Va Le Efesusi 6:1-24
6 Vana, ingisani vapswali va n’wina kota kurandza ka Hosi,* hakuva lezvo zvi lulamile.
2 “Kombisa cichavo ka papayi wa wena ni mamani wa wena” hakuva lowu hi wona a nayo wo sangula wu nga ni citsumbiso, caku:
3 “Kasi u fela ku kateka,* u hanya cikhati co leha laha misaveni.”
4 Na n’winawu vapapayi, mu nga zangarisi vana va n’wina, kanilezvi simamani ku va wundla hi kugondzisa ni kulaya ka Jehovha.
5 N’wina tikhumbi, ingisani venyi va n’wina hi kuchava ni kururumela, mu va ingisa hi mbilu yontlhe a ku khwatsi hi loku mu ingisa Kristu,
6 na ku nga hi ntsena loku mu woniwa, kasi ku tsakisa vanhu, kanilezvi tirani kota malandza ya Kristu, ma mahako kurandza ka Nungungulu hi muhefemulo* wontlhe.
7 Tirani hi kutitsitsirita a ku khwatsi hi loku mu tirela Jehovha na ku nga hi vanhu,
8 hakuva ma zvi tiva lezvaku ni wihi nchumu wa wu nene lowu a munhu a mahako i ta tlheliselwa hi Jehovha, kani a munhu loye i khumbi kani munhu a tlhatlhekileko.
9 N’winawu venyi, mahani zvalezvo ka tikhumbi ta n’wina, mu nga ti dzukiseli, hakuva ma zvi tiva lezvaku loyi a nga Hosi ya tona ni ya n’wina i le tilweni, niku a nga na cihlawulela.
10 Hi kugumesa, tiyani Hosini ni ntan’wini wa yona wa hombe.
11 Hlomani a matlhari wontlhe ya Nungungulu kasi mu zvi kota ku yima mu tiya mu ku nde mulwa ni mano ya Sathani;*
12 hakuva a yimpi ya hina a hi ya kulwa ni nkhata ni nyama, kanilezvi hilwa ni mifumo,* ni vafumeli, ni tihosi ta tiko ta munyama lowu, ni mimoya ya kubiha ya le tilweni.
13 Hikwalaho, hlomani a matlhari wontlhe ya Nungungulu kasi muva ni ntamu wa ku yima mu tiya sikwini ga khombo ni ku simama mu tiyile loku mu hlulele magumo.
14 Makunu tiyani mu ku nde, na mu bohile libhandi la lisine li tiya zviwunwini zva n’wina, ni cikatawu ca simbi ca kululama,
15 na mu bohile a zvilato zva mahungu ya ma nene ya kurula mikondzweni ya n’wina.*
16 Ahandle ka zvontlhe lezvo, khomani a citlhangu ca hombe ca kukholwa, kasi mu tima hi cona a mipaxa yontlhe yi vhurako ya loyi wa kubiha.
17 Bohani ni cihuko* ca simbi ca kuhanyiswa, mu khoma cipadha ca moya, yi nga mhaka ya Nungungulu.
18 Khongelani hi moya contlhe cikhati hi mikombelo ya tixaka tontlhe ni kukhongotela kontlhe. Hikwalaho tshamani na mu rindzele, mu khongelela vobasa vontlhe contlhe cikhati.
19 Minawu ndzi khongeleleni lezvaku ndzi nyikiwa magezu yo wula a cikhati leci ndzi to vhulula nomu ndzi kanela hi cihundla co basa ca mahungu ya ma nene hi kutiya,
20 lawa ndzi nga embaxadhori* wa wona na ndzi bohilwe hi machini,* ni lezvaku ndzi zvi kota ku wulawula hi wona hi kutiya, kota lezvi ndzi faneleko ku wulawula.
21 Tikikusi a makabye a randzekako, a nga nandza go tsumbeka Hosini, i ta mu byela a mavhukela ya mina, a mu tivisa zvontlhe.
22 Hi cigelo leco, ndza mu rumela ka n’wina kasi mu tiva a mavhukela ya hina ni lezvaku a ta tiyisa timbilu ta n’wina.
23 A kurula ni lirandzo ni kukholwa zvi tako hi ka Nungungulu, a Papayi, ni ka Hosi Jesu Kristu, a zvive na n’wina vamakabye.
24 A tipswalo a tive ni vontlhe lava va randzako Hosi ya hina Jesu Kristu hi lirandzo li nga wonhekiko.
Mitlhamuselo ya lahasi
^ Kutani: “ingisani vapswali va n’wina Hosini”.
^ Kutani: “Kasi zvi ku fambela khwatsi”.
^ Wona Tlhamuselo wa magezu ya Bhibhiliya.
^ Hi ciGreki: di·á·bo·los, zvi wulako ku “mulumbeti”.
^ Ko khwatsi a mifumo leyi ku wuliwa a mifumo yi nga wonekiko ya moya.
^ Kutani: “na mu longile ku kanela a mahungu ya ma nene ya kurula”.
^ Kutani: “capacete”.
^ Kutani: “muyimeli”.
^ Kutani: “makorente”.
