Va Le Roma 4:1-25
4 Loku zvi hi lezvo, hi ta ku zvini lezvi Abrahama, a kokwani wa hina hi ka nyama, a zvi kumileko?
2 Loku Abrahama i wa wulilwe lezvaku i lulamile hi kota ya mitiro, na a vile ni cigelo ca ku ti kulisa, kanilezvi na ku nga hi mahlweni ka Nungungulu.
3 Kasi a Mitsalo yi li yini ke? Yi ngalo: “Abrahama i no kholwa ka Jehovha, hikwalaho i no woniwa kota munhu wo lulama.”
4 Makunu ka loyi a tirako, a hakhelo yakwe a yi woniswi a ku khwatsi tipswalo, kanilezvi yi woniwa kota muholo.
5 Ka loyi a nga tiriko, kanilezvi a kholwa ka Loyi a hlayelako muwonhi kululama, i ta woniwa kota munhu wo lulama hi kota ya kukholwa kakwe.
6 Dhavhidha yenawu i wulawula hi makatekwa ya munhu loyi Nungungulu a mu wonako kota wo lulama na ku nga hi hi kota ya mitiro, aku:
7 “Va katekile lava a mitiro yabye ya kubiha yi tsetselelweko, ni lava a zviwonho zvabye zvi fenengetilweko;*
8 i katekile a munhu loyi Jehovha a to kala a nga ha cheli kota hi ciwonho cakwe.”
9 Kasi a makatekwa lawa mo kumiwa hi lava va mahilweko wukwera* voce kutani ma kumiwa kambe hi lava va nga kala ku mahiwa wukwera ke? Hakuva hi ngalo: “Abrahama i no woniwa kota munhu wo lulama hi kota ya kukholwa.”
10 I wulilwe ku munhu wo lulama na a tshamisile kuyini? Na a mahilwe wukwera,* kutani na a nga se mahiwa? Na a nga se mahiwa wukwera.
11 I amukele cifungo,* ku nga wukwera,* kota karimbo* ya lezvaku munhu wo lulama hi kota ya kukholwa loku a nga hi nako na a nga se mahiwa wukwera, lezvaku ava papayi wa vontlhe lava va kholwako hambu loku va nga mahiwangi wukwera, kasi vonawu va wuliwa ku vanhu vo lulama;
12 ni lezvaku ava papayi wa vana va mahilweko wukwera,* na ku nga hi wa lava va mahilweko wukwera basi, kanilezvi ni wa lava va pimanyisako a kukholwa loku Abrahama a papayi wa hina a nga hi nako na a nga se mahiwa wukwera.
13 Hakuva a citsumbiso leci ci nga mahiwa ka Abrahama kutani ka pswalo* wakwe, ca lezvaku i tava mugi wa tshomba ya tiko, a ci mahiwangi ka yena hi kota ya ku ingisa nayo, kanilezvi kuve hi lezvi a nga hlayelwa kululama hi kota ya kukholwa.
14 Hakuva loku ku hi lezvaku lava va ingisako nayo hi vona va nga vagi va tshomba, a kukholwa a ka ha tiri, ni citsumbiso ca Nungungulu a ca ha vhuni nchumu.
15 Hi lisine a Nayo wu vanga zanga, kanilezvi laha ku nga hava nayo a ku na ku hambunyeta nayo.
16 Hikwalaho a citsumbiso ci kumiwa hi kukholwa, kasi ci fela kuva ca tipswalo, lezvaku ci fela ku tiya ka pswalo* wakwe wontlhe, na ku nga hi ka lava va ingisako nayo voce, kanilezvi ni ka lava va nga ni kukholwa ko fana ni loku ka Abrahama, a papayi wa hontlheni.
17 (Lezvi hi lezvi zvi tsalilweko zvaku: “Ndzi ku mahile papayi wa tixaka to tala.”) Zvi mahekile mahlweni ka Nungungulu loyi Abrahama a nga kholwa ka yena, loyi a hanyisako vafileko, a wulawula hi zvilo zvi kalako zvi nga hi kona a ku khwatsi hi loku zvi hi kona.*
18 Hambu lezvi zvi nga kala zvi nga ha tsumbisi, i no kholwa na a tsumba lezvaku i tava papayi wa tixaka to tala, kota lezvi zvi nga sina zvi wulilwe, zvaku: “A pswalo* wa wena wu ta talisa lezvi.”
19 Hambu lezvi a nga kala ku tsika kukholwa kakwe ku mbhela ntamu, a miri wakwe i wa wu wonisa ku khwatsi makunu wu file (hakuva i wa hi ni cipimo ca 100 wa malembe), ni marumbu ya Sara wonawu ma wa ku khwatsi ma file.
20 Kanilezvi hi kota ya citsumbiso ca Nungungulu, a nga kanakanangi kukholweni; kanilezvi i no tiya kukholweni kakwe, a dhumisa Nungungulu
21 na a nga kanakani ne ni kutsongwani lezvaku Nungungulu i na ni ntamu wa ku maha lezvi a zvi tsumbisileko.
22 Hikwalaho, “i no woniwa kota munhu wo lulama.”
23 Hambulezvo, a magezu lawa yaku: “I no woniwa kota munhu wo lulama”, ma wa nga tsalelwi yena yece
24 kanilezvi ma wa tsalelwa na hinawu hi to wuliwa vo lulama hi lezvi hi kholwako ka Nungungulu loyi a vhuxileko Jesu, a Hosi ya hina, hi ka vafileko,
25 loyi a nga nyikelwa hi kota ya zvihoxo zva hina, a vhuxiwa kasi Nungungulu a hi wula vo lulama.
Mitlhamuselo ya lahasi
^ Kutani: “zvi tsetselelweko”.
^ Kutani: “kinisilweko ngoma; sirkusizawu; tlulisilweko ngoma”.
^ Kutani: “kinisilwe ngoma; sirkusizawu; tlulisilwe ngoma”.
^ Kutani: “marka”.
^ Kutani: “ku kina ngoma; sirkusizawu; ku tlula ngoma”.
^ Kutani: “citiyisekiso”.
^ Kutani: “kinisilweko ngoma; sirkusizawu; tlulisilweko ngoma”.
^ Hi kukongoma: “mbewu”.
^ Hi kukongoma: “mbewu”.
^ Zvi nga ha wula ku: “a vanga lezvi zvi kalako zvi nga hi kona”.
^ Hi kukongoma: “mbewu”.
