Va Le Kolosi 1:1-29
1 Mina Pawule, ndzi nga mupostoli wa Kristu Jesu hi kurandza ka Nungungulu, ndzi nga na Timote a makabye wa hina,
2 ndza tsalela vobasa ni vamakabye va tsumbekileko va nga ka Kristu le Kolosi, ndziku:
A tipswalo ni kurula zvi tako hi ka Nungungulu tlhelo Papayi wa hina, a zvive na n’wina.
3 Contlhe cikhati hi mu khongelelako, ha bonga Nungungulu a Papayi wa Hosi ya hina Jesu Kristu,
4 hakuva hi zwile hi kukholwa loku mu nga nako ka Kristu Jesu, ni lirandzo leli mu li kombisako ka vobasa vontlhe
5 hi kota ya kutsumba loku ku vekelweko n’wina matilweni. Mu sina mu zwile a kutsumba loko a cikhati leci mu nga byeliwa a mahungu ya lisine, ma nga mahungu ya ma nene
6 lawa ma tileko ka n’wina. A ku fana ni lezvi a mahungu ya ma nene ma pswalako mihandzu ni ku andza misaveni yontlhe, ma maha zvalezvo ni ka n’winawu kusukela siku legi mu nga mazwa ni ku tiva khwatsi a tipswalo ta lisine ta Nungungulu.
7 A tipswalo leti, hi taleti mu nga gondzisiwa hi Epafrasi, a mutiri-kulori wo randzeka, loyi a nga nandza gi tsumbekileko ga Kristu, ni muyimeli wa hina cikari ka n’wina.
8 Hi yena kambe a nga hi hlawutela a lirandzo leli mu li kombisako hi ku vhuniwa hi moya wa Nungungulu.
9 Hi cigelo leco, kusukela siku legi hi nga zvizwa, a hi tsikangi ku mu khongelela hi kombela lezvaku mu ku tiva khwatsi a kurandza kakwe, mu tala hi wutlhari gontlhe ni kuzwisisa ku tako hi ka Nungungulu,*
10 kasi mu famba hi ndlela yi fanelako Jehovha, lezvaku mu mu tsakisa ka zvontlhe, ni ku pswala mihandzu mitirweni yontlhe yo saseka, mu engetela ku mu tiva khwatsi Nungungulu.
11 Hi khongelela kambe lezvaku Nungungulu a mu tiyisa hi ntamu wakwe wa hombe kasi mu zvi kota ku timisela zvontlhe hi lihlazva-mbilu na mu tsakile,
12 na mu kari mu bonga Papayi, loyi a nga mu maha mu ringanelwa hi kuva vagi va tshomba ya vobasa kuwonekeleni.
13 I hi tlhatlhisile ntan’wini wa munyama, a hi yisa mufun’weni wa N’wana wakwe wo randzeka,
14 loyi hi ka yena hi tlhatlhiswako hi hakhelo ya kutlhatlhisa, ku nga ku tsetselelwa a zviwonho zva hina.
15 Hi yena a nga mufananiso wa Nungungulu a nga wonekiko, a matewula ya zvivangwa zvontlhe;
16 hakuva Nungungulu i vangile zvilo zvontlhe na a tirisa yena, a zva le tilweni ni zva laha misaveni; a zvilo zvi woniwako ni lezvi zvi nga woniwiko, kani zvitshamu zva wuhosi, kani mifumo, kani wuhosi, kutani mintamu; zvontlhe i zvi vangile na a tirisa yena, a zvi vangela yena.
17 Ahandle ka lezvo, hi yena a nga ranga a vangiwa ka zvilo zvontlhe, a zvilo zvontlhe lezvi zvin’wani zvi vangilwe na ku tirisiwa yena.
18 Hi yena a nga hloko ya miri, gi nga bandla. Hi yena masangulo, a matewula ya kuvhuka hi ka vafileko, kasi ava yena wo sangula ka zvilo zvontlhe.
19 Hakuva Nungungulu i xalalisilwe hi lezvaku a kumbhelela kontlhe ku tshama ka yena,
20 ni ku tlhelisela a zvilo zvontlhe, kani zva laha misaveni kutani zva le tilweni, lezvaku zvi tlhela zvi zwanana naye hi ku tirisa yena, hi ku maha kurula hi nkhata lowu a wu halatileko mhandzeni ya hlomulo.*
21 Kunene, a kale mu wa hi kule na Nungungulu, mu wa hi valala vakwe hakuva a kupima ka n’wina ku wa hi mitirweni yo biha.
22 Kanilezvi makunu i vhuxile kuzwanana loku mu nga hi nako naye hi ku tirisa a miri wa nyama wa loyi a fileko kasi a yimisa n’wina mahlweni kakwe na mu basile, na mu nga hi na noda ne nandzu,
23 ntsena lezvaku mu fanele ku simama kukholweni, na mu tiyile ciseketelweni mu nga tsekatseki. Mu nga tsiki a kutsumba loku mu ngava nako a cikhati leci mu ngazwa a mahungu ya ma nene lawa ma nga chumayelwa ka zvivangwa zvontlhe laha misaveni, lawa mina Pawule ndzi nga nandza ga wona.
24 Makunu ndza tsaka hi lezvi ndzi xanisekako kasi n’wina mu vhuneka. Kota ciro ca miri wa Kristu ndzi ti yimisele ku xaniseka, hakuva lezvo zvi ta vhuna a miri wa Kristu, ku nga bandla.
25 Nungungulu hi yena a ndzi yimisileko a kuva nandza ga bandla legi hi kota ya n’wina, a ndzi nyika ntiro wa ku chumayela a mhaka yakwe hi kumbhelela,
26 leyi yi nga cihundla co basa leci ci nga fihlilwe kusukela zvikhatini zva kale* ni ka zvizukulwana zva kaleloko. Kanilezvi ka cikhati leci, ci vhululelwe a vobasa.
27 Ahandle ka lezvo, Nungungulu i tsakele ku komba vobasa a kutala ka titshomba ta cihundla co basa leci ci vhululelwako a vamatiko. A cihundla leco co basa, hi lezvaku Kristu i zvin’we na n’wina, ku nga kutsumba ka ku hlengela naye kungangameleni kakwe.
28 Hi yaloyi hi kanelako xungetano hi yena, na hi kari hi kawuka ni ku gondzisa vanhu vontlhe hi wutlhari gontlhe, hi fela ku yimisa a vanhu vontlhe ka Kristu na va mbhelele.
29 Hi cigelo leco, ndza ti tsitsirita, ndzi tira hi kutikarata na ndzi vhuniwa hi ntamu wakwe lowu wu tirako ka mina.
Mitlhamuselo ya lahasi
^ Kutani: “ku nyikwako hi ntamu wa Nungungulu”.
^ Wona Tlhamuselo wa magezu ya Bhibhiliya.
^ Kutani: “tinguveni ta kale”. Wona laha ka ku: “Nguva” ka Tlhamuselo wa magezu ya Bhibhiliya.
