Va Le Galatiya 2:1-21
2 Andzhako ka 14 wa malembe, ndzi noya kambe Jerusalema na ndzi hi na Bharnabhasi zvin’we na Titusi.
2 Ndzi yile seyo hi kota ya kuvhululelwa loku ndzi nyikilweko, ndzi ya va hlawutela a mahungu ya ma nene lawa ndzi kanelako ka vamatiko. Hambulezvo, ndzi zvi mahile cihundleni mahlweni ka vavanuna lava va nga hi vo chaviseka nguvhu, kasi ndzi tiva lezvaku a ndzi tsutsumangi mahala kutani a ndzi tsutsumi mahala.
3 Kanilezvi, hambu Titusi, loyi a nga hi na mina, a nga kurumetiwangi ku maha wukwera,* hambu lezvi a nga hi muGreki.
4 Kanilezvi a mhaka leyi yi vhukile hi kota ya vamakabye va mawunwa va nga nyanimela va nghena lomu bandleni, kasi ku ta piyara* a kutlhatlheka loku hi nga nako hi lezvi hi nga ka Kristu Jesu, na va zama ku hi maha tikhumbi;
5 kanilezvi hina a hi va ingisangi ne ni kutsongwani,* kasi a lisine la mahungu ya ma nene li simama cikari ka n’wina.
6 Xungetano hi lava va nga wonekisa ku khwatsi vamanyani — kani va wa hi yini, ka mina a hi zva nchumu, hakuva Nungungulu a nga cuwuki nghohe — a vavanuna lavo vo chaviseka nguvhu a va ndzi gondzisangi nchumu wa wuswa.
7 Kanilezvi a cikhati leci va nga wona lezvaku ndzi nyikilwe ntiro wa ku kanela mahungu ya ma nene ka lava va nga kala ku maha wukwera,* a ku khwatsi hi lezvi Pedro a nga nyikiwa ku ya kanela ka lava va mahilweko wukwera,
8 (hakuva loyi a nga nyika Pedro a ntamu wa kuva mupostoli wa lava va mahilweko wukwera,* hi yaloye a nga nyika minawu a ntamu wa kuva mupostoli wa vamatiko)
9 niku laha va nga wona a tipswalo leti ndzi nga nyikilwe, Jakobe, na Khefasi,* na Johani, lava va nga woniwa kota maziki,* va no ndzi khoma mandla, mina na Bharnabhasi, kota cikombiso ca lezvaku hi zvin’we ntirweni lowu, kasi hina hiya ka vamatiko, vona vaya ka lava va mahilweko wukwera.*
10 Leci basi va nga hi kombela kuve lezvaku hi alakanya zvisiwana, niku hi zvalezvo ndzi ti karatelako ku maha.
11 Kanilezvi a cikhati leci Khefasi* a ngata Antiyokiya, ndzi no mu kawuka* nghohe ni nghohe hakuva i wa maha zvahava.*
12 Hakuva i waga zvin’we ni vamatiko na ku nga se chikela vanhu vo kari va ngata hi ka Jakobe; kanilezvi a cikhati leci va nga chikela, i no tsika kuga navo a tlhela a tsawukana navo hi ku chava lava va nga mahilwe wukwera.*
13 A vaJudha lava van’wani va no ti patsa naye ka wufarisi legi,* laha ka kuza Bharnabhasi yenawu a ti patsa navo kufariseni* kabye.
14 Kanilezvi a cikhati leci ndzi nga wona lezvaku va wa nga ha longoloki ni lisine la mahungu ya ma nene, ndzi no byela Khefasi* mahlweni ka vontlhe, ndziku: “Loku wena, hambu lezvi u nga muJudha, u hanyisa ku khwatsi u wamatiko, u nga hanyisi ku khwatsi u muJudha, hikuyini u kurumetako vamatiko lezvaku va hanyisa ku khwatsi vaJudha ke?”
15 Hina lava hi nga vaJudha va mabeleko, na hi nga hi vawonhi va humako hi ka vamatiko,
16 ha zvi tiva lezvaku a munhu a nga wuliwi wo lulama hi kota ya mitiro ya nayo, kanilezvi i wuliwa wo lulama ntsena hi ku kholwa ka Jesu Kristu. Hikwalaho, hi no kholwa ka Kristu Jesu kasi hi wuliwa vo lulama hi ku kholwa ka Kristu na ku nga hi hi kota ya mitiro ya nayo, hakuva i hava a to wuliwa wo lulama hi ku maha mitiro ya nayo.
17 Makunu loku hinawu hi woniwa kota vawonhi na hi ti karatela ku wuliwa vo lulama hi kota ya Kristu, hi taku Kristu citiri ca kuwonha ke? Kokwihi!
18 Loku ndzi tlhela ndzi aka zvalezvi ndzi nga zvi hahlula, ndzi komba lezvaku ndzi mugohi.
19 Hakuva hi kota ya Nayo ndzi file hi ka Nayo, kasi ndzi hanyela Nungungulu.
20 Ndzi belelwe mhandzeni zvin’we na Kristu. Hikwalaho, a ka ha hi mina ndzi hanyako, kanilezvi hi Kristu a hanyako ka mina. Kunene, a wutomi legi makunu ndzi gi hanyako nyameni ndzi gi hanya hi kukholwa ka N’wana wa Nungungulu, loyi a ndzi randzileko aza a ti nyikela hi kota ya mina.
21 A ndzi ali a tipswalo ta Nungungulu, hakuva loku a kululama kuta hi ka nayo, Kristu i file mahala.
Mitlhamuselo ya lahasi
^ Kutani: “kina ngoma; sirkusizawu; tlula ngoma”.
^ Kutani: “ringa”.
^ Hi kukongoma: “ne hi hora yin’we”.
^ Kutani: “kina ngoma; sirkusizawu; tlula ngoma”.
^ Kutani: “kinisilweko ngoma; sirkusizawu; tlulisilweko ngoma”.
^ Loyi a gin’wani vito a nga Pedro.
^ Kutani: “timhandze; tisika”.
^ Kutani: “kinisilweko ngoma; sirkusizawu; tlulisilweko ngoma”.
^ Loyi a gin’wani vito a nga Pedro.
^ Kutani: “kaneta”.
^ Kutani: “i wa konekile”.
^ Kutani: “kinisilwe ngoma; sirkusizawu; tlulisilwe ngoma”.
^ Kutani: “kuxengetela loku”.
^ Kutani: “kuxengeteleni”.
^ Loyi a gin’wani vito a nga Pedro.
