Va Le Filipi 3:1-21
3 Vamakabye va mina, hi kugumesa ndzi ngalo: Simamani ku tsaka Hosini. A ndzi karali ku mu tsalela timhaka taleti ta tin’we, hakuva ta mu vhikela.
2 Ti woneleni ka timbyana;* ti woneleni ka lava va mahako zvakubiha; mu ti wonela ka lava va vhuvhumisako wukwera.*
3 Hakuva hina, hi hina hi mahilweko wukwera* ga lisine, ku nga hina lava hi mahako ntiro wo basa hi moya wa Nungungulu ni ku ti dzundza ka Kristu Jesu, na hi nga veki a kutsumba ka hina nyameni,
4 hambu lezvi mina ndzi nga ni zvigelo zva kuva ni kutsumba nyameni a ku hundza vontlhe.
Loku a mun’wani munhu a alakanya lezvaku i na ni zvigelo zva kuva ni kutsumba nyameni, mina ndza mu pala:
5 Hakuva ndzi mahilwe a wukwera* hi siku ga wu 8, ndzi muIzrayeli wa lixaka la ka Bhenjamini, ndzi muHebheru a pswalilweko hi vaHebheru; hi tlhelo ga nayo ndzi muFarisi;
6 hi tlhelo ga kutitsitsirita, ndzi wa xanisa bandla; xungetano hi kululama loku ku tako hi ku ingisa nayo, ndzi wa nga soleki.
7 Hambulezvo, a zvilo lezvi a kale zvi nga hi zva lisima ka mina,* a zva ha vhuni nchumu hi kota ya Kristu.
8 Kunene, ka mina a zvilo zvontlhe a zvi vhuni nchumu loku ndzi zvi ringanisa ni lisima la hombe la ku tiva Kristu Jesu a Hosi ya mina. Hakuva hi kota ya yena, ndzi vhumelile ku luza zvilo zvontlhe niku ka mina zvi fana ni nhulu ya chaka, kasi ndzi fela ku kuma Kristu
9 ndziva zvin’we naye, na ku nga hi hi kululama ka mina loku ku tako hi ku ingisa nayo, kanilezvi hi kota ya kululama loku ku tako hi ku kholwa ka Kristu, ku nga kululama ku tako hi ka Nungungulu loku ku kumiwako hi kukholwa.
10 Leci ndzi ci lavako ku tiva Kristu, ndzi tiva ni ntamu wa kuvhuka kakwe, ndzi tlhela ndzi xaniseka a ku khwatsi hi yena, ni lezvaku a kufa ka mina ku fana ni loku kakwe,
11 kasi loku zvi koteka ndzi vhuka zvin’we ni lava va to ranga ku vhuxiwa hi ka vafileko.
12 A hi lezvaku ndzo sina ndzi kumile a nchachazelo kutani ku ndzo sina ndzi mbhelele, kanilezvi ndza ti tsitsirita kasi minawu ndzi kuma lezvi Kristu Jesu a ndzi hlawuleleko zvona.
13 Vamakabye, a ndzi wuli lezvaku ndzi sina ndzi wu kumile, kanilezvi leci ndzi ci tivako hi leci: Ndzi rivala zva lendzhako ndzi ti gwimba kasi ndzi kuma zva le phambeni,
14 ndziwa ndzi vhuka na ndziya seyo, kala ndzi kuma nchachazelo wa kuvitaniwa tilweni hi Nungungulu ha Kristu Jesu.
15 Hikwalaho, hina lava hi buvhileko, a hi veni ni kupima loku, kanilezvi loku hi ndlela yo kari mu hi ni kupima ko hambana ni loku, Nungungulu i ta mu vhululela a kupima loku ku lavekako.
16 Ni ka gihi tshamela, kani hi buvhile kala kwihi, a hi simameni ku fambisa zvalezvo.
17 Makunu vamakabye, ndzi pimanyiseni hi mbilu yin’we, na mu cuwukisa lava va landzako a cikombiso leci hi nga mu siyela.
18 Hakuva ku na ni votala va fambako kota valala va mhandze ya hlomulo* ya Kristu, lava a kale ndzi nga tala ku va kumbuka, kanilezvi zvalezvi ndzi va kumbukako hi mihloti.
19 A magumo yabye ku lovisiwa, niku a nungungulu wabye i khwiri. Va ti dzundza hi zvilo lezvi va nga fanele kuwa tingana hi zvona, a kupima kabye va ku veka ka zvilo zva laha misaveni.
20 Kanilezvi a wusumbulwa ga hina ga le matilweni, ku nga lomu Hosi Jesu Kristu, a muhanyisi loyi hi mu rindzelako hi kuxuva ka hombe, a tako hi kona.
21 I ta hundzulusa a miri wa hina wo kala ku nyawula wu fana ni miri wakwe wo ngangamela hi ku tirisa ntamu wakwe wa hombe, lowu a zvi kotako ku veka ha wona a zvilo zvontlhe lahasi kakwe.
Mitlhamuselo ya lahasi
^ Ku wuliwa vanhu va mahanyela yo nyenyeza.
^ Kutani: “va kinisako ngoma; va mahisako sirkusizawu; va tlulisako ngoma”.
^ Kutani: “kinisilweko ngoma; sirkusizawu; tlulisilweko ngoma”.
^ Kutani: “kinisilwe ngoma; sirkusizawu; tlulisilwe ngoma”.
^ Zvi nga ha wula ku: “a zvilo lezvi ndzi zvi tsikileko hi kurandza ka mina”.
^ Wona Tlhamuselo wa magezu ya Bhibhiliya.
