Va Le Kolosi 3:1-25
3 Hikwalaho, loku mu vhuxilwe zvin’we na Kristu, simamani ku hlota zvilo zva le hehla, ku nga lomu Kristu a tshamileko kona, reveni ga cinene ga Nungungulu.
2 Simamani ku veka kupima ka n’wina zvilweni zva le hehla, na ku nga hi ka zvilo zva laha misaveni.
3 Hakuva mu file, ni wutomi ga n’wina gi fihlilwe zvin’we na Kristu ka Nungungulu.
4 A cikhati leci Kristu, loyi a nga wutomi ga hina, a to kombekisiwa, n’winawu mu ta kombekisiwa zvin’we naye hi kungangamela.
5 Hikwalaho, dayani a zviro zva n’wina zva laha misaveni, lezvi zvi pswalako a wubhayi,* ni kungahlazveki, ni kunavela ko nyenyeza ka masango, ni kunavela ko biha, ni wunavenave, ku nga ku khozela zvifananiso.
6 A zanga ya Nungungulu yata hehla ka lava va mahako a zvilo lezvi.
7 Hi zvalezvi n’winawu mu nga kari mu hanyisa zvona kale.
8 Kanilezvi, makunu tsikani a zvilo lezvi zvontlhe: A zanga, ni khulo, ni kubiha, ni guwa; ni kurukatela ku nga tshuki ku huma non’wini wa n’wina.
9 Mu nga hembelani. Tlhatlhani a munhu wa kale ni mitiro yakwe,
10 mu ambala a munhu muswa, loyi a mahiwako muswa hi ku simama a tiva Nungungulu, kasi a fana ni Loyi a nga mu vanga.
11 Ka yena a ku na muGreki ne muJudha, a ku na wa ku mahiwa wukwera* kutani wo kala ku mahiwa wukwera, a ku na wamatiko, a ku na munhu wota hi khwatini,* a ku na khumbi, a ku na wa kutlhatlheka; kanilezvi Kristu hi yena zvontlhe ka vontlhe.
12 Hikwalaho, kota vahlawulilweko va Nungungulu, a vabasileko ni varandzekako, ambalani lirandzo ni mbilu yo zwela wusiwana, ni wunene, ni kutikoramisa, ni kuolova, zvin’we ni lihlazva-mbilu.
13 Simamani ku timiselana ni ku tsetselelana hambu loku a munhu a hi ni cigelo ca ku sola mun’wani. A ku fana ni lezvi Jehovha a nga mu tsetselela, n’winawu mahani zvalezvo.
14 Ahandle ka zvontlhe lezvi, ambalani lirandzo, hakuva a lirandzo li zwananisa vanhu vontlhe.
15 Tsikani a kurula ka Kristu ku fuma timbilwini ta n’wina, hakuva mu vitanelwe a kurula loko kasi mu tava miri wun’we, muva ni kubonga.
16 Tsikani a mhaka ya Kristu yi andza cikari ka n’wina kasi muva vanhu vo tlhariha. Simamani ku gondzisana ni ku tiyisana hi tisimu, mu dhumisa Nungungulu, mu yimbelela tisimu ta kukhozela ni ta kubonga, mu yimbelela ka Jehovha timbilwini ta n’wina.
17 Ni cihi leci mu ci mahako, kani kuwulawula kutani kutira, mahani zvontlhe vitweni ga Hosi Jesu, na mu bonga Nungungulu tlhelo Papayi, hi kota ya yena.
18 Wena sati, ti koramise ka nuna wa wena kota lezvi zvi faneleko Hosini.
19 Wena nuna, simama ku randza a sati wa wena. U nga mu zangareli.
20 N’wina vana, ingisani vapswali va n’wina zvilweni zvontlhe, hakuva lezvo zva xalalisa Hosi.
21 N’wina vapapayi, mu nga zangarisi vana va n’wina hakuva va nga mbhela ntamu.
22 N’wina tikhumbi, ingisani venyi va n’wina zvilweni zvontlhe, na ku nga hi ntsena loku va mu wona, kasi ku tsakisa vanhu, kanilezvi va ingiseni hi mbilu yontlhe, na mu chava Jehovha.
23 Ni cihi leci mu ci mahako, ci maheni hi muhefemulo* wontlhe a ku khwatsi hi loku mu tirela Jehovha, na ku nga hi vanhu,
24 hakuva ma zvi tiva lezvaku hi Jehovha a to mu nyika tshomba yiva nchachazelo wa n’wina. Tirelani Kristu, a Hosi.
25 Kunene, loyi a mahako zvakubiha, i ta tlheliselwa hi kota ya kubiha loku a ku mahileko, hakuva Nungungulu a nga na cihlawulela.
Mitlhamuselo ya lahasi
^ Hi ciGreki: porneía. Wona Tlhamuselo wa magezu ya Bhibhiliya.
^ Kutani: “kinisiwa ngoma; sirkusizawu; tlulisiwa ngoma”.
^ Hi kukongoma: “muSkite”. Cikhatini ca kale, a gezu legi gi wa wula a vanhu lava va nga kari va chepetiwa hi kota ya mahanyela ni mikhuwo yabye.
^ Wona Tlhamuselo wa magezu ya Bhibhiliya.
