Va Le Roma 12:1-21
12 Ndza mu khongotela vamakabye hi wuxinji ga Nungungulu, lezvaku mu nyikela mimiri ya n’wina kota muphahlo wu hanyako, wo basa, lowu wu amukelekako ka Nungungulu, mu tirela Nungungulu hi kupima ka n’wina kontlhe.
2 Tsikani ku pimanyisa a mahanyela ya tiko legi,* kanilezvi hundzuluswani muva ni kupima kuswa, kasi mu tiva a kurandza ka Nungungulu, loku ka ku nene, ku amukelekako, ni ku mbheleleko.
3 Hi kota ya tipswalo leti ndzi nyikilweko, ndza laya a mun’we ni mun’wani wa n’wina lezvaku a nga ti alakanyeli ku hundza mpimo, kanilezvi ava ni maalakanyo ya kutikoramisa, hi kuya hi kukholwa loku Nungungulu a nyikileko a mun’we ni mun’wani.
4 Hakuva a ku khwatsi hi lezvi hi nga ni zviro zvo tala ka miri wun’we, ni lezvi a zviro lezvo zvi nga tiriko a ntiro walowu wa wun’we,
5 hi zvalezvo na hinawu, hambu lezvi hi nga tala, hi miri wun’we ka Kristu, kanilezvi a mun’we ni mun’wani wa hina ciro ka mun’wani.
6 Kota lezvi hi nga ni zvinyikiwo zvo hambana hi kuya hi tipswalo leti hi nyikilweko, a hi tireni hi zvona, loku ku hi kuphrofeta, a hi phrofeteni hi kuya hi lipimo la kukholwa ka hina;
7 loku hi nyikilwe ntiro, a hi cheleni kota hi wona; loyi a gondzisako, i wa ti tsitsirite kugondziseni kakwe;
8 ni loyi a tiyisako* van’wani, i wa va tiyise;* loyi a avelako,* i wa mahe lezvo na a nga tsoni; loyi a rangelako, i wa khatale hi ntiro wakwe; ni loyi a mahelako van’wani wuxinji, i wa zvi mahe hi mbilu yontlhe.
9 A lirandzo la n’wina li ngavi la ku fayelisela. Vengani lezvi zva kubiha, mu namarela ka lezvi zva zvi nene.
10 Randzanani kota vamakabye. Loyi ni loyi i wa dzundze mun’wani ku hundza yena.
11 Ti tsitsiriteni mitirweni ya n’wina, mu nga lolohi. Vhurani moyeni, mu tirela Jehovha.
12 Tsakani kutsumbeni ka n’wina, mu timisela kuxanisekeni. Khongelani mu nga tsiki.
13 Nyikani vobasa lezvi va zvi vhumalako, mu randza ku amukela vapfhumba.
14 Mu nga tsiki ku katekisa lava va mu xanisako; va katekiseni mu nga va kombeleli zva kubiha.
15 Tsakani ni lava va tsakako, mu rila ni lava va rilako.
16 Wonani van’wani kota lezvi mu ti wonisako zvona; mu nga ti kulisi kanilezvi ti koramiseni. Mu nga alakanyi lezvaku mu tlharihile.
17 Mu nga tlheliseli kubiha hi kubiha. Ti karateleni ku maha zva zvi nene ka vanhu vontlhe.
18 Loku zvi maheka ni loku n’wina mu zvi kota, hanyani hi kurula ni vanhu vontlhe.
19 Mu nga ti photeli varandzekako, zvi tsikeni mandleni ya Nungungulu; hakuva ku tsalilwe ku ngalo: “‘A kuphota ka mina, hi mina ndzi to tlhelisela’, ku wula Jehovha.”
20 Kanilezvi “loku a nala wa wena azwa ndlala, mu nyike zvakuga; loku azwa tora, mu nyike zvo tima tora; hakuva loku u maha lezvo u ta wungeletela makhala ma vhurako hlokweni yakwe”.*
21 Mu nga hluliwi hi zvakubiha, kanilezvi hlulani zvakubiha hi ku maha zva zvi nene.
Mitlhamuselo ya lahasi
^ Kutani: “nguva leyi”. Wona laha ka ku: “Nguva” ka Tlhamuselo wa magezu ya Bhibhiliya.
^ Kutani: “layako”.
^ Kutani: “laye”.
^ Kutani: “nyikako”.
^ Lezvi zvi mahelwa ku olovisa mbilu ya munhu a tsika ku nonoha.
