Va Le Galatiya 4:1-31
4 Makunu ndza wula ndziku: Loku a mugi wa tshomba a ha hi n’wanana a nga hambani ni khumbi, hambu lezvi a nga hosi ya zvilo zvontlhe,
2 hakuva i wundliwa hi vahlayisi ni malandza kala gi chikela siku legi gi yimisilweko hi papayi wakwe.
3 Hizvalezvo na hinawu, laha hi nga hi vanana, hi wa hi tikhumbi ta zva wun’wanana.
4 Kanilezvi laha a cikhati ci nga enela, Nungungulu i no rumela N’wana wakwe a nga belekiwa hi wasati na a pswalelwe lahasi ka nayo,
5 kasi a fela ku xava lava va nga lahasi ka nayo, a va tlhatlhisa lezvaku va maha vana va Nungungulu.
6 Makunu kota lezvi mu nga vana, Nungungulu i rumele a moya wa N’wana wakwe timbilwini ta hina, hikwalaho a moya wa vitana wuku: “Abha,* Papayi!”
7 Hikwalaho wena a wa ha hi khumbi kanilezvi u n’wana; makunu kota lezvi u nga n’wana, u mugi wa tshomba hi kurandza ka Nungungulu.
8 Hambulezvo, na mu nga se mu tiva Nungungulu, mu wa hi tikhumbi ta lava va kalako va nga hi vanungungulu.
9 Kanilezvi lezvi makunu mu mu tivileko Nungungulu, nguvhunguvhu lezvi mu tiviwako hi Nungungulu, hikuyini mu tlhelako ka zvilo zva wun’wanana zvi nga vhuniko nchumu mu ya ti maha tikhumbi ta zvona kambe ke?
10 N’wina ma ti karata nguvhu hi ku hlayisa masiku, ni tihweti, ni tinguva ni malembe.
11 Ndza chava ku tshuka ndzi tirile mahala cikari ka n’wina.
12 Ndza mu khongotela vamakabye, ndziku: Mahani ku khwatsi hi mina, hakuva minawu ndzi wa mahile ku khwatsi hi n’wina. A mu ndzi gohelangi nchumu.
13 Kanilezvi ma zvi tiva lezvaku ndzive ni thomo ga ku kanela mahungu ya ma nene ka n’wina hi khati go sangula hi lezvi ndzi nga kari ndzi babya.
14 Hambu lezvi a kubabya ka mina ku nga hi ciringo ka n’wina, a mu ndzi kanyisangi ne ku ndzi nyenya,* kanilezvi mu no ndzi amukelisa ku khwatsi ndzi ngilozi ya Nungungulu ni ku khwatsi hi mina Kristu Jesu.
15 Makunu li kwihi a litsako leli mu nga hi nalo ke? Hakuva ndza mu kustumunyela ndziku loku zvi wa no koteka, na mu xokolile a matihlo ya n’wina mu ndzi nyika.
16 Makunu mu alakanya ku ndzi nala wa n’wina hi lezvi ndzi mu byelako lisine ke?
17 Va ti karatela ku mu koka muya tlhelweni gabye, kanilezvi a va mu laveli zva zvi nene; va lava ku mu wutla ka mina kasi mu va landzela.
18 Hambulezvo, contlhe cikhati zvi nene loku a munhu a mu kokela ka zva zvi nene, na ku nga hi ntsena loku ndzi hi cikari ka n’wina.
19 Makunu vana vanga, ndza lun’wa kambe hi ku lava ku pswala n’wina kala Kristu a wumbiwa cikari ka n’wina.
20 Ndzi wa xuva kuva zvin’we na n’wina ka cikhati leci, ndzi tlhela ndzi wulawula hi ndlela yin’wani, hakuva ndza karateka nguvhu hi kota ya n’wina.
21 N’wina lava mu lavako kuva lahasi ka nayo, hi nga ndzi byelani: A mu zvizwi lezvi a Nayo wu wulako ke?
22 Ku tsalilwe ku ngalo Abrahama i wa hi ni vana vambiri; a mun’we i pswalilwe hi wasati loyi wa khumbi,* loyi mun’wani i pswalilwe hi wasati loyi wa kutlhatlheka;
23 kanilezvi a n’wana wa wasati loyi wa khumbi* i pswalilwe hi ka nyama, loyi wa wasati wo tlhatlheka i pswalilwe hi citsumbiso.
24 A mhaka leyi mufananiso; hakuva a vavasati lava va yimela zvivhumelwano zvimbiri: A cin’we hi leci ci mahilweko Citsungeni ca Sinayi, ci pswalako vana wukhumbini, ku nga Hagari.
25 Makunu Hagari loyi, i yimela Citsunga ca Sinayi leci ci nga le Arabhiya, i fana ni Jerusalema wa cikhati leci, hakuva i le wukhumbini ni vana vakwe.
26 Kanilezvi Jerusalema loyi wa le hehla i tlhatlhekile, hi yena mamani wa hina.
27 Hakuva ku tsalilwe ku ngalo: “Tsaka wena ngon’wa, wena wasati u nga pswaliko; bana kulungwani hi kutsaka wena wasati u nga lun’wiko; hakuva a vana va wasati loyi a tsikilweko va tele nguvhu a ku hundza a vana va loyi a nga ni nuna.”
28 Makunu vamakabye, n’wina mu vana va citsumbiso a ku fana na Isaka.
29 Kanilezvi, a ku fana ni lezvi loyi a nga pswalilwe hi ka nyama a nga sangula ku xanisa loyi a nga pswalilwe hi ka moya, zvi tano ni nyamutlha.
30 Hambulezvo, yi li yini a Mitsalo? Yi ngalo: “Hlongola a wasati loyi wa khumbi* ni n’wana wakwe, hakuva a n’wana wa wasati loyi wa khumbi a nga tava mugi wa tshomba zvin’we ni n’wana wa wasati loyi wo tlhatlheka.”
31 Hikwalaho vamakabye, hina a hi vana va wasati wa khumbi,* kanilezvi hi vana va wasati loyi wo tlhatlheka.
Mitlhamuselo ya lahasi
^ I gezu ga ciHebheru kutani ga ciAramaiko gi wulako ku: “O, Papayi!”
^ Kutani: “phelela”.
^ Kutani: “citiri”.
^ Kutani: “citiri”.
^ Kutani: “citiri”.
^ Kutani: “citiri”.
