Va Le Kolosi 2:1-23
2 Ndzi lava ku mu zvi tiva lezvaku ndzilwa yimpi ya hombe hi kota ya n’wina, ni hi kota ya lava va nga le Lawodhikeya, ni vontlhe lava va nga kala ku ndzi wona.*
2 A kungo ga mina hi lezvaku va tangaliswa timbilwini tabye ni kuva va bohana hi lirandzo, va tlhela vava ni titshomba tontlhe ti kumiwako hi ku ci tiva khwatsi ni ku ci zwisisa hi kumbhelela a cihundla co basa ca Nungungulu, ku nga Kristu,
3 loyi a titshomba tontlhe ta wutlhari ni kutiva ti fihlilweko kakwe.
4 Ndzi wula lezvi kasi ku ngavi na munhu wa ku mu kalavela hi magezu yakwe ya kukanganyisa.
5 Hambu lezvi ndzi kalako ndzi nga hi kona cikari ka n’wina hi miri, ndzi na n’wina hi moya, na ndzi tsaka hi ku wona ku ma famba hi nayo ni lezvaku a kukholwa ka n’wina ka Kristu ku tiyile.
6 Hikwalaho, a ku khwatsi hi lezvi mu amukeleko Kristu Jesu, a Hosi, simamani ku fambisa zvalezvi a nga fambisa zvona
7 mu zima mitsu, mu ti aka hehla kakwe, mu tiya kukholweni, kota lezvi mu gondzisilweko, mu tlhela mu tala hi kubonga.
8 Ti woneleni, kasi ku ngavi na munhu a mu phasako* hi filozofiya ni kukanganyisa, lezvi zvi nga humiko hi ka Kristu, kanilezvi zvi tako hi ka mikhuwo ya vanhu ni ka zvilo zva tiko.
9 Hakuva a matshamela wontlhe ya Nungungulu ma ka Kristu.
10 Hikwalaho n’wina mu na ni zvontlhe hi kota ya yena loyi a nga hloko ya mifumo yontlhe ni mintamu yontlhe.
11 Lezvi mu zwananako naye, n’winawu mu mahilwe wukwera,* hambulezvo a hi legi go mahiwa hi mandla kanilezvi mu mahilwe wukwera legi ga Kristu hi ku tlhatlha a miri wa nyama.
12 Hakuva mu no lahliwa zvin’we naye hi ku bhabhatisiswa ku khwatsi hi yena, niku lezvi mu zwananako naye mu vhuxilwe zvin’we naye hi lezvi mu kholwako a mitiro ya ntamu ya Nungungulu, loyi a nga vhuxa Kristu hi ka vafileko.
13 Ahandle ka lezvo, hambu lezvi mu nga file zvigohweni zva n’wina ni lezvi mu nga kala mu nga mahangi wukwera* nyameni ya n’wina, Nungungulu i no mu vhuxa zvin’we naye. I hi tsetselele zvigoho zva hina zvontlhe
14 a vhinya a Nayo lowu wu nga kari wu hi kona, a tlhela a wu fuvisa hi ku wu belela mhandzeni ya hlomulo.*
15 Hi kota ya mhandze,* i no hlula a mifumo ni tihosi, a va wisa tingana kubaseni, a giyagiya hi kuhlula kakwe.
16 Hikwalaho, ku ngavi na munhu a mu lamulako hi kota ya zvilo lezvi mu gako, ni kunwa, kutani hi ku hlayisa masiku ya tifesta, kutani masiku ya kuwoneka ka hweti, kutani sabhadho.
17 Hakuva a zvilo lezvi i ndzhuti wa lezvi zva ha tako, kanilezvi a miri wa zvona hi Kristu.
18 Mu nga tsiki munhu a mu tsandzekisa ku kuma a nchachazelo wa n’wina hi kutikoramisa kakwe ko fayelisela ni ku khozela tingilozi, a ti kulisa hi kota ya lezvi a zvi wonileko. A munhu loye i ti kulisa mahala hi kota ya kupima kakwe ka nyama,
19 a nga khomi zvi tiya ka loyi a nga hloko, ku nga loyi a miri wontlhe wu wundliwako hi yena ni ku tlhanganiswa hi mahlakala ni misiha, wu kula hi kukula loku ku tako hi ka Nungungulu.
20 Loku mu file zvin’we na Kristu hi tlhelo ga zvilo zva tiko, hikuyini ma ha hanyisako ku khwatsi mu vanhu va tiko hi ku simama mu ingisa a milayo ya gona ke?
21 Yaku ngalo: “U nga zvi khomi, u nga zvi ringi, u nga zvi henyi”.
22 (Na ku wuliwa zvilo zvi to mbhela hi ku tirisiwa.) Kasi lezvo zvileletelo ni zvigondzo zva vanhu ntsena.
23 Hakunene a zvilo lezvi zvi wonekisa ku khwatsi wutlhari, loku va khozela hi kurandza kabye, va ku khwatsi va ti koramisa, ni ku xanisa mimiri yabye, hambulezvo a zvi vhuni nchumu yimpini ya kulwa ni kunavela ka nyama.
Mitlhamuselo ya lahasi
^ Hi kukongoma: “va nga kala ku wona a nghohe ya mina nyameni”.
^ Kutani: “a mu mahako zvibochwa zvakwe”.
^ Kutani: “kinisilwe ngoma; sirkusizawu; tlulisilwe ngoma”.
^ Kutani: “kinangi ngoma; sirkusizawu; tlulangi ngoma”.
^ Wona Tlhamuselo wa magezu ya Bhibhiliya.
^ Zvi nga ha wula ku: “Hi kota ya yena”.
