Va Le Filipi 1:1-30
1 Mina Pawule ndzi nga na Timote, hi nga malandza ya Kristu Jesu, ndza tsalela a vobasa vontlhe va le Filipi va nga ka Kristu Jesu, zvin’we ni madhota* ni malandza yo vhunetela, ndziku:
2 A tipswalo ni kurula zvi tako hi ka Nungungulu tlhelo Papayi wa hina ni ka Hosi Jesu Kristu, a zvive na n’wina.
3 Ndzi bonga Nungungulu wa mina contlhe cikhati leci ndzi mu alakanyako
4 mikhongelweni yontlhe leyi ndzi yi mahelako n’wina n’wentlhe. Ni wihi mukhongelo ndzi mu mahelako, ndzi wu maha na ndzi tsakile,
5 hi kota ya kutitsitsirita ka n’wina ntirweni wa ku hangalasa mahungu ya ma nene kusukela siku go sangula mu nga mazwa kala nyamutlha.
6 Hakuva a ndzi kanakani lezvaku loyi a nga sangula a ntiro lowu wo saseka cikari ka n’wina i ta tlhela a wu mbhetisa kala sikwini ga Kristu Jesu.
7 Zva fanela a kuva ndzi alakanya lezvo hi n’wina n’wentlhe, hakuva ndzi na n’wina mbilwini ya mina, n’wina hi hlengelako a tipswalo na ndzi bohilwe hi machini* ni loku ndzi kari ndzi lwela a mahungu ya ma nene ni ku ma tiyisa hi nayo.
8 Hakuva Nungungulu wa kustumunya lezvaku ndza mu xuva nguvhu n’wina n’wentlhe hi lirandzo la hombe lo fana ni leli la Kristu Jesu.
9 Leci ndzi nga tsikiko ku kombela mikhongelweni ya mina hi lezvaku a lirandzo la n’wina li simama ku andza, nguvhunguvhu kutiveni ni kupimisiseni kontlhe,
10 mu fela ku tiva lezvi zvi nga zva lisima nguvhu kasi mu nga soleki hi nchumu ni ku khunguvanyisa van’wani kala sikwini ga Kristu,
11 ni lezvaku mu pswala mihandzu yo tala ya kululama yi tako ha Jesu Kristu, kasi Nungungulu a dhumiswa a tlhela a dzundziwa.
12 Makunu vamakabye, ndzi lava ku mu zvi tiva lezvaku lezvi zvi nga ndzi humelela, zvi vhunile ku vhuvhumisa a mahungu ya ma nene,
13 hakuva zvi wonekile kubaseni ka masochwa wontlhe ya hosi ni ka vanhu vontlhe lezvaku ndzi bohilwe hi machini* hi kota ya Kristu.
14 A kutala ka vamakabye va kholwako ka Hosi, va no tiya hlana hi ku ndzi wona na ndzi bohilwe hi machini,* niku makunu va tiya nguvhu a ku kanela mhaka ya Nungungulu na va nga chavi nchumu.
15 Kunene, a vokari va chumayelako Kristu va zvi maha hi matshoho ni mubango, kanilezvi a van’wani va zvi maha hi timbilu ti basileko.
16 Lava va timbilu ti basileko va kanela Kristu hi ku mu randza, hakuva va zvi tiva lezvaku mina ndzi yimiselwe a ku lwela a mahungu ya ma nene;
17 kanilezvi lava van’wani va zvi maha hi mubango, a va zvi mahi hi timbilu ti basileko, hakuva va lava ku ndzi vhuxela hlomulo machinini* lawa ndzi bohilweko hi wona.
18 Hambulezvo hi gihi a bhindzu ga kona? Loku va chumayela Kristu, kani va zvi maha hi matshoho ni mubango kani va zvi maha hi timbilu ti basileko, mina ndza tsaka. Futsi ndza ha ta simama ndzi tsaka
19 hakuva ndza zvi tiva lezvaku a magumo ya kona kuva ndzi ponisiwa hi kota ya mikhongelo ya n’wina ni ku vhuniwa hi moya wa Jesu Kristu.
20 Lezvi zvi longoloka ni kuxuva ka hombe ni kutsumba loku ndzi nga nako ka lezvaku ndzi nga ta tshuka ndzi wisiwa tingana. Kanilezvi hi kuva ndzi tiya hlana ndzi wulawula, Kristu i ta dhumisiwa ka cikhati leci, kota lezvi a sinako a dhumisiwa mirini wa mina, kani ndzafa kutani ndza hanya.
21 Hakuva ka mina, loku ndzi hanya, ndzi hanyela Kristu, ni loku ndzifa, ndzo bhindzula.
22 Kanilezvi loku ndzi simama ndzi hanya nyameni, ndzi ta mu bhindzulela nguvhu Kristu. Hambulezvo ndzi nga ta wula a ku ndzi hlawula yini.
23 Ndza kokiwa hi matlhelo mambiri, hakuva ndza zvi lava ku tlhatlhisiwa ndzi yava zvin’we na Kristu, kunene, lezvo hi zvona zvo saseka nguvhu.
24 Hambulezvo zva laveka nguvhu lezvaku ndzi simama nyameni hi kota ya n’wina.
25 Hikwalaho, ndza zvi tiva lezvaku ndza ha ta simama nyameni ndzi hanya zvin’we na n’wina n’wentlhe kasi mu kula ni ku tsaka kukholweni,
26 lezvaku a litsako la n’wina li fela ku tala li halakela ka Kristu Jesu hi kota ya mina, loku hi tlhela hiva zvin’we.
27 Leci basi ci lavekako, ku mu hanya hi ndlela yi longolokako ni mahungu ya ma nene xungetano hi Kristu, kasi loku ndzita ndzi ta mu wona, hambu loku ndzi ngati, ndzizwa mahungu ya n’wina ndzi zvi tiva lezvaku mu yimile mu tiya moyeni wun’we hi muhefemulo wun’we,* na mu lwela a kukholwa ka n’wina ka mahungu ya ma nene hi mbilu yin’we,
28 mu nga tshuki mu chava lava va mu vhukelako. A mhaka leyi cikombiso kabye ca lezvaku va ta lovisiwa, kanilezvi ka n’wina cikombiso ca lezvaku mu ta ponisiwa; a mhaka leyi yita hi ka Nungungulu.
29 Hakuva mu nyikilwe thomo hi kota ya Kristu, na ku nga hi lezvaku mu kholwa kakwe basi, kanilezvi ni ku xaniseka hi kota ya yena.
30 Hakuva mulwa a yimpi yo fana ni leyi mu ndzi wonileko na ndzilwa, yi nga yaleyi mu zwako lezvaku ndza halwa.
Mitlhamuselo ya lahasi
^ Kutani: “vawoneleli”.
^ Kutani: “makorente”.
^ Kutani: “makorente”.
^ Kutani: “makorente”.
^ Kutani: “ka makorente”.
^ Kutani: “hi kungo gin’we”.
