Va Le Roma 7:1-25
7 Vamakabye, kasi mo kala mu nga zvi tivi lezvaku a Nayo wu fumela munhu na a ha hanya ke? (Ndzi wulawula na n’wina lava mu tivako nayo.)
2 A wasati a chadhileko i bohilwe hi nayo wa nuna wakwe loku a nuna wakwe a ha hanya; kanilezvi loku a nuna wakwe afa, i tlhatlhekile ka nayo wa nuna wakwe.
3 Hikwalaho, loku a tekiwa hi mun’wani wanuna a nuna wakwe na a ha hanya, i ta wuliwa ku cibhayi. Kanilezvi loku a nuna wakwe afa, i tlhatlhekile ka nayo wa nuna wakwe, hikwalaho, loku a chadha ni mun’wani wanuna a nga ta wuliwa ku cibhayi.
4 Hikwalaho vamakabye, n’winawu mu file hi tlhelo ga Nayo hi kota ya miri wa Kristu, kasi mu lumba mun’wani, ku nga loyi a vhuxilweko hi ka vafileko lezvaku mu mu pswalela mihandzu Nungungulu.
5 Hakuva laha hi nga ha hanya hi ka nyama, a kunavela ka kuwonha loku ku vhuxilweko hi Nayo ku wa tira zvirweni zva hina ku pswala mihandzu yi yisako kufeni.
6 Kanilezvi makunu hi tlhatlhisilwe ka Nayo, hakuva hi file ka lezvi zvi nga hi bohelele, kasi hiva malandza hi tshamela giswa ga ka moya, na ku nga hi tshamela ga kale ga nayo wu tsalilweko.
7 Makunu hi ta kuyini? A Nayo ciwonho ke? Ahihi! Phela loku ku wa nga hi Nayo, na ndzi nga ci tivangi ciwonho. Loku a Nayo wu wa nga wuli wuku: “U nga naveli”, na ndzi nga ku tivangi kunavela.
8 Kanilezvi hi kota ya cileletelo, a ciwonho ci no kuma ndlela ya ku ndzi vangela kunavela ka tixaka tontlhe, hakuva loku a nayo wu nga hi kona a ciwonho ci file.
9 Kunene ndzi wa ti hanyela na ndzi nga hi na nayo. Kanilezvi laha ku nga chikela cileletelo, a ciwonho ci no vhuka ci hanya, kanilezvi mina ndzi nofa.
10 Makunu ndzi no wona lezvaku a cileletelo leci ci nga fanele ku ndzi yisa wutomini, ci ndzi yisa kufeni.
11 Hakuva hi kota ya cileletelo, a ciwonho ci no kuma ndlela ya ku ndzi kanganyisa, ci ndzi daya.
12 Hikwalaho a Nayo wona wu basile, ni cileletelo conawu ci basile, ci lulamile niku ci nene.
13 Makunu lezvi zvi nga zvi nene zvi ndzi yisile kufeni ke? Ahihi! Kanilezvi a ciwonho ci ndzi dele. A ciwonho ci ndzi tisele kufa hi zvilo zva zvi nene kasi ci ti komba lezvi ci nga tshamisa zvona, ni cileletelo conawu ci no komba lezvaku a ciwonho ci bihile nguvhu.
14 Hakuva ha zvi tiva lezvaku a Nayo wuta hi ka Nungungulu,* kanilezvi mina ndzi munhu wa nyama a xavisilweko ciwonhweni.
15 Hakuva lezvi ndzi mahako a ndzi zvi tivi. Hakuva a ndzi mahi lezvi ndzi zvi randzako, kanilezvi ndzi maha lezvi ndzi zvi vengako.
16 Kanilezvi loku ndzi maha lezvi ndzi nga zvi randziko, ndza vhumela lezvaku a Nayo wu nene.
17 Makunu a ka ha hi mina ndzi mahako, kanilezvi ciwonho leci ci nga ndzeni ka mina.
18 Hakuva ndza zvi tiva lezvaku ka mina — ndzi wula lomu nyameni ya mina — a ku na nchumu wa wu nene; hakuva ndza xuva ku maha zva zvi nene kanilezvi a ndzi na ntamu wa ku zvi maha.
19 Hakuva a ndzi mahi zva zvi nene lezvi ndzi zvi xuvako, kanilezvi a zva kubiha lezvi ndzi zvi vengako hi zvona ndzi mahako.
20 Makunu loku ndzi maha lezvi ndzi nga zvi randziko, a ka ha hi mina ndzi mahako, kanilezvi ciwonho leci ci nga ndzeni ka mina.
21 Mhakeni ya mina, ndzi wona a nayo lowu: Loku ndzi xuva ku maha zva kululama, ndzi kokelwa ku maha lezvi zva kubiha.
22 Kunene ndza tsakela a nayo wa Nungungulu hi munhu loyi ndzi nga yena mbilwini,
23 kanilezvi ndzi wona a nayo wun’wani zvirweni zva mina lowu wu lwako ni nayo wa kupima ka mina, wu ndzi kokela wukhumbini ga nayo wa kuwonha lowu wu nga zvirweni zva mina.
24 A khombo ga mina vasan’wina! Himani a to ndzi tlhatlhisa mirini lowu wu ndzi yisako kufeni ke?
25 I wa bongiwe Nungungulu hi kota ya Jesu Kristu a Hosi ya Hina! Hakuva ndzi tirela a nayo wa Nungungulu hi kupima ka mina, kanilezvi hi nyama ya mina ndzi tirela a nayo wa kuwonha.
Mitlhamuselo ya lahasi
^ Hi kukongoma: “a Nayo wa ka moya”.
