A Bhibhiliya go Basa i mhaka ya Nungungulu yi tsalilweko leyi a wulawulako hi yona na hina hontlheni. Hi fanele ku gi gondza kasi hi tiva a Mutumbuluxi wa gona. (Johani 17:3; 2 Timote 3:​16) Ka mapajina ya gona, Jehovha Nungungulu i tivekisa a kungo gakwe xungetano hi vanhu ni misava, leyi yi nga muti wabye. — Genesisi 3:​15; Kuvhululelwa 21:​3, 4.

A ku na gin’wani bhuku gi nga ni ntamu wa ku khumba a wutomi ga vanhu a ku fana ni Bhibhiliya. Gona ga hi kuca ku kombisa a matshamela ya Jehovha ya lirandzo, ni wuxinji, ni kuzwela wusiwana. Ga nyika kutsumba, gi tlhela gi vhuna vanhu lezvaku va timisela hambu tixanisa ta hombe nguvhu. Ahandle ka lezvo, gi simama ku tivekisa a zvilo zva tiko legi zvi kalako zvi nga yelani ni kurandza ka Nungungulu ku mbheleleko. — Lisimu 119:105; Mahebheru 4:​12; 1 Johani 2:​15-​17.

Kusanguleni, a Bhibhiliya gi tsalilwe hi ciHebheru, ni ciAramaiko ni ciGreki. Kanilezvi zvezvi gi hundzuluselwe hi 3000 wa tirimi ni ku hundza, ku ngava hi murumba kutani hi zvipandze. Hi gona bhuku gi hundzuluselweko ni ku avelwa ku hundza wontlhe matin’wini ya vanhu. Kunene, lezvo a zvi hi hlamalisi. A ciphrofeto ca Bhibhiliya ci ngalo: “A mahungu lawa ya manene ya Mufumo [a mahungu-tshinya ya Bhibhiliya] ma ta chumayelwa misaveni yontlhe kasi mava wukustumunyu ka matiko wontlhe, hi kona ku to chikela a kugumesa.” — Matewu 24:14.

Na hi tiva a lisima la mahungu ya Bhibhiliya, a kungo ga hina kuve ku humesa a wuhundzuluseli gi nga gumelwiko laha ka kutsumbeka ntsena ka mitsalo yo sangula, kanilezvi go dlunyateka ni go olova ku lera. Ka Apendise A, a tindzima leti taku “Matshinya ya ku hundzulusela a Bhibhiliya”, “Matshamela ya Bhibhiliya legi”, ni leyi yaku “Lezvi a Bhibhiliya gi nga chikelisa zvona ka hina” ti tlhamusela a matshinya yo kari ya ku hundzulusela ma landzelweko ka Bhibhiliya legi ni matshamela yo kari ya gona.

Lava va randzako Jehovha Nungungulu ni ku mu khozela va xuva kuva ni wuhundzuluseli go tsumbeka ni go zwisiseka ga Mhaka ya Nungungulu. (1 Timote 2:4) Na hi hi ni kungo lego, hi humesile a wuhundzuluseli legi hi ciTshwa, hi kuyelana ni kuxuva ka hina ka ku a Wuhundzuluseli ga Misava Yiswa gi humesiwa hi tirimi to tala hi laha zvi kotekako hi kona. Muleri wo randzeka wa Bhibhiliya, hi khongelela lezvaku u vhuneka hi wuhundzuluseli legi ga Mitsalo yo Basa laha u ti tsitsiritako u ‘hlota Nungungulu kala hakunene u mu kuma’. — Mitiro 17:27.