Va Le Filipi 4:1-23
4 Hikwalaho vamakabye va mina ndzi mu randzako ni ku mu xuva, n’wina lava mu nga litsako la mina ni cidlodlo* ca mina, tiyani mu ku nde Hosini kota lezvi ndzi wulileko.
2 Ndza khongotela Evhodhiya na Sintike lezvaku vava ni kupima kun’we Hosini.
3 Ndza ku khongotela na wenawu kota mutiri-kulori wo tsumbeka, lezvaku u simama ku vhuna vavasati lava, hakuva va tirile hi kutikarata zvin’we na mina hi kota ya mahungu ya ma nene, na Klemente zvin’we ni van’wani vatiri-kulori lava a mavito yabye ma tsalilweko bhukwini ga wutomi.
4 Tsakani Hosini contlhe cikhati. Ndza engeta ndziku: Tsakani!
5 A wunene ga n’wina gi wa tiviwe hi vanhu vontlhe. A Hosi yi laha kusuhani.
6 Mu nga karateki hi nchumu, kanilezvi timhakeni tontlhe tivisani Nungungulu zvontlhe lezvi zvi mu karatako hi ku kombela ni ku khongotela, na mu kari mu bonga;
7 a kurula ka Nungungulu loku ku hundzako a kupima kontlhe, ku ta hlayisa a timbilu ta n’wina ni maalakanyo ya n’wina ha Kristu Jesu.
8 Vamakabye, hi kugumesa ndzi ngalo: Ni zvihi lezvi zvi nga zvi nene, ni zvihi lezvi zvi dzundzekako, ni zvihi lezvi zvi lulamileko, ni zvihi lezvi zvi basileko, ni zvihi lezvi zvi hi kucako ku randzana, ni zvihi lezvi zvi akako, ni zvihi lezvi zvi nga solekiko, ni zvihi lezvi zvi faneleko ku bongiwa, simamani ku alakanya* zvilo lezvo.
9 A zvilo lezvi mu nga zvi gondza ka mina mu zvi amukela, ni lezvi mu nga zvizwa ka mina ni ku ndzi wona na ndzi maha, n’winawu zvi maheni; a Nungungulu wa kurula i tava na n’wina.
10 Ndza tsaka nguvhu Hosini hi lezvi makunu mu nga tlhela mu alakanya ku ndzi vhuna. Hambu lezvi mu nga kari mu karateka hi mina, mu wa nga kumi ndlela ya ku ndzi vhuna.
11 A ndzi wuli lezvo a ku khwatsi ndzo vhumala, hakuva ndzi gondzile a kuva ndzi xalala ni ka gihi tshamela ndzi nga ka gona.
12 Ndza zvi tiva ku hanya na ndzi hi ni zvitsongwani ni ku hanya na ndzi hi ni zvotala. Zvilweni zvontlhe ni ka gihi tshamela ndzi gondzile zvilo zvi tiviwako hi vanhu va tsongwani: Ku nga ku hanya na ndzi xure ni ku hanya ni ndlala, a ku hanya na ndzi hi ni zvotala ni ku hanya na ndzi nga hi na nchumu.
13 Zvilweni zvontlhe ndzi na ni ntamu hi kota ya loyi a ndzi tiyisako.
14 Hambulezvo, mu mahile khwatsi hi ku ndzi vhuna kuxanisekeni ka mina.
15 Kunene, n’wina va le Filipi ma zvi tiva kambe lezvaku andzhako ka loku mu zwile mahungu ya ma nene hi khati go sangula, a cikhati leci ndzi nga suka hi le Makedhoniya, gi hava bandla gin’wani gi nga ndzi vhuna ne ku vhumela ku vhuniwa hi mina, saseka n’wina n’wece;
16 hakuva na ndza ha hi Tesalonika mu ndzi rumelele zvokari kasi ku ndzi vhuna ka lezvi ndzi nga zvi vhumala, a mu mahangi lezvo khati gin’we, kanilezvi mu zvi mahile makhati mambiri.
17 A hi ku khwatsi ndzo lava ku nyikiwa zvilo, kanilezvi ndzi lava ku a mitiro ya n’wina yo saseka yi simama ku andza mahlweni ka Nungungulu.
18 Hambulezvo ndzi na ni zvontlhe ndzi zvi lavako ni ku hundza. A ndza ha vileli nchumu, nguvhunguvhu lezvi ndzi amukeleko lezvi mu nga rumela na Epafrodhitusi. Zvi fana ni masema yo nuhela, ni muphahlo wo amukeleka wu xalalisako Nungungulu.
19 A Nungungulu wa mina i ta mu nyikawo ha Kristu Jesu zvontlhe lezvi mu zvi vhumalako hakuva i ganyile nguvhu.
20 Makunu a wudzundzo a giye ka Nungungulu wa hina tlhelo Papayi kala kupindzuka ni kupindzuka. Amen.
21 Rungulani a vobasa vontlhe va nga ka Kristu Jesu. A vamakabye lava va nga na mina va mu rungula.
22 A vobasa vontlhe va mu rungula, nguvhunguvhu a va le ngangweni wa Khezari.
23 A tipswalo ta Hosi Jesu Kristu a tive zvin’we ni moya lowu mu wu kombisako.
