Va Le Roma 5:1-21
5 Hikwalaho, kota lezvi makunu hi wulilweko vanhu vo lulama hi kota ya kukholwa, a hi ti buzeni hi kurula* na Nungungulu hi kota ya Hosi ya hina Jesu Kristu,
2 loyi hi kumileko hi yena tipswalo hi kukholwa, leti hi nga ka tona zvalezvi; makunu a hi tsakeni* na hi kari hi rindzela ku nyikiwa cikhundla co tlakuka hi Nungungulu.
3 Na ku nga hi lezvo basi, a hi tsakeni* hambu loku hi hi kuxanisekeni, na hi tiva lezvaku a kuxaniseka ku vanga kutimisela;
4 a kutimisela ku hi maha hi amukeleka ka Nungungulu; ni kuamukeleka ka Nungungulu ku vanga kutsumba,
5 a kutsumba a ku hi wisi tingana; hakuva a lirandzo la Nungungulu li chululilwe timbilwini ta hina hi moya wo basa lowu hi nyikilweko.
6 Hakuva na ha hi vawonhi, Kristu i no fela vanhu va nga chaviko Nungungulu hi cikhati ci faneleko.
7 Hakuva zva karata ku a munhu a fela munhu wo lulama; hambu lezvi a wokari kuzvilava a nga tiyako ku fela munhu wa mu nene.
8 Kanilezvi Nungungulu i komba ku wa hi randza hi ndlela leyi: Na ha hi vawonhi, Kristu i no hi fela.
9 Makunu kota lezvi hi wuliwako vanhu vo lulama hi kota ya nkhata wakwe, hi ta poniswa zangeni hi kota ya yena.
10 Hakuva loku hi tlhelile hi zwanana na Nungungulu hi kota ya kufa ka N’wana wakwe na ha hi valala, a ha ha wuli lezvi makunu hi zwananileko naye, hi ta poniswa hi wutomi gakwe.
11 Ahandle ka lezvo, ha tsaka kambe na Nungungulu hi kota ya Hosi ya hina Jesu Kristu, loyi a hi zwananisileko na Nungungulu.
12 Hikwalaho, a ku khwatsi hi lezvi a ciwonho ci nga nghena tikweni hi kota ya munhu mun’we, ni kufa ku tile hi kota ya ciwonho; hikwalaho a kufa ku no thapela vanhu vontlhe, hakuva vontlhe va wonhile . . .
13 Hakuva a ciwonho cive kona tikweni a Nayo na wu nga seva kona, kanilezvi a vanhu a va hlayelwi kuwonha loku ku nga hi na nayo.
14 Hambulezvo, kusukela ka Adhamu kala ka Mosi, a kufa ku no fuma hambu hehla ka lava va nga kala ku wonhisa ku khwatsi hi Adhamu, loyi a nga fana ni loyi a nga hata.
15 Kanilezvi a cinyikiwo a ci fani ni kuwonha. Hakuva loku a votala va file hi kota ya kuwonha ka munhu mun’we, a ha ha wuli hi tipswalo ta Nungungulu ni cinyikiwo cakwe ca tipswalo ci tileko hi ka munhu mun’we, ku nga Jesu Kristu, zvi andzile nguvhu* ka votala!
16 Ahandle ka lezvo, lezvi zvi humelelako ka cinyikiwo leci, a zvi fani ni lezvi zvi humeleleko hi kota ya kuwonha ka munhu mun’we. Hakuva a kulamula loku ku tileko hi kota ya ciwonho cin’we ku no kona vanhu vontlhe, kanilezvi a cinyikiwo leci ci tileko hi kota ya zviwonho zvo tala ci va hlayele kululama a votala.
17 Hakuva loku a kufa ku fumile hi kota ya kuwonha ka munhu mun’we, a ha ha wuli hi lava va amukelako a tipswalo ta talela ga cima ni cinyikiwo ca kululama, vonawu va ta hanya, va fuma kota tihosi hi kota ya munhu mun’we, ku nga Jesu Kristu!
18 Hikwalaho, a ku khwatsi hi lezvi a ciwonho cin’we ci nga maha lezvaku a vanhu va tixaka tontlhe va koneka, hizvalezvo, hi kota ya cimaho cin’we ca kululama a vanhu va tixaka tontlhe va hlayelwa kululama loku ku yisako wutomini.
19 Hakuva a ku khwatsi hi lezvi a kungaingisi ka munhu mun’we ku nga maha votala vava vawonhi, a kuingisa ka munhu mun’we konawu ku ta maha votala va wuliwa vo lulama.
20 Makunu a Nayo wu nota kasi ku ta andzisa kuwonha. Kanilezvi laha a kuwonha ku nga andzile, a tipswalo tonawu ti no andza nguvhu.
21 Kasi zvi kuyini? Kasi ku, a ku khwatsi hi lezvi a ciwonho ci nga fuma zvin’we ni kufa, a tipswalo tonawu ti fela ku fuma hi kululama loku ku yisako wutomini ga pindzukelwa ha Jesu Kristu, a Hosi ya hina.
Mitlhamuselo ya lahasi
^ Zvi nga ha wula ku: “hi na ni kurula”.
^ Zvi nga ha wula ku: “ha tsaka”.
^ Zvi nga ha wula ku: “ha tsaka”.
^ Kutani: “zvonawu zva halakela”.
