Va Le Roma 9:1-33
9 Ndzi mu byela lisine mahlweni ka Kristu; a ndzi hembi, hambu a livhalo la mina la ndzi kustumunyela ka moya wo basa,
2 lezvaku ndza karateka nguvhu ni kuzwa kubayisa ko kala ku nga mbheli mbilwini ya mina.
3 Ndzi wa ta vhumela lezvaku kuva mina ndzi hambanisiwako na Kristu ndzi lova, na ndzi fela vamakabye va mina, va nga maxaka ya mina hi ka nyama,
4 ku nga vaIzrayeli. Hi vona va mahilweko vana, va nyikiwa kungangamela, ni zvivhumelwano, ni Nayo, ni ntiro wo basa, ni zvitsumbiso.
5 A vakokwani va lumba vona, na Kristu i humile hi kabye hi ka nyama. Nungungulu loyi a nga hehla ka zvontlhe i wa bongiwe kala kupindzuka. Amen.
6 Kanilezvi a hi ku khwatsi a mhaka ya Nungungulu yi no tsandzeka. Hakuva a hi vontlhe lava va humako ka Izrayeli, va nga “Izrayeli” wa lisine.
7 Hambu loku va hi va pswalo* wa Abrahama, a hi vontlhe va nga vana; hakuva ku tsalilwe ku ngalo: “A pswalo* wa wena wu ta huma hi ka Isaka.”
8 Ku nga lezvaku, lava va nga vana hi ka nyama a hi vona va nga vana va Nungungulu, kanilezvi a vana va citsumbiso hi vona va nga pswalo.*
9 Hakuva a citsumbiso ca Nungungulu ci te ngalo: “Ndzi ta wuya ka wena a lembe gi tako hi cikhati caleci, niku Sara i tava a pswalile n’wana wa mufana.”
10 Lezvo a zvi mahekangi ka cikhati leco basi, kanilezvi zvi mahekile kambe a cikhati leci Rebheka a nga xura nyimba ya mahahla hi ka kokwani wa hina Isaka;
11 hakuva a vanana lavo na va nga se pswaliwa ne ku maha nchumu wa wu nene kutani wo biha, Nungungulu i no ranga a wula ku i ta hlawula mani. Hakuva Nungungulu i hlawula loyi a mu lavako, a nga hlawuli hi ku cuwuka mitiro ya munhu.
12 Rebheka i byelilwe lezvi: “Loyi wa nhondzo i ta tirela a ndzisana.”
13 Khwatsi hi lezvi ku tsalilweko ku ngalo: “Ndzi randzile Jakobe, ndzi venga Esawu.”
14 Makunu hi ta ku Nungungulu a nga lulamangi ke? Ahihi!
15 Hakuva i ngalo ka Mosi: “Ndzi ta mu mahela wuxinji loyi ndzi to mu mahela wuxinji, ndzi mu zwela wusiwana loyi ndzi to mu zwela wusiwana.”
16 Hikwalaho a zvi maheki hi kurandza ka munhu kutani hi kutikarata kakwe,* kanilezvi zvita hi ka Nungungulu, loyi a nga ni wuxinji.
17 Hakuva a mutsalo wu ngalo ka Faro: “Ndzi ku tsikile u hanya kasi ndzi fela ku kombisa ntamu wa mina hi laha ka wena ni lezvaku a vito ga mina gi kanelwa misaveni yontlhe.”
18 Hikwalaho, wa mu mahela wuxinji ni wihi a randzako ku mu mahela wuxinji, a tsika mbilu ya loyi a ti nonohisako yi nonoha.
19 Makunu u taku ka mina: “Hikuyini Nungungulu a ha solako vanhu? Himani wa ku a nga mu betela ku maha kurandza kakwe ke?”
20 Kanilezvi hi wena mani wo kala u kanetisana na Nungungulu? Ina a cibya leci ci wumbilweko ci nga byela muwumbi wa cona ciku: “Hikuyini u nga ndzi wumbisa lezvi ke?”
21 Kasi a muwumbi a nga na ntamu hehla ka wumba, wa ku wumba hi wumba galegi ga gin’we a cibya co dzundzeka, ni cin’wani ci nga dzundzekiko ke?
22 Makunu hi nga kuyini hi Nungungulu loyi wa ku hambu lezvi a nga lava ku kombisa zanga yakwe ni ntamu wakwe, i no timiselela a zvibya zva zanga hi lihlazva-mbilu la hombe hambu lezvi zvi nga ringanelwa hi ku loviswa ke?
23 U ta kuyini wena loku ku hi lezvaku Nungungulu i mahile lezvo kasi ku kombisa wukulu ga kungangamela kakwe zvibyeni zva wuxinji, lezvi a nga zvi longisela wudhumo hi kale,
24 ku nga hina lava a hi vitanileko na ku nga hi ka vaJudha voce, kanilezvi ni ka vamatiko kambe ke?
25 Lezvo hi lezvi a zvi wulako ni ka Hoseya aku: “Lava va nga hiko vanhu va mina ndzi ta va wula ku ‘vanhu va mina’ ni loyi a nga kala a nga randziwi, ndzi ta mu vitana ku ‘murandziwa’;
26 lomu va nga byelilwe ku ‘a mu vanhu va mina’, kwalaho va ta wuliwa ku i ‘vana va Nungungulu a hanyako’.”
27 Isaya yenawu i wula lezvi xungetano hi Izrayeli: “Hambu loku a vana va Izrayeli va talisile ku khwatsi misava ya bimbi, misalela basi yi to ponisiwa.
28 Hakuva Jehovha i ta lamula vanhu va hanyako misaveni, a tsema mhaka hi cihatla.”
29 Isaya i tlhelile a phrofeta aku: “Loku Jehovha wa tiyimpi i wa nga hi siyelangi a pswalo,* na hi fanile ni Sodhoma ni Gomora.”
30 Makunu hi ta kuyini ke? Hi ngalo a vamatiko lava va nga kala va nga hloti a kululama, va ku kumile, ku nga kululama loku ku kumiwako hi kukholwa;
31 kanilezvi a vaIzrayeli, hambu lezvi va nga hlota a nayo wa kululama, a va wu kumangi.
32 Hikuyini? Hakuva va wa nga wu laveteli hi kukholwa, kanilezvi va wa wu lavetela hi mitiro. Va ti gumulile hi “ribye legi gi wisako”;
33 khwatsi hi lezvi ku tsalilweko ku ngalo: “Ndza veka a ribye legi gi wisako le Ziyoni, a ribye legi gi khunguvanyisako; kanilezvi loyi a kholwako ka gona a nga tawa tingana.”
Mitlhamuselo ya lahasi
^ Hi kukongoma: “mbewu”.
^ Hi kukongoma: “mbewu”.
^ Hi kukongoma: “mbewu”.
^ Hi kukongoma: “a zvi maheki hi kurandza ka munhu ne hambu hi kutsutsuma ka munhu”.
^ Hi kukongoma: “mbewu”.
