Va Le Roma 15:1-33
15 Kanilezvi hina lava hi nga ni ntamu hi fanele ku rwala a gome ga lava va nga hiko na ntamu, hi nga ti tsakisi hina venyi.
2 A mun’we ni mun’wani wa hina i wa tsakise a muakelani wakwe kasi a vhuneka ni ku mu aka.
3 Hakuva hambu Kristu a nga ti tsakisangi, khwatsi hi lezvi ku tsalilweko ku ngalo: “A zviruko zva lava va ku rukatelako zvi wela mina.”
4 Hakuva a timhaka tontlhe ti tsalilweko kale, ti tsalelwe ku gondzisa hina kasi hiva ni kutsumba hi kota ya kutimisela ni kuchavelela loku hi nyikiwako hi Mitsalo.
5 Makunu Nungungulu loyi a nyikako kutimisela ni kuchavelela i wa mu nyike a kupima ko fana ni loku Kristu Jesu a nga hi nako,
6 kasi mu dhumisa Nungungulu tlhelo Papayi wa Hosi ya hina Jesu Kristu hi mbilu yin’we ni nomu wun’we.
7 Hikwalaho amukelanani, a ku khwatsi hi lezvi Kristu yenawu a nga mu amukela, kasi ku dhumiswa Nungungulu.
8 Hakuva ndza mu byela lezvaku Kristu i mahile nandza ga lava va mahilweko wukwera* kasi ku komba lezvaku Nungungulu i wula lisine, ni ku tiyisa zvitsumbiso lezvi a zvi mahileko ka vakokwani vabye,
9 ni lezvaku a vamatiko va fela ku dhumisa Nungungulu hi kota ya wuxinji gakwe, khwatsi hi lezvi ku tsalilweko ku ngalo: “Ndzi ta ku dhumisa cikari ka vamatiko, ndzi yimbelela tisimu ti dhumisako vito ga wena.”
10 I engeta aku: “N’wina vamatiko tsakani zvin’we ni vanhu vakwe.”
11 A tlhela aku: “Dhumisani Jehovha n’wina n’wentlhe vamatiko; ni vanhu vontlhe a va dhumise yena.”
12 Isaya i tlhela aku: “Ku tava ni mutsu wa ka Jese, ku nga loyi a humako ku ta fumela matiko; ni matiko ma ta tsumba yena.”
13 Nungungulu loyi a nyikako kutsumba i wa mu tate hi kutsaka kontlhe ni kurula hi lezvi mu mu tsumbako, kasi mu fela ku tala mu halakela hi kutsumba loku mu ku kumako hi ntamu wa moya wo basa.
14 Vamakabye va mina, ndza kholwa lezvaku n’winawu mu tele hi wunene, ni kutiva kontlhe, ni lezvaku ma zvi kota ku gondzisana.*
15 Hambulezvo, ndzi mu tsalele ndzi mu alakanyisa kambe hi timhaka tin’wani na ndzi nga jikajiki, hi kota ya tipswalo leti ndzi kombisilweko hi Nungungulu
16 ta ku ndziva citiri ca Kristu Jesu ka vamatiko. Ndzi tira ntiro wo basa wa ku kanela mahungu ya ma nene ya Nungungulu, kasi a vamatiko vava cinyikiwo co amukeleka ci basisilweko hi moya wo basa.
17 Hikwalaho, ndzi na ni cigelo ca ku tizwa matshandza ka Kristu Jesu hi kota ya ntiro wa mina ka Nungungulu.
18 Hakuva a ndzi tiyi ku wula zvin’wani zvilo ahandle ka lezvi Kristu a mahileko ha mina kasi a vamatiko va fela ku ingisa. I mahile lezvo hi magezu ya mina ni mitiro,
19 ni ntamu wa zviwoniso ni zvihlamaliso, ni ntamu wa moya wa Nungungulu, kasi ndzi chumayela a mahungu ya ma nene hi kumbhelela xungetano hi Kristu kusukela Jerusalema ni lomu matlhelweni ya kona kala Ilurikumi.
20 Hikwalaho, ndzi no boha ku chumayela mahungu ya ma nene ntsena lomu a vito ga Kristu gi kalako gi nga tiviwi, kasi ndzi nga aki ka ciseketelo ca mun’wani munhu.
21 Lezvi zvi zwanana ni lezvi zvi tsalilweko zvaku: “Lava va nga kala ku byeliwa nchumu xungetano hi yena, va ta mu wona, ni lava va nga kala kuzwa, va ta zwisisa.”
22 Lezvi kambe hi zvona zvi ndzi thindekisileko makhati yo tala a ku mu endzela.
23 Kanilezvi makunu a ndza ha hi na wutshamu gi kalako gi nga se chumayelwa ka zvipandze lezvi, niku ka hundza malembe yo tala* na ndzi xuva ku mu endzela.
24 Hikwalaho, ndza tsumba lezvaku ndzi ta hundza ndzi mu wona loku ndziya Espanya. Ndzi ta tshamanyana na n’wina hi wonana mu gumesa mu ndzi heleketanyana.
25 Kanilezvi zvezvi ndziya Jerusalema ndzi ya vhuna vobasa.
26 Hakuva a vamakabye va le Makedhoniya ni le Akaya va xuvile ku hlenga zvilo zvabye kasi ku vhuna vobasa lava va vhumalako le Jerusalema.
27 Va mahile lezvo hi kuzvirandza, kunene va wa va dhevha; hakuva loku a vamatiko va avelwe a titshomba ta moya ta vobasa, a vamatiko vonawu va fanele ku vhuna vobasa hi zvilo zvabye zva nyama.
28 Hikwalaho, loku ndzi mbhetile ku maha lezvi ni ku va hendleleta a hlengo lowu, ndzi ta hundza hi seyo ka n’wina na ndziya Espanya.
29 Ndza zvi tiva kambe lezvaku a cikhati leci ndzi tota ka n’wina, ndzi tata ni makatekwa yo tala ya Kristu.
30 Makunu, ndza mu khongotela vamakabye hi Hosi ya hina Jesu Kristu ni lirandzo la moya, lezvaku mu nga tsiki ku ndzi khongelela ka Nungungulu a ku khwatsi hi lezvi minawu ndzi mahako,
31 kasi ndzi tlhatlhiswa ka vangakholwiko le Judhiya ni lezvaku a vobasa va amukela a hlengo lowu ndzi heleketako le Jerusalema,
32 kasi ku loku Nungungulu a zvi randza, ndzi fela kuta ka n’wina na ndzi tsakile hi ta tiyisana.
33 Nungungulu loyi a nyikako kurula i wave na n’wina n’wentlhe. Amen.
Mitlhamuselo ya lahasi
^ Kutani: “kinisilweko ngoma; sirkusizawu; tlulisilweko ngoma”.
^ Kutani: “ku nyikana wusungukati”.
^ Zvi nga ha wula ku: “yo kari”.
