Va Le Roma 3:1-31
3 Makunu a muJudha i va pala hi yini van’wani? Kona a wukwera* gi na ni bhindzu muni?
2 Gi na ni bhindzu hi tindlela tontlhe. A co sangula hi ku a vaJudha va nyikilwe a timhaka to basa ta Nungungulu.
3 Ahati a vaJudha lava va nga kholwiko ke? A kungakholwi kabye ku nga maha kutsumbeka ka Nungungulu ku nga vhuni nchumu ke?
4 Ahihi! Nungungulu hi yena wa lisine contlhe cikhati, hambu loku a vanhu vontlhe va hemba, kota lezvi ku tsalilweko ku: “Kasi u fela ku kumeka na u lulamile timhakeni ta wena, u hlula loku u hi kulamulweni.”
5 Kanilezvi, loku a kungalulami ka hina ku kombisa a kululama ka Nungungulu, hi ta kuyini? Nungungulu i lulamile loku a kombisa a zanga yakwe, a hi zvona ke? (Ndzi wulawula hi zvilo lezvi a vanhu va zvi tivako.)
6 Loku i wa nga lulamangi, i wa ta lamulisa kuyini a tiko?
7 Kanilezvi, loku a mawunwa ya mina ma kombekisa a lisine la Nungungulu kasi a kuliswa, hikuyini ndza ha lamulwako kota muwonhi?
8 Hikuyini hi nga wuliko hiku: “A hi maheni zva kubiha kasi kuta zva zvi nene” ke? (Kota lezvi a vokari va hi hembelako vaku ha wula.) A kulamulwa ka vanhu lavo ku va ringene.
9 Makunu hina vaJudha hi va pala hi yini van’wani? A hi va pali hi nchumu! Hakuva hi sina hi wulile lezvaku a vaJudha ni vaGreki hi wumbiri gabye va lahasi ka ciwonho;
10 kota lezvi ku tsalilweko ku ngalo: “A ku na munhu wo lulama, ne mun’we;
11 i hava a nga ni kupimisisa; i hava a hlotako Nungungulu.
12 Vontlhe va hambukile vaya tlhelweni, vontlhe a va vhuni nchumu; i hava a nga ni tipswalo, ne mun’we.”
13 “A nkolo wabye cilahla ci vhululekileko; va kanganyisa hi tirimi tabye.” “A wuxungu ga tinyoka gi minon’wini yabye.”
14 “A nomu wabye wu tele hi kurukatela ni kubava.”
15 “A mikondzo yabye yi tsutsumela ku ya halata nkhata.”
16 “A wusiwana ni makhombo zvi le tindleleni tabye,
17 a va yi tivi ndlela ya kurula.”
18 “A ku kona kuchava Nungungulu matihlweni yabye.”
19 Ha zvi tiva ku zvontlhe lezvi a Nayo wu zvi wulako wu byela lava va nga lahasi ka Nayo, kasi a minomu yontlhe yi miyetwa, ni tiko gontlhe giva ni nandzu mahlweni ka Nungungulu.
20 Hikwalaho i hava a to wuliwa wo lulama mahlweni ka Nungungulu hi ku maha mitiro ya nayo, hakuva a nayo wu hi komba lezvaku hi vawonhi.
21 Makunu, kota lezvi a Nayo ni Vaphrofeti va wulako, zvi wonekile lezvaku kasi u wuliwa wo lulama mahlweni ka Nungungulu a zvi lavi ku u hlayisa nayo.
22 Ina, lava va lulamileko mahlweni ka Nungungulu hi vontlhe lava va kholwako ka Jesu Kristu. Hakuva Nungungulu a ngayi hi nghohe.
23 Hakuva vontlhe va wonhile, va tsandzeka ku kombisa a matshamela yo hlamalisa ya Nungungulu,*
24 niku va wuliwa vo lulama hi lezvi a va kombisileko tipswalo hi ku va tlhatlhisa hi hakhelo ya kutlhatlhisa yi rihilweko hi Kristu Jesu, loyi a nga mu nyikela kota cinyikiwo.
25 Nungungulu i nyikele Kristu kasi lava va kholwako nkhateni wakwe va fela ku tlhela va zwanana naye. I mahile lezvo kasi ku kombisa kululama kakwe, hakuva hi kota ya kutimisela kakwe, Nungungulu i tsetselele zviwonho zvi mahilweko kale,
26 ni ku kombisa kululama kakwe nguveni leyi kambe hi ku hlayela kululama loyi a kholwako ka Jesu.
27 Makunu ci kwihi a cigelo ca kutikulisa ka hina ke? Ci fuvisilwe! Ci fuvisilwe hi nayo lowu wa mitiro ke? Ahihi! Ci fuvisilwe hi nayo wa kukholwa.
28 Hakuva ha tiyisa lezvaku a munhu i wuliwa ku i lulamile hi kota ya kukholwa na ku nga hi hi mitiro ya nayo.
29 Kona yena ova Nungungulu wa vaJudha voce ke? Kasi a hi Nungungulu wa vamatiko kambe ke? Ina, wa vamatiko kambe.
30 Kota lezvi a nga Nungungulu mun’we, i ta va hlayela kululama lava va mahilweko wukwera* loku va kholwa, ni lava vo kala va nga mahiwangi wukwera i ta va hlayela kululama hi kota ya kukholwa kabye.
31 Makunu, ha fuvisa nayo hi kukholwa ka hina ke? Ahihi! Ho tiyisa a nayo.
Mitlhamuselo ya lahasi
^ Kutani: “a ku kina ngoma; a sirkusizawu; a ku tlula ngoma”.
^ Hi kukongoma: “a kutlakuka ka Nungungulu”.
^ Kutani: “kinisilweko ngoma; sirkusizawu; tlulisilweko ngoma”.
