu tiya ciseketelweni,
18 kasi zvin’we ni vobasa vontlhe, mu zvi kota ku tiva a kuanama, ni kuleha, ni kutlakuka, ni kueta,
19 ni ku tiva a lirandzo la Kristu leli li hundzako a kutiva kontlhe, lezvaku mu tala hi matshamela wontlhe lawa Nungungulu a hi nyikako.
20 Makunu, ka yena loyi a nga ni ntamu wa ku maha zvotala nguvhu ku hundza zvontlhe lezvi hi zvi kombelako kutani ku zvi alakanya, hi kuya hi ntamu wakwe wu tirako cikari ka hina,
21 a wudzundzo a give ka yena hi ka bandla ni ka Kristu Jesu zvizukulwaneni zvontlhe kala kupindzuka ni kupindzuka. Amen.
Mitlhamuselo ya lahasi
^ Ko khwatsi a mongo wa vhesi legi wu simama ka vhesi 14.
^ Kutani: “loyi ha yena hi tiyako ku wulawula ni vanhu”.
^ Hi kukongoma: “kakwe”.
^ Kutani: “yi chulilweko”.
