Va Le Galatiya 1:1-24
1 Mina Pawule, ndzi nga mupostoli, ndzi nga yimisiwangiko hi munhu ne hi kurandza ka vanhu, kanilezvi ndzi yimisilweko hi Jesu Kristu zvin’we na Nungungulu tlhelo Papayi, loyi a mu vhuxileko hi ka vafileko.
2 Mina ni vamakabye vontlhe lava ndzi nga navo laha, ndza tsalela a mabandla ya le Galatiya, ndziku:
3 A tipswalo ni kurula zvi tako hi ka Nungungulu, a Papayi wa hina, ni ka Hosi Jesu Kristu a zvive na n’wina.
4 Jesu i no ti nyikela hi kota ya zviwonho zva hina kasi a hi tlhatlhisa ka tiko legi ga kubiha* hi kurandza ka Nungungulu, a Papayi wa hina.
5 A wudzundzo a give ka Nungungulu kala kupindzuka ni kupindzuka. Amen.
6 Zva ndzi hlamalisa lezvi mu hatlisileko ku hambuka* ka Loyi a mu vitanileko hi tipswalo ta Kristu, mu landzela man’wani mahungu ya ma nene.
7 A hi ku khwatsi kova ni man’wani mahungu ya ma nene; kanilezvi ku na ni vokari va mu juwungelako na va lava ku wonhetela a mahungu ya ma nene xungetano hi Kristu.
8 Kanilezvi hambu loku a mun’we wa hina, kutani ngilozi ya le tilweni, a tshuka a kanela ka n’wina a mahungu man’wani yo hambana ni mahungu ya ma nene lawa hi ma kaneleko ka n’wina, a munhu loye i wa rukatelwe.
9 Kota lezvi hi nga ranga hi wula, ndza phinda kambe, ndziku: Ni wihi a kanelako ka n’wina a mahungu man’wani yo hambana ni mahungu ya ma nene lawa mu sinako mu ma amukele, a munhu loye i wa rukatelwe.
10 Kasi ndzo zama ku kholwisa vanhu kutani Nungungulu ke? Kona ndzo zama ku tsakisa vanhu? Loku ndza ha zama ku tsakisa vanhu, a ndzi nandza ga Kristu.
11 Hakuva ndzi lava ku mu zvi tiva vamakabye lezvaku a mahungu ya ma nene lawa ndzi ma kaneleko ka n’wina a mati hi ka vanhu;
12 hakuva a ndzi nyikiwangi hi munhu ne a ndzi gondzisiwangi hi munhu, kanilezvi ndzi ma tivile hi ku vhululelwa hi Jesu Kristu.
13 Kunene, mu zvi zwile lezvi ndzi nga hanyisa zvona kale na ndza ha hi ciJudheni, lezvaku ndzi xanisile a bandla ga Nungungulu ku hundza mpimo, na ndzi zama ku gi hangalasa.
14 Ndzi wa pala votala va tanga ya mina hi ku tiva a tigondzo ta ciJudha tikweni ga hina, hakuva ndzi wa ti tsitsirita nguvhu ndzi landzela mikhuwo ya vakokwani.
15 Kanilezvi laha Nungungulu, loyi a ndzi humesileko khwirini ga mamani wa mina, a tlhela a ndzi vitana hi tipswalo takwe, a nga zvi wona na zvi hi chukwana
16 a ku wonekelisa a N’wana wakwe ha mina kasi ndzi kanela a mahungu ya ma nene ka vamatiko xungetano hi yena, a ndzi tsutsumelangi ku ya wutisa munhu;*
17 ne a ndzi yangi Jerusalema ka lava va nga ndzi rangela a kuva vapostoli, kanilezvi ndzi noya Arabhiya, ndzi gumesa ndzi tlhela Dhamasku.
18 Loku ku hundzile malembe manharu, ndzi noya Jerusalema ndzi ya vhuxela Khefasi,* ndzi tshama naye a 15 wa masiku.
19 Kanilezvi a ndzi wonangi ne mupostoli mun’we, saseka Jakobe, a makabye wa Hosi.
20 Makunu xungetano hi timhaka leti ndzi mu tsalelako, ndza hlambanya mahlweni ka Nungungulu lezvaku a ndzi hembi.
21 Andzhako ka lezvo, ndzi noya matikweni ya Siriya ni Kilikiya.
22 Kanilezvi a mabandla ya le Judhiya lawa ma nga hi ka Kristu ma wa nga se tshuka ma ndzi wona.
23 Ma wozwa basi ku: “A wanuna loyi a kale a nga kari a hi xanisa, makunu wa chumayela mahungu ya ma nene xungetano hi kukholwa loku a nga lava ku ku fuvisa.”
24 Hikwalaho va no sangula ku dhumisa Nungungulu hi kota ya mina.
Mitlhamuselo ya lahasi
^ Kutani: “nguva leyi ya kubiha”. Wona laha ka ku: “Nguva” ka Tlhamuselo wa magezu ya Bhibhiliya.
^ Kutani: “mu hatlisileko ku susiwa”.
^ Hi kukongoma: “nyama ni nkhata”.
^ Loyi a gin’wani vito a nga Pedro.
