Va Le Kolosi 4:1-18
4 N’winawu venyi, tirisanani khwatsi ni tikhumbi ta n’wina, mu ti mahela kululama, na mu tiva lezvaku n’winawu mu na ni Hosi le tilweni.
2 Mu nga tsiki ku khongela, tlharihelani a mhaka leyi na mu kari mu bonga.
3 Khongelelani na hinawu kambe, kasi Nungungulu a hi vhululela ndlela ya ku chumayela a mhaka yakwe ya cihundla co basa xungetano hi Kristu, leci ndzi bohilweko hi machini* hi kota ya cona;
4 ndzi khongeleleni kambe lezvaku ndzi chumayela a cihundla leci ci dlunyateka, kota lezvi ndzi faneleko ku maha.
5 Simamani ku famba hi wutlhari cikari ka vangakholwiko; mu tirisa khwatsi a cikhati ca n’wina.*
6 A magezu ya n’wina a mave yo tsakisa contlhe cikhati, na ma lungilwe hi munyu, kasi mu tiva lezvi mu to hlamulisa zvona ka mun’we ni mun’wani.
7 Tikikusi, a makabye wa mina wo randzeka ni citiri co tsumbeka tlhelo nandza-kulori Hosini, i ta mu hlawutela mahungu ya mina wontlhe.
8 Ndza mu rumela ata ka n’wina kasi mu fela ku tiva lezvi hi vhukisako zvona ni lezvaku a ta chavelela timbilu ta n’wina.
9 Ita na Onesimusi, a makabye wa mina wo randzeka ni wo tsumbeka, loyi a nga hi kwaseyo ka n’wina; va ta mu hlawutela zvontlhe zvi mahekako seno.
10 Aristarkusi, a cibochwa-kulori, wa mu rungula; Marku, a makabye wa Bharnabhasi, yenawu wa mu rungula (Marku loyi a mu rungulako, hi yaloyi hi nga mu byela lezvaku mu amukeleni khwatsi loku ata).
11 Jesu, loyi a gin’wani vito a nga Justusi, a nga mun’we wa lava va mahilweko wukwera,* yenawu wa mu rungula. Hi valava basi ndzi tirako zvin’we navo ntirweni wa Mufumo wa Nungungulu niku va ndzi tiyisa nguvhu.
12 Epafrasi, a nandza ga Kristu Jesu, loyi a nga hi seyo ka n’wina, wa mu rungula; wa mu khongelela nguvhu contlhe cikhati kasi mu yima mu tiya kota vanhu va buvhileko na mu hi ni kukholwa ku tiyileko xungetano hi kurandza kontlhe ka Nungungulu.
13 Hakuva ndza mu kustumunyela lezvaku yena wa ti karata nguvhu hi kota ya n’wina, ni hi kota ya lava va le Lawodhikeya ni lava va le Hiyerapolisi.
14 Luka, a dhokodhela wo randzeka, wa mu rungula; Dhemasi yenawu wa mu rungula.
15 Rungulani a vamakabye va le Lawodhikeya, na Ninfasi, ni bandla legi gi tlhanganako laha mutini wakwe.
16 Loku mu lerile a papilo legi, gi rumeleni bandleni ga le Lawodhikeya kasi vonawu va lera; na n’winawu tekani legi ndzi nga rumela le Lawodhikeya mu lera.
17 Ahandle ka lezvo, byelani Arkipusi, muku: “Ti tsitsirite, u maha ntiro lowu u wu amukeleko ka Hosi.”
18 Hi lawa a marungula ya mina Pawule, lawa ndzi ma tsalileko hi canja ga mina wutsumbu. Ndzi alakanyeni ka machini* lawa ndzi bohilweko hi wona. A tipswalo ta Nungungulu a tive na n’wina.
Mitlhamuselo ya lahasi
^ Kutani: “makorente”.
^ Hi kukongoma: “mu xava a cikhati ci faneleko”.
^ Kutani: “kinisilweko ngoma; sirkusizawu; tlulisilweko ngoma”.
^ Kutani: “makorente”.
