Va Le Galatiya 3:1-29
-
A kuhambana ka mitiro ya Nayo ni kukholwa (1-14)
-
A wakululama i ta hanya hi kota ya kukholwa (11)
-
-
Abrahama a nga nyikiwangi a citsumbiso hi Nayo (15-18)
-
Kristu i pswalo wa Abrahama (16)
-
-
A masangulo ya Nayo ni kungo ga wona (19-25)
-
I vana va Nungungulu hi lezvi va kholwako (26-29)
-
Lava va lumbako Kristu i pswalo wa Abrahama (29)
-
3 Zvipumbu ndzin’wina vaGalatiya! Mu tlhamuselwe zviku dlunya lezvaku Jesu Kristu i belelwe mhandzeni, makunu himani a nga mu kanganyisa?
2 Ndzi lava ku mu wutisa cilo cin’we: Kasi a moya lowu mu nga wu amukela, mu wu amukele hi ku maha mitiro ya nayo, kutani mu wu amukele hi kota ya ku kholwa lezvi mu nga zvizwa ke?
3 Kasi mu zvipumbu zva hombe zvo kota lezvi? Lezvi mu nga sangulile ku famba hi ka moya, mu lava ku gumesa hi ka nyama ke?
4 Kasi a tixanisa tontlhe leti mu kumeneko nato mu no ti timisela mahala ke? Ndza zvi tiva lezvaku a mu ti timiselangi mahala.
5 Kasi loyi a mu nyikako a moya ni ku maha zvihlamaliso cikari ka n’wina, o maha lezvo hi kota ya lezvi mu mahako a mitiro ya nayo, kutani i maha lezvo hi kota ya lezvi mu kholwako lezvi mu nga zvizwa ke?
6 Zva fana na Abrahama: “I no kholwa ka Jehovha, hikwalaho i no woniwa kota munhu wo lulama”.
7 Kunene, ma zvi tiva lezvaku lava va kholwako hi vona va nga vana va Abrahama.
8 A Mitsalo yi wulile na zvi nga se maheka lezvaku Nungungulu i ta va hlayela kululama a vanhu va matiko hi kota ya kukholwa. Yi no ranga yi tivisa Abrahama a mahungu lawo ya ma nene, yiku: “A matiko wontlhe ma ta katekisiwa hi laha ka wena.”
9 Hikwalaho lava va kholwako va katekisiwa zvin’we na Abrahama loyi a nga hi ni kukholwa.
10 Vontlhe lava va tsumbako a mitiro ya nayo va rukatelwe, hakuva ku tsalilwe ku ngalo: “Ni wihi loyi a nga simamiko ku maha zvontlhe lezvi zvi tsalilweko bhukwini ga Nayo i rukatelwe.”
11 Makunu zvi te dlunya lezvaku i hava a wuliwako wo lulama mahlweni ka Nungungulu hi kota ya nayo, hakuva “a wakululama i ta hanya hi kota ya kukholwa”.
12 A Nayo a wuti hi ka kukholwa. Kanilezvi ni wihi “loyi a mahako zvilo lezvi, i ta hanya hi kota ya zvona”.
13 Kristu i no hi xava, a hi tlhatlhisa ka ciruko ca Nayo hi ku hi rwalela ciruko ca hina, hakuva ku tsalilwe ku ngalo: “Ni wihi loyi a hayekilweko mhandzeni i rukatelwe.”
14 Lezvi zvi mahekile kasi ku a matiko ma amukela makatekwa ya Abrahama ha Kristu Jesu, kasi ku loku hi kholwa hi amukela a moya lowu wu tsumbisilweko.
15 Vamakabye, ndzi wulawula hi zvilo mu zvi tivako khwatsi, ndziku: Loku a civhumelwano ciza ci tiyisiwa, hambu loku ci no tiyisiwa hi munhu, i hava a nga ni ntamu wa ku ci vhinya ne hambu ku engetela nchumu ka cona.
16 Makunu a zvitsumbiso zvi no mahiwa ka Abrahama ni ka pswalo* wakwe. A Mitsalo a yi wuli ku ngalo: “Ni ka lava va humako ka vana* va wena”, a ku khwatsi hi loku ku wuliwa vanhu vo tala, kanilezvi yi ngalo: “Ni ka pswalo* wa wena”, ku nga munhu mun’we, yena Kristu.
17 Ndza engeta ndziku: A civhumelwano leci ci tiyisilweko kale hi Nungungulu, a ci vhinyiwi hi Nayo lowu wu tileko na ku hundzile a 430 wa malembe; a Nayo a wu zvi koti ku vhinya a citsumbiso leco.
18 Hakuva loku a tshomba yi nyikiwa hi ka nayo, a ya ha nyikiwi hi citsumbiso; kanilezvi Nungungulu i yi nyikile Abrahama hi citsumbiso.
19 Makunu hikuyini ku nyikilweko Nayo? A Nayo wu tlhatekelwe kasi a zvigoho zvi fela ku woneka kubaseni, kala wu chikela a pswalo* lowu wu tsumbisilweko a citsumbiso; a Nayo wu no kanelwa hi tingilozi hi canja ga mutlhanganyisi.
20 Loku a civhumelwano ci mahiwa hi munhu mun’we a ku laveki a mutlhanganyisi, kanilezvi a citsumbiso leci, Nungungulu i ci mahile yece.
21 Makunu hi taku a Nayo walwa ni zvitsumbiso zva Nungungulu ke? Ahihi. Hakuva loku a vanhu va wa no nyikiwa a nayo wu zvi kotako ku hanyisa, a kululama na ku tile hi ka nayo.
22 Kanilezvi a Mitsalo yi no nyikela vanhu vontlhe lezvaku vava tikhumbi ta ciwonho, kasi lava va kholwako va fela ku nyikiwa a citsumbiso hi ku kholwa ka Jesu Kristu.
23 Hambulezvo, na ku nga se chikela a kukholwa, hi wa wundliwa lahasi ka nayo, na hi rindzela a kukholwa loku ku nga lava ku wonekeliswa.
24 Hikwalaho a Nayo wu mahile mugondzisi wa hina, wu hi yisa ka Kristu, kasi hi wuliwa vo lulama hi kota ya kukholwa.
25 Makunu lezvi a kukholwa ku nga chikela, a ha ha lavi mugondzisi.
26 Kunene, n’wina n’wentlhe mu vana va Nungungulu hi lezvi mu kholwako ka Kristu Jesu.
27 Hakuva n’wina n’wentlhe mu bhabhatisilweko ka Kristu, mu ambalile Kristu.
28 A ku na muJudha hambu muGreki, a ku na khumbi hambu munhu wo tlhatlheka, a ku na wanuna, a ku na wasati, hakuva n’wina n’wentlhe mu mun’we ka Kristu Jesu.
29 Ahandle ka lezvo, loku mu lumba Kristu, hakunene mu pswalo* wa Abrahama; mu vagi va tshomba ya citsumbiso.
Mitlhamuselo ya lahasi
^ Hi kukongoma: “mbewu”.
^ Hi kukongoma: “timbewu”.
^ Hi kukongoma: “mbewu”.
^ Hi kukongoma: “mbewu”.
^ Hi kukongoma: “mbewu”.
