Va Le Roma 10:1-21
10 Vamakabye, a kurandza ka mbilu ya mina ni leci ndzi ci kombelako ka Nungungulu hi lezvaku va ponisiwa.
2 Ndza va kustumunyela lezvaku va tirela Nungungulu hi kutitsitsirita, kanilezvi a va mu tivi khwatsi.
3 Hakuva lezvi va nga ku tiviko a kululama ka Nungungulu va ti yimisela kululama kabye, va ala ku ingisa a milayo yo lulama ya Nungungulu.
4 Hakuva Kristu hi yena magumo ya Nayo, kasi ni wihi a kholwako a kuma kululama.
5 Mosi i tsalile lezvi xungetano hi kululama loku ku tako hi kota ya Nayo, aku: “Loyi a mahako zvilo lezvi, i ta hanya hi kota ya zvona.”
6 Kanilezvi a kululama loku ku tako hi kota ya kukholwa ku ngalo: “U nga wuli mbilwini ya wena uku: ‘Himani a to kandziha aya tilweni?’ zvi wulako ku, kasi a ya chisa Kristu,
7 kutani ku: ‘Himani a to relela nkeleni wo eta wo kala magumo?’ zvi wulako ku, kasi a ya vhuxa Kristu hi ka vafileko.”
8 Kasi a Mitsalo yi li yini? Yi ngalo: “A mhaka yi kusuhani na wena, yi kwalaha non’wini wa wena ni mbilwini ya wena”, ku nga “mhaka” ya kukholwa leyi hi kanelako.
9 Hakuva loku u vhumela hi nomu wa wena mahlweni ka vanhu lezvaku Jesu i Hosi, ni loku u kholwa mbilwini ya wena lezvaku Nungungulu i mu vhuxile hi ka vafileko, u ta ponisiwa.
10 Hakuva a munhu i wuliwa ku i lulamile hi kota ya ku kholwa mbilwini, a hanyiswa hi ku vhumela hi nomu mahlweni ka vanhu.
11 Hakuva a mutsalo wu ngalo: “I hava a kholwako kakwe a towa tingana.”
12 Hakuva a ku na kuhambana cikari ka muJudha ni muGreki. A Hosi ya vona vontlhe yin’we, niku ya hana ka vontlhe lava va yi kombelako.
13 Hakuva “kani hi wihi a khongelako vitweni ga Jehovha i ta ponisiwa.”
14 Kanilezvi va ta khongelisa kuyini ka yena loyi va kalako va nga kholwi kakwe? Kona va ta kholwisa kuyini ka yena loyi va kalako va nga sezwa nchumu ha yena ke? Va ta zvi zwisa kuyini na ku nga hi na loyi a chumayelako ke?
15 Kona va ta chumayelisa kuyini na va nga rumiwangi ke? Khwatsi hi lezvi ku tsalilweko ku ngalo: “A yi no ku saseka a mikondzo ya lava va chumayelako a mahungu ya ma nene ya zvilo zvo saseka!”
16 Hambulezvo, a hi vontlhe va nga ingisa mahungu ya ma nene. Hakuva Isaya i ngalo: “Jehovha, himani a nga kholwa lezvi hi nga wula?”
17 Hikwalaho, a munhu i ranga hi kuzwa hi kona a kholwako. A mhaka leyi yi zwiwako, mahungu lawa ma wulawulako hi Kristu.
18 Kanilezvi ndza wutisa ndziku: Va no kala ku zvizwa ke? Va zvi zwile, hakuva “a gezu gabye gi zwele misaveni yontlhe, ni mahungu yabye ma hangalakile kala magemeta-musi ya misava.”
19 Ndza wutisa kambe ndziku: A vaIzrayeli va no kala ku zvi tiva ke? Va zvi tivile. Hakuva a kuranga Mosi i ngalo: “Ndzi ta mu vhuxela ciluse hi tiko ga ku ne a hi tiko; ndzi mu zangarisa hi tiko go kala ku tiva.”
20 Kanilezvi Isaya i kanela mhaka ya Nungungulu hi kutiya aku: “Ndzi no kumiwa hi lava va nga kala va nga ndzi lavi; ndzi ti kombekisa ka lava va nga kala va nga wutiseli hi mina.”
21 Kanilezvi xungetano hi Izrayeli i ngalo: “Ndzi nawulutile a mandla ya mina siku gontlhe ka vanhu va nga ingisiko ni va timbilu to nonoha.”
