Va Le Roma 16:1-27
16 Ndza mu tsalela ha Febhe, a makabye wa hina wa cisati, loyi a tirako bandleni ga Kenkreya,
2 lezvaku mu mu amukela Hosini hi ndlela yi faneleko vobasa, mu mu vhuna ka zvontlhe lezvi a to zvi lava, hakuva yenawu i vhunetele votala a ku patsa na mina.
3 Rungulani Priska na Akwila, a vatiri-kulori ka Kristu Jesu,
4 lava va nga veka wutomi gabye mhangweni hi kota ya mina. A hi mina ndzoce ndzi va bongako, ni mabandla wontlhe ya vamatiko ma va bonga.
5 Rungulani ni bandla legi gi tlhanganako laha mutini wabye. Mu rungula na Epenetusi loyi ndzi mu randzako, a nga mun’we wa lava vo ranga ku kholwa ka Kristu le Azia.
6 Rungulani Mariya, loyi a mu tireleko nguvhu.
7 Rungulani Andronikusi na Juniyasi, a maxaka ya mina tlhelo zvibochwa-kulori, a vavanuna va dzundzekako khwatsi cikari ka vapostoli, va nga va kale na va hi vapizani va Kristu a ku hundza mina.
8 Rungulani Ampliyatusi, loyi ndzi mu randzako Hosini.
9 Mu rungula na Urbhanusi, loyi hi tirelako Kristu zvin’we naye, na Stakusi loyi ndzi mu randzako.
10 Rungulani Apelesi, loyi a dzundzekako ka Kristu. Mu rungula ni va ka Aristubhulusi.
11 Rungulani Herodhiyoni a xaka ga mina. Mu rungula ni va ka Narkisusi lava va nga Hosini.
12 Rungulani Trifena na Trifoza, lava va ti tsitsiritako Hosini. Mu rungula na Persisi loyi hi mu randzako hakuva wa ti tsitsirita Hosini.
13 Rungulani Rufusi, a nandza go hlawuleka Hosini ni mamani wakwe, a nga mamani wa minawu.
14 Rungulani Asinkritusi, na Flegoni, na Hermesi, na Patrobhasi, na Hermasi, ni vamakabye lava va nga zvin’we navo.
15 Rungulani Filologusi, na Julya, na Nerewusi ni makabye wakwe, na Olimpasi, ni vobasa vontlhe va nga zvin’we navo.
16 Losanani hi kupswopswana ko basa. A mabandla wontlhe ya Kristu ma mu rungula.
17 Vamakabye, ndza mu khongotela lezvaku mu ti wonela ka lava va vangako kuhambana ni ku hambukisa van’wani kukholweni hi ku gondzisa zvo hambana ni lezvi mu zvi gondzileko; tsawukanani navo.
18 Hakuva a vanhu va tshamela lego a va tireli Kristu, a Hosi ya hina, kanilezvi va tirela makhwiri yabye.* Va wulawula magezu yo xengetela ni magezu yo nandziha kasi ku kalavela lava vo matha.
19 A vanhu vontlhe va zvi wona lezvaku ma ingisa, hikwalaho ndza tsaka hi kota ya n’wina. Kanilezvi ndzi lava lezvaku muva vo tlhariha ka lezvi zva zvi nene, kanilezvi muva lava va nga tlharihangiko ka lezvi zva kubiha.
20 Hakuva Nungungulu loyi a nyikako kurula i ta gandla Sathani lahasi ka mikondzo ya n’wina zvalezvi. A tipswalo ta Hosi ya hina Jesu a tive na n’wina.
21 Timote, loyi ndzi tirako naye, wa mu rungula; Lukiyusi, na Jasoni, na Sosipateri, a maxaka ya mina, vonawu va mu rungula.
22 Mina Tertiyusi, ndzi nga tsala a papilo legi, ndza mu rungula Hosini.
23 Gayusi, loyi a nga amukela mina ni bandla gontlhe, wa mu rungula. Erastusi, a mukhomi wa mali ya dhoropa, wa mu rungula, ni makabye wakwe Kwartusi, yenawu wa mu rungula.
24 *——
25 Ka loyi a nga ni ntamu wa ku mu tiyisa hi mahungu ya ma nene lawa ndzi kanelako ni ku ma chumayela hi Jesu Kristu, xungetano hi kuvhululiwa ka cihundla co basa leci ci nga fihlilwe cima ka kale,
26 kanilezvi leci makunu ci kombekisilweko ni ku tivekisiwa ka matiko wontlhe hi Mitsalo ya zviphrofeto, hi kulaya ka Nungungulu wa pindzukelwa kasi kuva ni kuingisa hi kukholwa
27 ka Nungungulu loyi a nga yena yece a tlharihileko, a wudzundzo a giye ka yena ha Jesu Kristu kala kupindzuka. Amen.
Mitlhamuselo ya lahasi
^ Kutani: “kunavela kabye”.
^ A vhesi legi a gi kona ka mitsalo yo kari ya kale. Hi cigelo leco a gi lumbi Mitsalo yi pimisilweko.
