Va Le Roma 6:1-23
6 Makunu hi ta kuyini? Hi ta simama ciwonhweni kasi a tipswalo ti fela ku andza ke?
2 Ahihi! Kota lezvi hi fileko hi tlhelo ga ciwonho, hi ta simamisa kuyini ku hanya ka cona ke?
3 Kutani mo kala mu nga zvi tivi lezvaku hontlheni hi bhabhatiselweko ka Kristu Jesu hi bhabhatiselwe kufeni kakwe ke?
4 Hikwalaho a cikhati leci hi nga bhabhatiswa kufeni kakwe, hi no lahliwa zvin’we naye, kasi ku, a ku khwatsi hi lezvi Kristu a vhuxilweko hi ka vafileko hi ntamu wa* Papayi, hi hanya a wutomi giswa.
5 Kota lezvi hi tlhanganisilweko zvin’we naye hi ku fisa ku khwatsi hi yena, hi ta tlhanganiswa zvin’we naye hi lezvi hi vhuxiswako ku khwatsi hi yena.
6 Hakuva ha zvi tiva lezvaku a mahanyela ya hina ya kale ma belelwe zvin’we naye mhandzeni lezvaku a miri wa hina wa kuwonha wu fela ku mbhetiwa ntamu, kasi hi nga havi malandza ya ciwonho.
7 Hakuva loyi a fileko i tsetselelwe* ciwonho cakwe.
8 Ahandle ka lezvo, loku hi file zvin’we na Kristu ha kholwa lezvaku hi ta hanya zvin’we naye kambe.
9 Hakuva ha zvi tiva lezvaku, lezvi makunu Kristu a nga vhuxiwa hi ka vafileko a nga hafi kambe; a kufa a ka ha hi na ntamu hehla kakwe.
10 Hakuva a kufa loku a fileko, i fele ku fuvisa ciwonho khati gin’we zvi enela, kanilezvi a wutomi legi a hanyako, i hanyela Nungungulu.
11 Hizvalezvo, na n’winawu, ti woneni na mu file hi tlhelo ga ciwonho, kanilezvi na mu hanyela Nungungulu ha Kristu Jesu.
12 Hikwalaho, mu nga tsiki ciwonho ci fuma mirini wa n’wina lowu wu fako, lezvaku mu ingisa a kunavela ka wona.
13 Ne mu nga nyikeli a zviro zva n’wina ciwonhweni kota matlhari ya kungalulami, kanilezvi ti nyikeleni ka Nungungulu kota lava va humileko kufeni vaya wutomini. Nyikelani a zviro zva n’wina kambe ka Nungungulu kota matlhari ya kululama.
14 Hikwalaho a ciwonho ci nga fumi hehla ka n’wina hakuva a mu lahasi ka nayo kanilezvi mu lahasi ka tipswalo.
15 Hi ta kuyini ke? Hi ta wonha hi lezvi hi nga lahasi ka tipswalo na ku nga hi lahasi ka nayo? Ahihi!
16 Kasi a mu zvi tivi lezvaku loku mu ti nyikela ka wokari kasi ku maha malandza ma ingisako, mu malandza ya loyi mu mu ingisako ke, kani ya ciwonho leci ci yisako kufeni, kutani ya kuingisa loku ku yisako kululameni?
17 Kanilezvi i wa bongiwe Nungungulu hakuva hambu lezvi mu nga hi malandza ya ciwonho, mu no ingisa hi timbilu ta n’wina tontlhe a gondziselelo leyi Nungungulu a mu nyikileko.
18 Kota lezvi mu tlhatlhisilweko ka ciwonho mu malandza ya kululama.
19 Ndzi wulawula hi zvilo lezvi a vanhu va zvi tivako hi kota ya lezvi a nyama ya n’wina yi nga ni gome; hakuva a ku fana ni lezvi mu nga nyikele a zviro zva n’wina zviva malandza ya kungahlazveki ni ya ku hambunyeta nayo lezvi zvi yisako ka kuhambunyeta nayo, makunu lezvi, nyikelani a zviro zva n’wina zviva malandza ya kululama loku ku yisako mitirweni yo basa.
20 Hakuva a cikhati leci mu nga hi malandza ya ciwonho, mu wa tlhatlhekile hi tlhelo ga kululama.
21 Kasi mu wa bhindzula yini cikhatini leco? Mu wa bhindzula a zvilo lezvi makunu zvi mu wisako tingana, hakuva a kugumesa ka zvilo lezvo kufa.
22 Kanilezvi, lezvi makunu mu tlhatlhisilweko ciwonhweni mu maha malandza ya Nungungulu, mu pswala mihandzu ya kubasa leyi a magumo ya kona ku nga wutomi ga pindzukelwa.
23 Hakuva a hakhelo ya ciwonho kufa, kanilezvi a cinyikiwo ca Nungungulu wutomi ga pindzukelwa ha Kristu Jesu a Hosi ya hina.
